دوشنبه, جنوري 18, 2021
Home خبرونه د شمالي ولایتونو طالبانو له پاکستانه د خپل یوه مشر قوماندان د...

د شمالي ولایتونو طالبانو له پاکستانه د خپل یوه مشر قوماندان د خوشي کېدو غوښتنه وکړه

تاند- چهارشنبه، د قوس۱۲) د افغانستان په شمال کې د طالبانو د نظامي محاذونو قوماندانانو په یوه اعلامیه کې له پاکستانه غوښتي چې د دوی مهم قوماندان قاري صلاح الدین خوشي کړي.

د شمالي ولایتونو (سمت شمال) د نظامي محاذونو د قوماندانانو او مسوولانو له خوا په یوه خپره شوې اعلامیه کې، چې تاند ته یې راستولې ویل شوي چې پاکستان د افغانستان د شمال د لسګونو محاذونو قوماندان قاري صلاح الدین د روانې اوونۍ د شنبې په ورځ د ماسپښین په یوه بجه په کوټې ښار کې نیولی او تر دې دمه بې درکه دی.

په خبرپاڼه کې راغلي«قاري صلاح الدین د افغانستان په شمال کې د اسلامي امارت له بانفوذه قومندانانو څخه دی چې د لسګونو نظامي محاذونو او ډلګیو مسوولیت په غاړه لري. قاري صلاح الدین د دې تر څنګ چې د سولې د روانې پروسې له ملاتړو څخه دی، د امارت په ځینو چارو او کړنو نیوکې لري او د اصلاحاتو غوښتونکی دی.

صلاح الدین د تېرې شنبې د سهار یوه بجه (د نومبر ۲۸مه) د پاکستان په کوټه ښار کې د پاکستاني امنیتي کسانو له خوا نیول شوی دی او تر دې دمه نادرکه دی.»

د راپورونو له مخې، تر دې پخوا هم پاکستان د طالبانو د قطر د دفتر د اوسني مشر ملابرادر په ګډون ګڼ طالب قوماندان، چې سولې ته یې لېوالتیا ښوولې نیولي او اکثره یې د تل لپاره تري تم کړي دي.

د افغانستان په شمال کې د طالبانو د محاذونو د قوماندانانو او مسوولانو په اعلامیه کې هم د سولې پروسې ته په اشارې ویل شوي«د قاري صلاح الدین اړوند ټول نظامي او ملکي مسوولین د پاکستاني مقاماتو له خوا د هغه نیول کېدل یوه غلط فهمي ګڼي او له هغوی څخه غواړي چې د نوموړي د تعذیب او شکنجې څخه ډډه وکړي او بې له ځنډه یې خوشې کړي؛ ځکه په دې حساس وخت کې د هغه نیول کېدل به د هېواد د سولې پروسه له ننګونو سره مخ کړي.»

د طالبانو رسمي ویندویانو او د قطر دفتر تراوسه پورې په دې اړه څه نه دي ویلي.

LEAVE A REPLY

Please enter your comment!
Please enter your name here

- Advertisment -

ادب