خواله رسنۍTwitterFacebookPinterestGoogle+

ایران له هراته د سروزرو د ایستلو لپاره افغان زرګرو ته امتیازونه ورکوي

تاند(سې شنبه، د عقرب ۶) د هرات والي وايي، یو ګاونډی هیواد په هرات کې د نا امنیو د زیاتوالي له لارې له دې ولایت څخه د سروزرو د ايستلو هڅه کوي.

والي سید وحید قتالي که څه هم د کوم ځانګړي هېواد نوم نه دی اخیستی، خو د هرات د زرګرانو اتحادیه وايي چې ایران هڅې پیل کړي چې افغان زرګرانو ته په خپله خاوره کې اسانتیاوې او د اوسېدو امکانات برابر کړي او لسګونه افغان زرګرانو خپل سره زر ایران ته وړي دي.

یو شمېر زرګران ادعا کوي چې لا هم له هرات څخه ایران ته د سرو زرو قاچاق دوام لري.

د وروستیو نا امنیو له کبله په هرات ولایت کې پانګه په ورکېدو ده او دې چارې اندېښنې راپورته کړې دي.

د سرو زرو یو شمېر کارو باریانو د نا امنیو له امله خپله پانګه له هرات نه ایستلې ده.

محمد شریف چې په دې ولایت کې د سرو زرو کاروبار کوي وایي:《زه زرګر وم، موږ دوکانونه درلودل خو وګواښل شو او لوټ شو. اوس هم یو په بل پسې ګواښل کېږو، مجبور یو هېواد پرېږدو.》

د زرګرانو له تېښتې سره د سرور زرو بیې هم لوړې شوي.
اوس د پخوا په پرتله د عربي زرو په هر ګرام کې ۸۰۰ افغانۍ زیاتوالی راغلی، دمګړۍ په هرات کې د عربي سرو زرو هر ګرام په ۴۰۰۰ افغانیو پلورل کیږي.

د هرات د سرو زرو د اتحادیې مشر، نثار احمد توکلي وايي چې د افغانستان ګاونډی ایران هڅه کوي چې د سرو زرو د کارکوونکو پام ځانته واړوي

نوموړی زیاتوي: 《هر وخت چې د سرو زرو کار یا پانګه ایران ته لېږدوي په ایران کې سخت هڅول کېږي او ښه راغلاست ورته ویل کېږي، د اقامت، کور، مکتب په شمول ټول امکانات راته برابروي.»

یو زرګر، چې نه یې غوښتل د موضوع د حساسیت له امله نوم یې واخیستل شي، ازادي راډیو ته وویل: 《 هره ورځ تر 30 کیلو ګرامه سره زر ایران ته قاچاق کیږي. دا لا څرګنده نه ده چې په ایران کې چیرته ځي.》

د هرات یو شمېر زرګرانو ازادي راډیو ته وویل، چې پر ایران د متحده ایالاتو د بندیزونو له بیا پیل سره اوس یاد هېواد زرو ته اړتیا لري او زیاتوي چې له هرات څخه ایران ته د ډالرو قاچاق هم ډیر شوی دی.

شاوخوا دوې اوونۍ وړاندې، د هرات والي وحید قتالي په هرات کې له صرافانو، کسبګرو او زرګرانو سره په ناسته کې پرته له دې چې د کوم ځانګړي هیواد نوم واخلي، یو ګاونډی هیواد، د وېرې او ترهې په رامنځته کولو سره له هرات څخه د سرو زرو او پانګو د ایستلو هڅه کوي.

په هرات کې د ایران د قونسلګرۍ مسولانو تر دې دمه په دې اړه څه نه دي ویلي.

د سرو زرو د اتحادیې د مسولانو په وینا هرات له کابل وروسته په افغانستان کې ډېر سره زر لري مګر دوی د امنیتي ګواښونو له امله د هرات د سر زرو اندازه نه ښيي.

Leave a Reply

Your email address will not be published. Required fields are marked *