خواله رسنۍTwitterFacebookPinterestGoogle+

ننګرهار کې د ترېشر جوړولو فابریکې مسؤلین منځنۍ اسیا ته د خپلو تولیداتو د لېږد هڅې کوي

تاند (شنبه، د اسد ۱۱) ننګرهار کې د ترېشر جوړولو فابریکه تر تاجکستان وروسته منځنۍ اسیا ته د خپلو تولیداتو د صادرولو په هڅه کې ده.

ننګرهار کې د جاوېد افغان فابريکې مسؤلین وايي روان کال يې تاجکستان ته ۲۰ ترېشرونه صادر کړي او هڅه کوي چې ۲۰۲۱ کال کې خپل توليدات د منځنۍ اسيا نورو هيوادونو ته هم ولېږي.

د ننګرهار ولایت له مطبوعاتي دفتره په خپره شوې خبرپاڼه کې راغلي چې د افغانستان تولید دغه ترېشرونه به راروان کال ازبکستان، ترکمنستان او قرغزستان هېوادونه ته ور ولېږدول شي.

د یادې فابریکې مسؤلین وايي که د قرنطین موده پای ته ورسېږي نو د بازار موندنې ډلې به دغو هېوادونو ته ولېږي او د نورو ترېشرو پلور ته به زمینه برابره کړي.

د جاوېد افغان په نوم فابریکې د مسؤلینو په خبره چې اوسمهال یې ۱۳۰ کسانو ته په مستقیم ډول د کار زمینه برابره کړې او پر دې سربېره یې د هېواد په ټولو لویو ښارونو کې د خرڅلاو په څانګو کې هم لسګونه کسان په کار بوخت دي.

جاوېد افغان فابريکه نه یواځې د غنمو ترېشر جوړوي بلکې پر دې سربېره د جوارو او وريجو ترېشرونه، د ټراکټور ټرالۍ او نور زراعتي سامانونه هم توليدوي.

په ورته مهال د افغانستان د مزدورانو اتحاديه وايي، د فابريکو جوړول د صنعت د پراختيا ترڅنګ د بې روزګارۍ د کچې کمښت کې هم ګټور تمامېدلی شي.

اوسمهال په ننګرهار کې لسګونه فابريکې په بېلا بېلو برخو کې تولیدات کوي چې سلګونه کسانو ته یې د کار زمینه برابره کړې ده.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *