خواله رسنۍTwitterFacebookPinterestGoogle+

عمران خان: امریکا له افغانستانه د ځواکونو په ایستلو کې باید بیړه ونه کړي

تاند(یکشنبه، د میزان ۶) په داسې حال کې چې امریکا تر راتلونکي پسرلي پورې له افغانستانه خپل ټول پوځیان باسي، د پاکستان صدراعظم عمران خان وايي، امریکا باید د ځواکونو په ایستلو کې له بیړې کار وانخلي.

عمران خان واشنګټن پوسټ ورځپاڼې ته په یوه لیکنه کې ویلي چې له افغانستانه د امریکايي پوځیانو ژر وتل یو ناعاقلانه عمل دی.

دا په داسې حال کې ده چې تر دې وړاندې پاکستاني چارواکو په ځلونو ویلي چې د افغانستان مسله هغه مهال حل کېدای شي چې امریکايی پوځیان له افغانستانه ووځي.

عمران خان واشنګټن پوسټ ته په لېږلې لیکنه کې په قطر کې د افغانستان د حکومت او طالبانو ترمنځ خبرې، چې د سپټمبر په دوولسمه پیل شوې، د افغانستان او جنوبي اسیا لپاره یوه بې سارې هیله بللې ده.

امریکا غواړي چې په یوه میاشت کې په افغانستان کې د خپلو پوځیانو شمېر ۴ زره یا ۵ زرو ته راکم کړي. او له طالبانو سره د موافقې پر اساس تر راتلونکي پسرلي پورې ټول ځواکونه باسي.

عمران خان د افغانستان د سولې په خبرو کې د پاکستان د رول د ستاینې په ترڅ کې ویلي چې هیواد یې تل د سولې د پروسې لپاره د اسانتیا په رامنځته کولو کې مخکښ رول لوبولی دی.

ده همداراز لیکلي، د امریکا په شان پاکستان هم نه غواړي چې افغانستان بیا د تروریستانو پر ځالې بدل شي.

ده هیله څرګنده کړې چې د افغانستان حکومت هغه سیمې ونیسي چې تر کنټرول لاندې یې نه دي او تروریستان پرېنږدي چې په هیواد کې یې ځالې جوړې کړي.

خپله تبصره ولیکئ

ستاسو برېښناليک به نه خپريږي. غوښتى ځایونه په نښه شوي *