خواله رسنۍTwitterFacebookPinterestGoogle+

په بدخشان کې د کبانو د نسل د ختمېدو وېره

خبریاله: عاقله اسد( شنبه د سرطان ۱۴) د خال دار کبانو نسل په بدخشان کې د له منځه تلو له خطر سره مخ دی.

کبان غوښه، چې د څېړنو پر اساس یې غوښه ډېره ګټوره ده، ډېر ډولونه لري.

په بدخشان کې هم راز راز کبان موندل کېږي او د دې ولایت د سړو سیمو په پاکو اوبو کې ژوند کوي.

د بدخشان ولایت یو شمېر اوسیدونکې، او د چاپیریال فعالان د کب د نسلونو د له منځه په خاطر اندېښنه لري او وايي چې جګړې دا خطر لا زیات کړی دی.

د دوی په وینا، کب نيونکي او د بدخشان اوسېدونکي د خالدار کب لپاره له لاسي بمونو، د د برېښنا له شارتۍ او همدارنګه له پاکستاني جالونو کار اخلي او دا کار د دې سبب شوى چې د کبانو نسل د محوه کېدو له خطر سره مخامخ شي.

د بدخشان د چاپیریال ساتنې د ادارې پخوانى رئيس غلام نبي سرفراز وايي، خالداره کبان چې پخوا په دې ولايت کې زيات موندل کېدل اوس خورا کم شوي دي.

سرفراز زیاتوي «د دې ډول کبانو نسل د دولت تر واک لاندې سيمو کې لکه په جرم ولسوالي کې ختم شوی دی، او کب نيونکي د کبانو د نيولو لپاره د طالبانو تر واک لاندې سيمو ته هم ځي.»

د هغه په خبره، په اوس وخت کې خالداره کبان شهدا، زيباک، جرم، خاش، کران ومنجان او يمګان ولسواليو په ډنډونو او لویو حوضونو کې موندل کېږي.

د زېباک ولسوالۍ اوسېدونکي وايي: «اوس کب نيونکي د خالداره کبانو د نيولو په خاطر د کبانو د اصلي اوسېدو ځاى ته ورځي او د خلکو علاقه مندي د خالداره کبانو له غوښې سره ډېره شوې ده، او په همدې خاطر کب نيونکي په بې درېغه ډول کبان نيسي.

له بله پلوه د بدخشان اوسېدونکي او د چاپیریال ساتنې د ادارې کارکوونکي او فعالان وايي، امنيتي ځواکونه هم د بدخشان په ولسواليو کې کبان نيسي.

په همدې حال کې د بدخشان د پوليسو وياند ثنا الله روحاني او د دويمې لوا د رسنيو د څانګې مسٶل عبدالمناف نظري د امنیتي ځواکونو له لوري د حيواناتو ښکار او د کبانو نيونه ردوي.

له بلې خوا د بدخشان د چاپیریال ساتنې رياست د طبيعي  ميراثونو د ساتنې څانګې عمومي مدير ضياءالحق کامران وايي، د کب نيونکو له خوا د خالداره کبانو نیونه، د زياتو سېلابونو د راتلو پر اساس د کبانو د هګيو اچولو ځايونه له منځه وړي دي، او د هغوى د نسل په له منځه وړلو کې هم اثر لري.

د وحشي حيواناتو په ښکار او د طبيعي منابعو د نه ساتنې له امله د بدخشان چارواکې له ډېرو انتقادونو سره مخ شوي دي.

د دې ولايت چارواکي تراوسه نه دي توانېدلى چې د وحشي حيواناتو د ښکار عاملان په سزا ورسوي او له ښکار څخه يې منع کړي.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *