شنبه, جنوري 23, 2021
Home خبرونه ولسمشر غني: پر هلمند برید به د طالبانو لپاره ډېر سخت تمام...

ولسمشر غني: پر هلمند برید به د طالبانو لپاره ډېر سخت تمام شي

تاند (دوشنبه د میزان ۲۱) ولسمشر اشرف غني وايي، پر هلمند ولایت برید به د وسله والو طالبانو لپاره ډېر سخت تمام شي.

د هلمند والي جنرال محمد یاسین خان پر خپله رسمي فېسبوک پاڼه لیکلي، چې ولسمشر غني نن دوشنبه ورسره ټلیفوني خبرې کړي او د هلمند د امنیتي وضعیت په اړه یې ورته د مرکزي دولت د بشپړې پاملرنې ډاډ ورکړی دی.

په دې ټلیفوني خبرو کې ښاغلي غني امنیتي ادارو ته امر کړی چې د هلمند وضعیت په جدي توګه وڅاري او د هر ډول اړین غبرګون او اقدام لپاره تیار وي.

د هلمند د والي په خبره چې اوسمهال افغان ځواکونه پیاوړي دي او د طالبانو دغه ډول بریدونه به بریالي نه شي.

په ورته مهال د هلمند د ولایتي شورا غړی عبدالمجید اخوندزاده له رسنیو سره په خبرو کې ویلي، چې طالبانو هلمند کې د برېښنا سب سټېشن چې پر جوړولو یې زیات لګښت شوی و،  ځینو برخو ته اور اچولی او نور ټول چور شوی دی.

بلخوا امنیتي چارواکو ویلي، په هلمند کې د طالبانو تر فعالیتونو وروسته تازه دمي افغان ځواکونه او نظامي تجهیزات ددغه ولایت مرکز لښکرګاه ته رسیدلي او د هوا او ځمکې له لارې یې تصفیوي عملیات پیل کړي دي.

د هلمند ځايي چارواکي بیا وایي چې تېره شپه بهرنیو ځواکونو هم پر طالبانو د هوا له لارې بریدونه کړي دي.

د کورنیو چارو وزارت د یوې خبرپاڼې په خپرولو سره ویلي، چې په دې بریدونو کې د دولت لسګونه مخالفین وژل شوي دي.

2 COMMENTS

  1. د هلمند جنګ د افغانستان د اسلامي جمهوریت او ټالبانو ترمنځ ټاکونکی رول لري .
    لکه څنګه چې د شورویانو تروتلو وروسته مجاهدینو ، آی اس آی او پنجاب فکر کاوو چې په یو دوه ورځو کې به د جلال آباد ښار اشغال او له هغه ځایه به د مجاهدینو په نوم عبوري حکومت په خپل کار پیل وکړي ، خو کرنیل امام اود استاد رباني استاد او مشارور جنرال حمیدګل دا خوبونه له ځان سره د دوزخ سرو لمبو ته یو ړل .
    اوس هم د افغانستان خلک او دولت باید د پنجاب دغو شومو توطئو او دسیسو ته په مېړانه ځواب ورکړي .
    بری تل د حق په لوري وي . د افغانستان خلک له خپل ولس ، خاورې ، د حقیقي اسلام او افغاني ارزښتونو نه دفاع کوي .
    آی اس آی ، پنجابیان او د قرون وسطی په خوب ویده د هغوی ټالبي مزدوران زمونږ د خاورې دښمنان دي . په هلمند کې د برښنا سب ستېشن او تجهیزاتو چورکول او پاتې نورو ته اور اچول ، د لویو لاروو ورانول ، د ښوونځیو سوځول ، د تریاکو او نورو مخدره موادو کښت او قاچاق د دوی ښې بېلګې دي .

LEAVE A REPLY

Please enter your comment!
Please enter your name here

- Advertisment -

ادب