له ماشومانو سره د کورني کار ترسره کولو لارښوونې

سرچینه: کیډز هیلت ټکی اورګ

ژباړه: حکمت سروش

له ماشومانو سره د کورني کار ترسره کولو لارښوونې

ماشومان هغه وخت ډېر بریالي وي، چې کله یې مېندې او پلرونه او یا هم د کورنۍ نور مشران د هغوی د کورني کار په ترسره کولو کې دلچسپي او ونډه واخلي.

دا کار ماشومانو ته ښيي دوی چې څه کوي مهم دي، او مشرانو ته ارزښت لري.

په کورني کار کې له ماشومانو سره مرسته دا مانا نه لري چې پر یوه مېز یا درس ځای کې دې له هغوی سره په ساعتونو وخت تېر شي.

مېندې او پلرونه کولای شي د خپلو ماشومانو درس ویلو چارې منظمې، د هغوی وړتیاوې مدیریت او یا هم د ستونزمنو پوښتنو او موضوع ګانو په حلولو کې مرستندوی اوسي. او یا هم یوازې خپل ماشومان وهڅوي چې د درس ویلو په منځ کې څه وخت دمه واخلي.

دا هم امکان لري چې مېندې او پلرونه له ماشومانو سره د کورني کار پر وخت خپله دوه درې ټکی زده کړي.

دلته یو څو لارښوونې تشریح کوو:

ښوونکي وپېژنئ، هغوی څه غواړي

د ښوونځي په پروګرامونو کې ګډون وکړئ، لکه د مور یا نورې ځانګړې ورځې، تر ټولو مهم په ښوونځي کې د والدینو په غونډه کې ګډون دی، تر څو د خپلو ماشومانو له ښوونکو سره ووینئ.

د هغوی د کورني کار د تګلارو په اړه پوښتنې وکړئ، او ځان ته مالومه کړئ چې تاسو باید له ماشومانو سره د کورني کار په ترسره کولو کې څنګه ونډه واخلئ.

د کورني کار لپاره یوه ارامه او دوستانه ساحه رامنځته کړئ

هڅه وکړئ چې ماشومانو ته د کورني کار د ترسره کولو لپاره یو مناسب ځای وټاکئ، د اړتیا وړ موادو لکه پاڼو، پنسیلونو، قلم کت او سریښو ته باید په اسانۍ لاس رسی په کې وشي.

د درس لپاره ځانګړی او منظم وخت وټاکئ

ځینې ماشومان د ماپښین له خوا ښه کار کولای شي، چې وروسته یې یو څه وخوري او لوبې کوي، ځینې بیا دا غوره بولي چې تر ماښامنۍ وروسته درس ووايي.

د مزاحمت مخه ونیسئ

د ماشومانو د کورني کار د ترسره کولو پر مهال باید ټلویزون، لوړه موسیقي او ټیلفون کول نه وي. خو که ماشوم مو غواړي چې د خپل ټولګیوال سره د کومې مسئلې په اړه پر ټلیفون خبرې وکړي، زمینه ورته برابره کړئ.

پرېږدئ چې ماشومان مو خپل کار پخپله وکړي

ماشومانو تر هغه زده کړه نه شي کولای، تر څو د خپل ځان لپاره پخپله فکر و نه کړي او خپلې تېروتنې جوړې نه کړي. مېندي او پلرونه کولای شي هغوی ته لارښوونه وکړي او لارې چارې ورته وښيي. خو دا خپله د ماشوم دنده ده چې باید زده کړه وکړي او درسونه یاد کړي.

هڅوونکي او څارونکي اوسئ

له خپلو ماشومانو څخه د هغوی د کورني کار او ازموینو په اړه پوښتنه وکړئ، ویې هڅوئ او وګورئ چې خپل کورني کارونه یې ترسره کړي دي، دا ورته وښایاست چې د دوی هر ډول پوښتنو او اندېښنو اورېدلو ته حاضر یاست.

ښه مثال واوسئ

ایا ستاسو ماشومانو تاسو لیدلي یاست چې څنګه خپل خرچه سنبالوئ او پیسې سپموئ، یا کتاب لولئ؟ ماشومان تر ډېره د مور او پلار د لارښوونو پر پرتله خپله د هغوی لاره خپلوي.

د ماشومانو د کار او هڅو ستاینه وکړئ

د کور پر المارۍ یا یخچال مو د ماشومانو کوم هنري کار، یا د ښې لاسته راوړنې انځور ولګوئ، له نورو دوستانو سره د خپلو ماشومانو د بریالیتوبونو او لاسته راوړنو په اړه یادونه وکړئ.

که مو ماشومان په کورني کار پرله پسې ستونزې لري، مرسته وغواړئ.

د ستونزو په اړه د خپلو ماشومانو له ښوونکو سره خبرې وکړئ، ځینې ماشومان د ټولګي د تختې په لیدلو کې ستونزې لري او عینکو ته اړتیا لري، ځینې بیا د زده کولو او پاملرنې کولو په برخه کې ارزونې او کتنې ته اړتیا لري.

Leave a Reply

Your email address will not be published. Required fields are marked *

Loading...