شنبه, جنوري 16, 2021
Home خبرونه استرالیایي پوځیانو ۳۹ بندیان او افغان ملکي وګړي وژلي؛ لومړي وزیر یې...

استرالیایي پوځیانو ۳۹ بندیان او افغان ملکي وګړي وژلي؛ لومړي وزیر یې بښنه غوښتې

تاند (پنجشنبه د عقرب ۲۹) ولسمشر محمد اشرف غني د استرالیا له لومړي وزیر سره تلېفوني خبرو کې په افغانستان کې د دغه هېواد د سرتېرو په جنګي جنایتونو خواشیني ښودلې ده.

په دغه تلېفوني مکالمه کې، د استرالیا لومړي وزیر ولسمشر غني ته ډاډ ورکړی چې د هغوی څېړنې به په ښه توګه تر سره او عدالت تامین شي.

د استرالیا د بهرنیو چارو وزارت بیا د افغانستان د بهرنیو چارو وزارت ته په دې اړه په استول شوي لیک کې د افغان حکومت څخه د خپلو عسکرو د دغه ناوړه چلند بښنه غوښتې او د خپلو امنیتي ځواکونو په لیکو کې یې د اصلاحاتو راوړلو یادونه یې کړې ده.

په لیک کې ویل شوي، د دغه ناوړه چلند څېړنو څلور کاله دوام وکړ او استرالیا کاملا دا تعهد لري چې د دغو مرتکبینو د عدلي او قضايي تعقیب راپور به ژر د یاد هیواد د عدلي او قضایي سیستم له لوري خپور کړي.

بلخوا د استراليايي ځواکونو د جنګي جنایتونو په اړه وروستۍ څېړنې ښيي، چې دغو پوځیانو په افغانستان کې ۳۹ بندیان او افغان ملکي وګړي په غیر قانوني توګه وژلي دي.

دغه څېړنه چې د استرالیا د دفاعي ځواکونو د تفتیش ادارې له ‌خوا ترسره شوې، په‌ کې ۵۷ پېښې څېړل شوي او له ۴۰۰ زیاتو شاهدانو سره خبرې شوې دي.

د څېړنې پر اساس استرالیایي پوځیانو په افغانستان کې د ۲۰۰۵ او ۲۰۱۶ کلونو ترمنځ غیر قانوني وژنې او له بندیانو سره غیر انساني چلند کړی دی.

LEAVE A REPLY

Please enter your comment!
Please enter your name here

- Advertisment -

ادب