پاکستان وايي، له افغانستان سره یې ټولې لارې پرانیستي دي

تاند(شنبه، د اسد۴) د افغانستان لپاره د پاکستان د صدراعظم ځانګړي استازي محمد صادق نن وویل، چې پر ډویورنډ کرښه ټولې ۵ لارې په وروستیو ورځو کې پرانیستل شوي او د سوداګري مالونو کانتینر پرې تګ راتګ کوي.

د پاکستاني اسوشیتیدپریس خبري اژانس د راپور له مخې، محمد صادق خان پر خپله ټویټرپاڼه کښلي، د تورخم، غلام خان، سپین بولدک- چمن، انګور اډه او خرلاچۍ لارې اوس پرانیستي دي او تګ راتګ پرې کېږي.

ده همداراز وویل چې حکومت یې هڅه کوي چې په ګمرکونو کې د تجارتي مالونو د محصول اجراات چټک شي او سوداګر ستونزې ونه لري.

پاکستان هر څه موده وروسته په یوه نه یوه پلمه د افغان سوداګرو پر مخ خپلې لارې بندوي چې له کبله یې افغان سوداګر هر کال سلګونه ملیون ډالر تاوان کوي.

خو له کله چې افغانستان د چاه بهار، ترکمنستان، ازبکستان او تاجکستان ترانزیتي لارې فعالې کړي، پاکستان د پخوا په پرتله د افغان سوداګرو د مالونو په وړاندې خنډونه کم کړي دي. دې هیواد په وروستیو ورځو کې هند ته د افغانستان د سوداګري مالونو پرمخ هم خپله پوله پرانیسته.

خپله تبصره ولیکئ

ستاسو برېښناليک به نه خپريږي. غوښتى ځایونه په نښه شوي *