دوشنبه, جنوري 18, 2021
Home Blog Page 2

مریم سما: د ولسي جرګې غړي د شخصي ګټو لپاره بودجه نه تاییدوي

1
د ولسي جرګې غړې مریم سما

تاند(یکشنبه، د جدي ۲۸) په ولسي جرګه کې د کابل د خلکو استازې مریم سما وایي، د ولسي جرګې هغه غړي چې بودجې ته د رد رایه ورکوي د خلکو په غم کې نه دي بلکې غواړي خپلې پروژې د ۱۴۰۰ کال په مالي بودجه کې شاملې کړي.

په ولسي جرګه کې د کابل د خلکو استازې مریم سما په خپله فېسبوک پاڼه لیکلي، د ولسي جرګې د غړو له خوا د بودجې د نه تاییدولو هدف یوازې خپلې ګټې دي او د خلکو غم نه دې اخیستي.

هغه وایي، دا نه یوازې چې سږ کال داسې حالت روان دی بلکې تر دې وړاندې هم هر کال د بودجې د تایید پر وخت دوی د خپلو  پروژو لپاره د بودجې طرحې ته د رد رایه ورکوي او غواړي خپلې ګټې د بودجې په طرحه کې شاملې کړي ترڅو یې خپلو شخصي جېبونو ته واچوي.

هغې خلکو ته په اشارې ویلي، له فساد څخه هیڅکله ملاتړ مه کوئ هغه که په دولت کې وي او که په ولسي جرګه کې وي.

دا په داسې حال کې دی چې تېره ورځ د ۱۴۰۰ مالي کال بودجه د ولسي جرګې له لورې د دویم ځل لپاره رد شوه او د دغې جرګې غړي له دولت غواړي چې په راتلونکي کال بودجه کې دې د استادانو، سرتېرو او نورو ټیټ رتبه مامورینو معاشات لوړ شي او په طرحه کې دې شامل شي.

دغه راز دوی وایي، په حکومت کې دننه چې کوم چاته لوړ معاش ورکول کېږي هغه باید کم شي او سرتېرو، استادانو اجیرانو ته دې ورکړل شي.

بل خوا ولسمشرغني بیا ننګرهار ته د خپل سفر پر مهال وویل، ولسي جرګه د دې صلاحیت نه لري چې  په بودجه کې خپل فرمایشات ځای پر ځای کړي بلکې د دوی صلاحیت یوازې د رد او تایید دی.

بایډن: د لوړې په لومړۍ ورځ پر مسلمانانو د سفر بندیزونه لغوه کوم

0
جو بایډن

تاند(یکشنبه، د جدي ۲۸) د امریکا ټاکل شوی ولسمشر جوبایډن به د خپلې کاري دورې په لومړۍ ورځ هغه فرمان لاسلیک کړي چې له مخې به یې د ټولو اسلامي هېوادونو پر وګړو امریکا ته د ډونالډ ټرمپ له خوا د سفر لګول شوی بندیز لغوه شي.

د جوبایډن لوې درستیز ران کلاین نن په یوه یادداشت کې وویل، یو له هغه مسایلو چې منتخب ولسمشر جوبایډن به وروسته له لوړې ترسره کړي، د اسلامي هېودونو وګړو ته د دې اجازه ورکول چې امریکا ته لاړ شي.

دا په داسې حال کې ده چې امریکا کې د ولسمشر اجرايي فرمانونه د کانګرس تصویب ته اړتیا نلري
دغه راز کلاین زیاته کړه، چې د جوبایډن د کار د لومړۍ ورځ په برنامه کې د پاریس اقلیمي هوکړې ته د امریکا راستون کیدو لپاره د هڅو پیلیدل او د فډرال په ادارو کې د کورونا ویروس خپریدو څخه مخنیوي لپاره د ماسک کارول هم په لومړیتوب کې دي.

دا په داسې حال کې ده چې د امریکا اوسنی ولسمشر ډونالډ ټرمپ په ۲۰۱۷ کال کې د خپل تحلیف په مراسمو کې د ځینو اسلامي هیوادونو سفرونه يې امریکا ته منع کړي وه.

له دې سره سم ډونالډ ټرمپ په روان کال کې د پاریس له اقلیمي تغیر هوکړې څخه ووته او د کورونا ویروس له خپریدو څخه مخنیوي په برخه کې یې هم جدیت نه وو ښودلی.

هرات کې د انسان تښتوونکو یوه ډله نیول شوې

0

تاند(یکشنبه، د جدي ۲۸) د هرات امنیتي چارواکي وايي، امنیتي ځواکونو د یو لړ ځانګړو عملیاتو په ترڅ کې د دغه ولایت په ګذره ولسوالۍ کې د انسان تښتوونکو یوه پنځه کسیزه ډله ونیوله.

د هرات له ولایت مقام په خپره شوې خبرپاڼه کې راغلي، د انسان تښتوونکو یوه پنځه کسیزه ډله چې له څو کلونو راهیسې یې د دغه ولایت په سویل کې فعالیت کولو د ګذره ولسوالۍ د پولیسو له لورې ونیول شول.

د هرات د والي مرستیال نور احمد حیدري وایي، دغه کسانو تر نیول کېدو وروسته په خپلو جرمونو اعتراف کړی دی او ټولې کړنې یې منلې دي.

دا په داسې حال کې ده چې په دې وروستیو کې په هېواد کې د امنیتي پېښو ترڅنګ انسان تښتوونکي هم زیات شوي دي.

کابو اتیا ورځې وړاندې د انسان تښتوونکو یوې ډلې په بلخ ولایت کې یو کم عمره ماشوم تښتوولی چې لا هم ورسره دی تېره ورځ ولسمشر د بلخ ولایت دولتي مسوولینو ته خبرداری ورکړ چې که یې دا ماشوم ژر تر ژره ازاد نه کړ ټول به له دندې ګوښه کړي.

ولسمشرۍ ماڼۍ پر ښځینه قاضیانو برید غندلی

1

تاند(یکشنبه، د جدي ۲۸) ارګ د سترې  محکمې پر ښځینه قاضیانو برید غندلی او د هغوی مړینه یې ستره ضایع بللې ده.

له ولسمشرۍ ماڼۍ په خپره شوې خبرپاڼه کې راغلي، ولسمشرغني د دغه تروریستي برید د غندلو پرمهال وویل، د طالبانو ډلې او نورو تروریستي ګروپونو له لوري زموږ پر بې دفاع هیوادوالو بریدونه او د دوی پر وړاندې تاوتریخوالی د اسلامي ارشاداتو د سولې د روحیې خلاف او د ولس پر وړاندې د نامشروع جګړې او دښمنۍ په مانا دی چې د سولې په اړه د ولس ملي اجماع زیانمنولای شي.

خبرپاڼه لیکی، د افغانستان اسلامي جمهوري دولت یو وار بیا په ټینګار او تکرار له طالبانو غواړي چې زور، ترور، وحشت او جنایت د ستونزو حل نه دی او په هیواد کې روان ناورین او جګړه لا سختوي او اوږدوي، نو د دایمي اوربند په منلو سره د سولې لپاره خپله رښتینې او عملي اراده وښیئ.

خبرپاڼه کې راغلي، ولسمشرغني اړوندو مسوولینو ته د دغې پېښې د عاملینو د تعقیب او مجازاتو په اړه د جدي لارښوونې وکړې.

دا په داسې حال کې دی چې نن سهار د کابل ښار لسمې امنیتي حوزې اړوند قلع فتح‌الله سیمه کې نامعلومو وسله‌والو له لورې د سترې محکمې د قاضیانو پر موټر برید وشو چې په پایله کې یې دوه قاضیانې ووژل شوې او دوه نورې ټپیانې دي.

د یاد برید مسوولیت تراوسه کومې وسله‌والې ډلې نه دی منلی.

ژان ژاک روسو او پارلمان| جنرال دولت وزیري

0

د پارلمان د جوړښت، مسوولیتونو، تاسیس او نورو اړخونو په اړه ډېرو کسانو لیکنې کړي، چې د بېلابېلو نظریاتو په رڼا کې د دې موضوع څېړل، زموږ له فکري پراختیا سره مرسته کوي.

ژان ژاک روسو – ۱۷۱۲ – ۱۷۷۸ (په فرانسوۍ کې Jean-Jacques Rousseau) د سویس هیواد په ژنیو/جنیوا ښار کې چې هغه وخت مستقل دولت و، زیږیدلی دی.

ده د کوچنيوالي پر مهال له کړاوونو ډک ژوند درلود، خو له ټولو ستونزو سره- سره ده له مطالعې سره ډېره مينه درلوده او په دې لار کې يې ډېر پرمختګ وکړ او حتی ستر فيلسوف ترې جوړ او ډېر کتابونه يې ولیکل. دغه فیلسوف او متفکر ځینې داسې ویناوې او طرحې لري، چې اوس هم د حکومتونو مشران ورڅخه ګټه اخلي. خلکو ته سوچ ورکوي او د سیاست تیاره اړخونه بیانوي.

 ده به ویل:

«که يو ملت د ناچارۍ له مخې زور ته تابع شوی وي او د داړه مارانو اطاعت کوي. دا په دې مانا نه ده چې هر څه سم روان دي. کله چې بېوزلی ملت د ظلم او زور د زنځيرونو د شلولو توان په ځان کې وګوري، بې له ځنډه به دغه عمل چې د زنځيرونو شلول دي تر سره کوي. ځکه چې دغه ډول اطاعت د حق اطاعت نه بلکې د زور اطاعت دی.»

دي وايي:

«که داړه ماران حق لري چې په زور خلک د ځان تابع کړي، خلک هم حق لري چې د دوی له زوره ځان وژغوري.»

ژان ژاک روسو ليکي:

«له حکومتونو څخه د ټولنو اطاعت د زور په واسطه د ټولنو سپېڅلی حق نه دی، بلکې ټولنیز نظم د ټولو حقوقو بنسټ بلل کېږي او د ټولنې سپېڅلی حق جوړوي.»

د هر هېواد وګړي د حکومتونو او حکومتي مشرانو اطاعت ته اړ دي، هم قوانین دا غواړي، هم د هېوادونو خپلې ګټې. خو کله چې حکومتونه نه شي کولی خپل مسوولیتونه سم ترسره کړي، دا بیا د خلکو روا حق دی، چې اوسنیو غوښتنو او معیارونو ته په پام د حکومت ګرېوان ته لاس وغزوي او خپل حق ترې وغواړي، ځکه دا هرڅه په معاصرو قوانینو کې تشریح شوي دي.

دا يو منل شوی حقیقت دی چې د ازادۍ حس په هر انسان کې موجود وي او دا د بشر فطرت او طبیعت دی. کله چې انسانان د قانون اطاعت کوي، هغه د ځان د ساتنې قانون ګڼي او تر ټولو مخکې د ځان د ساتنې په هکله فکر کوي.

که چېرې په قانون کې د يوه شخص او ټولنې ازادیو او مدني حقوقو ته احترام نه وي شوی، تطبیقي جنبه به يې پر زور ولاړه وي، نو ځکه دا اطاعت بیا پایداره نه وي.

په دې هکله روسو وايي:

«په زندان کې هم زندانيان په ارامۍ ژوند تېروي، خو دا په دې مانا نه ده چې هغوی له ژوند څخه خوښ دي. که هره شېبه د دې موقع پيدا کړي چې له زندان څخه ووځي يوه شېبه هم نه ضایع کوي.»

 که په یوه ټولنه کې قانون د خلکو د عمومي ارادې څرګندوی وي، په هغه صورت کې قانون مقدس دی او په دغه حالت کې عدالت او خپلواکي د قانون زېږنده وي. په دې صورت کې یوازې د قانون موجودیت دی چې انسانان يو پر بل تېری نه کوي او د يوه او بل حقوقو ته په درنه سترګه ګوري.

که چېرې قانون د خلکو د عمومي ارادې څرګندوی نه وي او پر شخصي اراده بنا وي بيا دې ته د خلکو د ارادې قانون نه شو ویلای.

همدلته ده چی روسو د پارلمان او قانون جوړوونکو په هکله وايي:

«قانون جوړوونکي بايد سپېڅلي او د پوره فکر او لوړې پوهې څښتنان وي. که پارلمان د قانون په جوړولو کې د ټولنې عمومي اراده په پام کې ونیسي، په هغه صورت کې ټولنه قوي کېږي او ورسره پر مختګ کوي.»

دی زیاتوي:

«قانون جوړوونکي بايد هوښيار وي او د خلکو اړتياوې او هیلې ورمعلومې وي، او له دې سره ټول قوانين يې بايد د ټولني له عیني شرایطو سره برابر او سر وخوري.»

کله چې قانون جوړوونکي لومړی خپله قانون ته درناوی ونه کړي او لومړی یې پر ځان عملي نه کړي، پر ټولنه به یې څنګه عملي کوي؟

دی ليکي:

«د پارلمان غړي بايد له هوس او فساد څخه ليرې وي او د اوس له پاره د شهرت په فکر کې نه وي، بلکې دوی باید يوې پېړۍ وروسته د خلکو له خوا د خپل ځان په هکله د مثبت قصاوت په تمه وي.»

ژان ژاک روسو وايي:

«قانون جوړوونکي د حاکمیت درلودونکي نه دي، بلکې د حاکمیت درلودونکي یوازې خلک دي او له خلکو د دې حاکميت اخیستل لويه جفا ده.»

په معاصره ټولنه کې هم معیار دا دی، چې اصلي واک له خلکو سره وي، دا خلک دي چې د غوره حکومت په ټاکلو کې رول لري او د قانون په رڼا کې یې حقونه تضمین شوي دي.

پورته سپارښتنې په هغه صورت کی پارلمان عملي کولای شي چې غړي يې د خلکو په اراده او ازادو رایو پارلمان ته راغلي وي او قوانین يې د خلکو د ارادې څرګندوی وي او داسې قوانين وي چې خلک يې د تطبيق تحمل ولري.

که پارلمان د خپلو شخصي ګټو او له حکومت سره په تقابل کې قوانين جوړوي دوی د دې پر ځای چې ټولنې او هېواد ته ګټه نه رسوي، بلکې د دوی تائید شوي او تصویب شوي قوانين د ټولنې نظم له منځه وړي او ټولنه به د کړکېچ خوا ته رهنمايي کوي.

که قوانین ښه او د ټولنې په ګټه وي، کلونه څه چې پېړۍ- پېړۍ خلک د هغوی رعايت او د هغو قوانينو په رڼا کې ژوند کوي. اسلامي قوانين يې سترې بېلګې دي.

د افغانستان پارلمان ته که څه هم په هغو شرايطو برابر پارلمان نه شو ویلای، کوم ته چې روسو اشاره کړې ده. خو سره له ټولو کمزوریو خلک دوی ته د زړه نه او يا د مجبوريت له مخې د خلکو استازي وايي.

دوی ته اړينه ده چې لږ تر لږه د خلکو ارادې په پام کې وساتي او له حکومت سره له تقابل څخه ځان وساتي.

دوی کولای شي چې په لانجمنو مسالو کې د تفاهم له لارې له حکومت سره خپلې لانجې حل او د ملت په ګټه فضا رامنځته کړي.

په دې وروستیو کې د پارلمان له خوا د بودجې تائید يوه لانجمنه مساله ګرځېدلې ده. د پارلمان غړي دې د شرايطو او د هېواد اقتصادي او نظامي وضعي ته په کتو سره پرېکړې وکړي او حکومت دې هم هغه څه چې د ټولنې ریښې وچوي، په له منځه وړلو کې ځنډ نه کوي.

په پارلمان کې دې پر هیواد مین استازي د شخصي ګټو، شهرت او سلیقوي چلندونو څخه تېر او د هېواد د درې واړو قواوو تر منځ دې د هېواد په ګټه یووالي ته ژمن اوسي او په دې لار کې دې خپلې هڅی نه سپموي.

یادښت:

په دې لیکنه کې له «سیاسي نظريات» کتاب څخه چې د محمد نادر ايوبي کندهاری ليکنه ده ګټه پورته شوې ده.

که عبدالرووف ونه ژغورل شو، د بلخ چارواکي به له دندو ګوښه شي

0

(تاند، یکشنبه، د جدي ۲۸) ولسمشر محمد اشرف غني د بلخ ولایت امنیتي چارواکو ته خبرداری ورکړی، که د عبدالرووف په نوم تښتول شوی، ماشوم یې د تښتونکو له چنګه ونه ژغوره، نو ټول به له دندو ګوښه کړي.
د ولسمشرۍ ماڼۍ مرستیال ویاند دواخان مینه پال، رسنیو ته په یوه استول شوې ويډیو کې ویلي: “ د افغانستان ولسمشر، د عبدالرووف قضیه په خپله تعقیبوي او د بلخ ولایت ټولو امنیتي چارواکو ته یې خبرداری ورکړی، چې ژر تر ژره دې دغه ماشوم پیدا او خپلې کورنۍ ته دې وسپاري.”

په همدې حال کې بیا نن سهار د ولسمشر لومړي مرستیال امرالله صالح د شپږنیمو بجو د غونډې په راپور کې لیکلي و، چې په بلخ کې د تښتول شوي ماشوم له کورنۍ سره یې لیدلي او تر راتلونکو ۱۵ ورځو پورې به یې په خپلو هڅو پیدا او وژغوري.

عبدالرووف هغه ۹کلن ماشوم دی، چې شاوخوا درې میاشتې وړاندې په بلخ ولایت کې د انسان تښتونکو له لوري نامالوم لوري ته وړل شوی دی، چې لا یې هم امنیتي چارواکي په پیدا کولو نه دي بریالي شوي. د عبدالرووف د کورنۍ غړو له تیرو دوه میاشتو راهیسې د بلخ ولایت مقام مخې ته پرلت کړی و، ترڅو یې حکومت ورسره په پیدا کولو او ژغورلو کې مرسته وکړي.

د تښتول شوي ماشوم کورنۍ همدا تیره اونۍ په مزارشریف ښار کې د یو لاریون په ترڅ کې ویلي وو، چې که حکومت یې ماشوم زوی پیدا نکړي نو له طالبانو څخه به یې په پیدا کولو کې مرسته وغواړي.

تښتونکي د عبدالرووف له پلار څخه زیاته اندازې پیسې غواړي، چې د نوموړي په خبره په توان کې یې نشته.

امریکا: امارات او بحرین زموږ امنیتي شریکان دي

0

تاند(یکشنبه، د جدي ۲۸) د امریکا د بهرینو چارو وزارت اعلان کړی چې متحده عربي امارت او بحرین د دوی ستر امنیتي شریکان دي.

د امریکا د بهرنیو چارو له وزارت په خپره شوې خبرپاڼه کې راغلي، متحده عربي امارات او بحرین په سیمه کې د زرګونو امریکایي سرتېرو کوربانه دي او د افراطیت د مخنیوي لپاره یې خپله ژمنتیا ښودلې ده.

خبرپاڼه کې راغلي، له دې اعلان سره به امریکا له یادو دواړو هېوادونو سره د ملګرتیا نوی پړاو پرانیزي او په باور یې په اقتصادي او امنیتي همکاریو کې به یو بل ته ژمن وي.

بحرین او متحده عربي امارات هغه هېوادونو دي چې د امریکا په وړاندیز یې له اسرائیلو سره خپلې سیاسي اړیکې عادي کړې.

تر دوی وړاندې د عربي هېوادونو له ډلې مصر او اردن له اسرائیلو سره اړیکې عادي کړې وي چې د ګڼو اسلامي هېوادونو غبرګونونه یې هم را پارولي وو.

ایران پر یادو هېوادونو سختې نیوکې کړې وې او له اسرائیلو سره د فلسطین  پر معاملې تورن کړل، بل خوا فلسطین هم د اسرائیلو اماراتو او بحرین ترمنځ د اړیکو پر عادي کېدو غبرګون ښودلی و او په کلکو ټکو یې غندلي وو.

د ملي دفاع وزارت: کندهار کې ۳۰ طالبان وژل شوي

0

تاند (یکشنبه د جدي ۲۸) د افغانستان د ملي دفاع وزارت په کندهار ولایت کې د ۳۴ وسله والو طالبانو د مرګ ژوبلې خبر ورکوي.

د دفاع وزارت نن یکشبنه د یوې خبرپاڼې په خپرولو سره ویلي، طالبانو پرون په شاولي کوټ او ژېړۍ ولسوالیو کې د افغان ځواکونو پر پوستو د برید پلان درلود.

په خبرپاڼه کې راغلي، افغان امنیتي او دفاعي ځواکونه په طالبانو وار ړومبی کړی او د فعالې دفاع په چوکاټ کې یې په نښه کړي، چې ۳۰ تنه یې وژل شوي او ۴ نور ټپیان دي.

سرچینې دغه راز زیاته کړې، امنیتي ځواکونو د طالبانو درې پټنځایونه، یو شمېر سپکې او درنې وسلې او مهمات هم له منځه وړي دي.

طالبانو تر اوسه په دې اړه څه نه دي ویلي.

د یادونې وړ ده چې په دې وروستیو څو میاشتو کې په کندهار کې د افغان ځواکونو او طالبانو تر منځ نښتې زیاتې شوې چې ډېر کله د درنې مرګ ژوبلې راپورنه ورکول کېږي.

راحلې دوستم د مشرانو جرګې د غړې په توګه لوړه وکړه

0
رشیده دوستم

تاند (یکشنبه د جدي ۲۸) د مارشال عبدالرشيد دوستم لور راحلې دوستم د مشرانو جرګې د غړې په توګه نن یکشنبه د لوړې مراسم ترسره کړل.

راحله دوستم څو ورځې وړاندې د ولسمشر غني له لوري د مشرانو جرګې د انتصابي سناتورې په توګه ټاکل شوې وه.

د ولسمشر غني له دې پرېکړې وروسته چې مېرمن دوستم یې د مشرانو جرګې د سناتورې په توګه وټاکله، د ټولنیزو رسنیو د فعالانو سربېره یې د یو شمېر چارواکو غبرګونونه هم له ځانه سره لرل.

د ځینو چارواکو او ټولنیزو فعالانو په وینا په اوسني وخت کې قربانۍ یو څوک ورکوي، خو امتیازات نورو ته ورکول کېږي.

د مشرانو جرګې د انتصابي سناتورې په توګه د راحلې دوستم تر ټاکل کېدو وروسته ولسمشر اشرف غني د روانې جدي میاشتې په ۱۸ نېټه د دولتي پلاوي په ملتیا د ننګرهار د عمومي وضعیت ارزونې په موخه دغه ولایت ته سفر وکړ او هلته یې د ځايي چارواکو په ګډون د ټولنې له بېلابېلو قشرونو سره له نژدې وکتل او د هغوی ستونزې یې واورېدې.

په دې ناسته کې د ننګرهار د ولایتي شورا پخواني غړي ذبیح الله زمري وویل، د ننګرهار ولسونو تل د شته نظام د بقاء لپاره قرباني ورکړې خو خدمت ورته نه دی شوی.

نوموړي په مشرانو جرګه کې د انصابي سناتورې په توګه د راحلې دوستم ټاکل کېدو ته په اشارې او ولسمشر ته په خطاب کې وویل: «که د نظام دفاع یو مونږ یې کوو، خو تاسو بیا برعکس نور کارونه هم کوۍ جناب جلاالتماب ولسمشر صیب! مارشالي ورکوۍ دوستم، د مرکچي پلاوي غړیتوب ورکوئ باتور دوستم ته، او انتصابي سناتوره کوې راحله دوستم، دا مونږ پنجابیان یو؟»

اخوا بیا د ولسي جرګې یو شمېر غړیو هم څو ورځې وړاندې په خپلو څرګندونو کې وویل چې ولسمشر ځيني کارونه د خپلو شخصي ګټو په خاطر کوي او د ولسونو پرېکړې ورته ارزښت نه لري.

ښاغلي غني ننګرهار ته د وروستي سفر پر مهال یو ځل بیا ددغه ولایت له ولسونو سره خپلې ژمنې تازه کړې او له دوی څخه یې د عملي کولو لپاره یوه میاشت وخت واخیست.

نوموړي وویل چې یوه میاشت وروسته به بیا دغه ولایت ته سفر کوي او خلکو ته به وښيي چې له دوی سره د کړیو ژمنو له ډلې یې کومه یې د عملي کېدو او کومه یې نه ده.

حمدالله محب د یو لوړپوړي پلاوي په مشري هلمند ته لاړ

0

(تاند، یکشنبه، جدي ۲۸) د افغانستان د ملي امنیت شورا سلاکار ډاکټر حمدالله محب نن سهار د یو لوړپوړي حکومتي پلاوي په مشري هلمند ولایت ته په سفر لاړ.

له امنیت شورا څخه په خپره شوې خبرپاڼه کې ویل شوي: “ډاکټر محب به په دغه سفر کې د هلمند، کندهار، زابل، ارزګان، ډایکنډي او نیمروز ولایتونو له والیانو او نظامي مسؤولانو سره وګوري او د دغو ولایتونو د عمومي امنیتي وضعیت ارزونه به وکړي.”

په خبرپانه کې راغلي، چې د ملي امنیت شورا سلاکار به د ۲۱۵ میوند او ۲۰۵ اتل قول اردوګانو د امنیتي راپورونو د ارزونې تر څنګ له امنیتي او دفاعي سرتېریو سره هم وګوري او د هغوی ستونزې او غوښتنې به واوري.

حمدالله محب همدا تیره ورځ د هېواد شمال بلخ او له هغې بیا دوه ورځې وړاندې، ختيځو ولایتونو ته په سفر تللی و، چې په امنیتي برخه کې ځینې تازه ګمارنې هم وکړې.

نوموړي پرون په شاهین قول اردو کې افغان ځواکونو ته په خبرو کې ویلي وو، چې د طالبانو له لوري د اوسني نظام پر وړاندې د دوی جګړه ناروا او باطله ده، ځکه د نړۍ په کچه دیني علماوو یې د رد فتواوې ورکړي دي.

د امنیتي چارو شنونکي، د محب وروستي سفرونه ګټور بولي او په خبره یې، چې په لرې پرتو ولایتونو کې د امنیتي ځواکونو پوښتنه، د چارو ارزونه او ستاینه د دوی د روحیې له پیاوړي کیدو سره مرسته کوي.