Categories

اعلان

Loading…

که چېرې سوله راغله | احدګل خادم

که رښتيا سوله راغله زه بل ځای نه، يواځې د خپل پلار او نيکه کلي (سنګانۍ) ته ځم. هغه کلی چې نږدې اوه کاله کيږي، د ناترسه خلکو له لاسه ما بيا نه دی ليدلی.


لومړی د سولې د ارمانجن خپل شهيد پلار او دواړو ميندو (مورګانو) قبرونو ته ځم. هغوی ته ښه زړه سپکوم او ورته وايم چې ستاسو بيلتون نور نشم زغملی.


پلار ته مې د سولې د راتګ مبارکي هم ورکوم او ورته وايم چې ستا هغه ارمان چې د کلونو کلونو راهيسې دې ورته انتظار کولو پوره شو.
زما د هغې مور قبر ته د خپلې بې وسۍ کيسه کوم چې د وخت د جبر له امله يې ما په جنازه کې ګډون ونشو کړای.
خپلې قلعه ته ځم. د مور او پلار غږونو پسې د قلعه ټولې کوټې او کونجونه ګورم. د مور او پلار يادونو ته په چيغو چيغو ژاړم. داسې ورته وايم:


يوځلې بيا په دې لار راشئ!


په پخوانيو پلونو مو پريوتل ګردونه


د پخوا په څېر د بام سر ته خېژم، د قلعه په ديوال کينم او د ښکته ټولې شنې سيمې ننداره کوم. په ديره کې د انګورو تاک لاندې يوه شېبه کينم. د پلار په لاس کينول شوي باغ کې په هره ونه ګرځم او دا متل ورته وايم: باغ چې پوخ شي، باغوان يې کوږ شي.


زما د پلار په وسيله جوړ شوي ښوونځي او دندې ځای (د سنګانۍ منځني ښوونځي) ته ځم او هلته دښوونکو او زده کوونکو سره خامخا ګورم. هلته به د پخوا په څېر د پلار د موجوديت احساس کوم او ټولګي کې به درس ورکوم او داسې بيتونه به خامخا په ژبه راځي:


يو څوک دی چې مې هر وخت په خيالونو کې اوسيږي

يو څوک دی چې دا ژوند راته روښان ساتي قسم دی


د هغو ټولو خپلوانو او کليوالو کورونو ته ورځم، چې د کلونو راهيسې ما ندي ليدلي. د هغوی خبرې به د زړه په غوږونو اورم. هغوی به خامخا راته په کلي د شوي وحشت کيسې کوي.

 ځان سره به د سولې او د تېرو خاطرو اړوند بيتونه زمزمه کوم او د کلي په لارو او کوڅو، لوړو او ژورو او پټيو کې به مست ګرځم.


د اجمل اټک يوسفزي دا بيتونه به تکراروم:


کله يادګارونو ته ښه وژاړم


خپلو ارمانونو ته ښه وژاړم


وګرځم په پنډ د خاطرو کې زه


ګورمه ګلونو ته ښه وژاړم


په ډوډۍ کې به يواځې وطني سابه او تروې (شوملې) نوش جان کوم. يواځې د څېړيو د لرګي په اور او د سپين غره په اوبو کې شوی چای به څښم. اودس به د سپين غره څخه د راغلې ويالې په يخو اوبو کې کوم. د مازديګر لمانځه لپاره به خپل په اوږه پروت څادر د خپل پټي په پوله اچوم او په هغې به د خدای په لورې ودريږم.


انقلاب پاشلي د کرکټ پخواني ملګري به لټوم، که نه وو، اوسني خو به وي، هغوی سره به د خوړ غاړې ته ځم او هلته به ورسره يوه ښه چيلينجي سيالي کوم.


د ماښام لمونځ د کلي په جومات کې کوم او د لمانځه نه وروسته د ملا صېب او کليوالو سره لنډ مجلس کوم. جومات به خامخا د 

کليوالو نه ډک وي، ځکه چې دا به جګړې وخت نه وي، په سيمه کې به سرتاسري سوله وي.


خپل خپلوان او کليوال به د شپې ښه ټينګه بلنه راکوي، خو زه به خپلې قلعه ته د تللو لپاره ټينګار کوم. د شپې به خپلې قلعه ته راشم، تر ډوډۍ او لمانځه وروسته به د قلعه په منځ کې په ارام زړه د خوب تابيا نيسم او د ملنګ جان په دې بيت به څادر په ځان راکش کړم:


د محبوب وطن په غيږ کې ارام پروت يم


لکه طفل چې ويده د مور په غيږ وي

پای 

احدګل خادم

کجنګ، سيلنګور، ماليزيا، ۰۴/۱۲/۱۳۹۸

onesignal_meta_box_present:
onesignal_send_notification:
response_body:
{"id":"22b95568-51e2-4105-8ab6-be8d178caa3f","recipients":861,"external_id":"578415aa-5965-e336-2819-0f6be51553d2","warnings":["You must configure iOS notifications in your OneSignal settings if you wish to send messages to iOS users.","You must configure Android notifications in your OneSignal settings if you wish to send messages to Android users."]}
status:
200
recipients:
861

Leave a Reply

Your email address will not be published. Required fields are marked *

۸