خواله رسنۍTwitterFacebookPinterestGoogle+

مالیه وزارت له کابل ښاروالۍ د ډوډۍ د ویش بهیر حساب غواړي

تاند ( یکشنبه، د سرطان ۲۲) د افغانستان د مالیې وزارت له ښاروالیو په ځانګړي ډول د کابل له ښاروالۍ غواړي، چې د وچې ډوډۍ د ویش د بهیر حساب ورکړي.

د یاد وزارت د معلوماتو له مخې د قرنطین پر مهال په ټولو ولایتونو کې د وچې ډوډۍ د ویش لپاره ۲ میلیارده او ۲۱۸ میلیونه افغاني ځانګړې شوې وې.

دوی وایي د دې پيسو مسولین اوس ښاروالۍ دي او باید حساب یې ورکړي.

د مالیې وزارت ویاند شمروز خان مسجدي  وایي یوځې د کابل ښاروالۍ له یاد شمیر پیسو یو میلیارد او ۲۴۰ زره افغانۍ اخیستې وې.

مسجدي وایي د کابل ښاروالي چې تر دې وړاندې په ځلونو په پلازمېنه کې د وچې ډوډۍ د وېش په چاره کې په فساد تورنه شوې ده؛ وایي چې د اوړو یوه برخه یې نانوایانو ته ورکړې ده.

بل لورته د کابل ښاروالي مني چې تر اوسه د دغو لګښتونو د یوې برخې حساب څرګند نه دی.

ماليې وزارت وروسته له هغه له ښاروالیو د حساب غوښتنې پریکړه وکړه کله چې د قرنطین پرمهال د وچو ډوډیو د ویش په بهیر کې د فساد راپورونه خپاره شول.

د راپورونو له مخې کابل ښار کې د ډوډۍ د وېش په بهیر کې سلګونه مېلیونه افغانۍ غلا شوي دي.

کابل کې د امریکا شارژدافیر راس وېلسن هم د هغو راپورونو د څېړلو غوښتنه کړې، چې ګني د ډوډۍ په وېشلو کې فساد شوی.

وېلسن پر ټوېټر له افغان چارواکو غوښتي چې دا راپورونه وڅېړي، موندنې یې شریکې او عاملین یې ونیسي.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *