پنجشنبه, جنوري 28, 2021
Home خبرونه د پروان خلک د غیرقانوني کان کیندونکو پر وړاندې راپورته شول

د پروان خلک د غیرقانوني کان کیندونکو پر وړاندې راپورته شول

تاند، شنبه د سنبلې ۲۹مه: د پروان په کوه صافي ولسوالۍ کې په غیر قانوني توګه کان کیندنې د ځايي خلکو غبرګونونه راپارولي دي.

د پروان ځايي چارواکي وايي، تر دې وروسته به هېچاته په دغه ولایت کې د غیر قانوني کان کیندنې اجازه ورنکړي.

د دغه ولایت د کانونو ریاست مسؤلین وايي، یواځې هغه کسان کانونه استخراج کولی شي چې قانوني جواز ولري.

د معلوماتو له مخې د کرومایټ دغه کانونه لس کاله وړاندې د پروان د کوه صافي ولسوالۍ اړوند آخوندزادګان کلي کې کشف شوي چې له هماغه وخته په غیر کانوني توګه استخراج کېږي.

د ولسي خلکو په خبره چې ددغو کانونو په استخراج کې زورواکي لاس لري.

د کوه صافي ولسوالۍ یو تن قومي مشر حاجي ولي الله وايي، دا معدن د یوه زورواکي له خوا کیندل کېږي.

که څه هم د زورواکي د هویت په اړه معلومات نه دي ورکړل شوي، خو سیمه ییز خلک وايي که تر دې وروسته هر څوک دغه کړنه تر سره کړي، دوی به یې پر وړاندې ودرېږي.

د پروان د کانونو ادارې رئیس عبدالاحد حسرت وايي، دوی ددغه معدن د یوې کوچنۍ برخې قرارداد له یوه شرکت سره لاسلیک کړی دی، خو په خبره یې یواځې هغه چاته به یې د استخراج اجازه ورکړي چې له دوی سره یې قرارداد شوی وي.

د کرومايټ قیمتي ډبره له ۱۹۵۰ کال راهیسې په افغانستان کې کشف او په خوست، وردک، لوګر او کابل ولایتونو کې یې کانونه شته چې پاکستان ته قاچاق کېږي.

1 COMMENT

LEAVE A REPLY

Please enter your comment!
Please enter your name here

- Advertisment -

ادب