Categories

د ننګرهار خبرونه

پنچنشنبه/ نوومبر ۹/

د ننګرهار والي په مشرۍ مسؤلینو په اچین ولسوالۍ کې په بېلابېلو برخو کې د پرمختیایي او نورو پروژو د پلې کولو ژمنې وکړې .
سلاکار وزیر او د ننګرهار والي محمد ګلاب منګل په مشرۍ مسؤلینو ژمنه وکړه، چې په اچین ولسوالۍ کې به د روغتیا، کلیو پراختیا، پوهنې او ګڼ شمیر نورو برخو کې پرمختیایي او نورې پروژې پیل کړي .

یادو مسؤلینو چې د ولایت په مقام کې د لړم په ۱۸ مه د دې ولایت د اچین ولسوالۍ د مخورو سره ناسته درلوده، په ترڅ کې په بېلابېلو برخو کې د مخورو ستونزې واوریدې.

د اچین ولسوالۍ مخورو د خبرو پر مهال په یاده ولسوالۍ کې د دوه سوه پنځوس وچو شوو د پاکو اوبو څآه ګانو د بېرته فعالولو،شبږ دیرش ښوونځیو ته د ودانیو جوړولو،د جګړو له امله د تخریب شوو کورنو د بیارغونې،روغتیا،کلیو پراختیا او کرنې او مالدارۍ برخو کې د شته ستونزو د حل غوښتنې وکړې .

د دې ځآنګړې ناستې پر مهال د پوهنې سرپرست رئيس سید عیسی سادات وویل، په اچین ولسوالۍ کې ۴۷ بابه ښوونځي شتون لري ، چې په دې وروستیو کې د زده کوونکو د ستونزو د حل په موخه ۱۵ تجیرونه ورکړل شوي او هم ۱۹ زره زده کوونکو سره د قرطاسیه او نورو اړینو توکو مرسته شوې او ډاډ یې ورکړ،چې په راتلونکي نوي کال کې به د پنځو نویو ښوونځیو لپاره ودانۍ جوړې کړي او همدا راز یې د نجونو ښوونخیو په برخه کې د ستونزو د حل ژمنه وکړه.

دعامې روغتیا روغتیا رئیس ډاکترنجیب الله کاموال وویل، په اچین ولسوالۍ کې ۶ بابه روغتیايي مرکزونه او درې ګرځنده ټيمونه فعال دي ، چې د ۱۳ ښځينه و، په ګډون پنځوس تنه روغتیايي کار کوونکي په کې د خلکو په خدمت بوخت دي او ژمنه یې وکړه،چې په عبدالخیلو کلينک کې به نسائي ولادي څانګه فعاله او نوي کال کې به د سپین غر ولسوالۍ په مربوطاتو کې نوی کلینک جوړ کړي.

د کلیو او پراختیا رئیس مجیب الرحمن ضیاء وویل،اوسمهال د اچین ولسوالۍ په بیلابیلو سیمو کې د شاوخوا دیرش میلیونه افغانیو په ارزښت د بیارغونې پروژو چارې روانې دي ، چې په کې استنادي دیوالونه د اوبو لسګونه څاه ګانې او نورې شاملي دي،همدا راز یې د پاکو اوبو تخریب شوو څآه ګانو د بیا فعالولو په برخه کې د همکارۍ ژمنه وکړه.

د کرنې او مالدارۍ رئیس رفیع الله رحیمزي وویل، د اچین په ګډون د شپږو جګړو ځپلو ولسواليو لپاره یې د ننګرهار والي په هلو ځلو ۲۲ میلیونه امریکایي ډالرو په ارزښت پروژې منظور کړي،چې د کرنې او مالدارۍ اړوند بېلابېلو برخو کې به پروژې پلي کړي او هم یې د راتلوونکې کال په ترڅ کې په اچین ولسوالۍ کې د درې سربندونه د جوړلو څخه هم خبر ورکړ.

سلاکار وزیر او د ننګرهار والي محمد ګلاب منګل د خبرو پر مهال د سکتوري ادارو مسؤلینو ته سپارښتنه وکړه،چې د خپلو ژمنو د عملي کولو په موخه بېړني اقدامات ترسره کړي او په ټولو برخو کې د همکارۍ ډاډ ورکړ.

نوموړي زیاته کړه،د اچین ولسوالۍ ولسونو په سختو حالاتو کې زیاتې قربانۍ ورکړې،چې د دوی د سرښندنو او امنیتي ځواکونو د هلو ځلو په ترڅ کې په اچین ولسوالۍ کې امنیتي ساحه پراخه او خلکو ته په هوسا ډول د ژوند کولو زمینه برابره شوه .

هغه د اچین ولسونو ته ډاډ ورکړ،چې په راتلوونکې کې کال کې به ورته د پاکو اوبو پنځه شبکې ، د ښوونځیو پنځه نوې وداني او روغتیايي مرکزونه ورغول شي او هم به د کرنې او مالدارۍ په برخه ورته ګڼ شمیر پروژې پلي کړي.

د ننګرهار ولايت د برېښنا شرکت مسوولينو په ښار کې د يو شمېر هغه کسانو د برېښنا لينونه پرې کړل ،چې د برېښنا شرکت پوروړي و او خپل حسابونه يې نه و تصفيه کړي.
د ننګرهار ولايت د برېښنا شرکت مسوولينو نن چهار شنبه په جلا ل اباد ښار کې د يوه کمپاين په ترڅ کې د يو شمېر هغه سوداګرو او ښاريانو د برېښنا لاينونه پرې کړل ، چې د برېښنا شرکت پوروړي و او خپل حسابونه يې نه و تصفيه کړي.

د برېښنا شرکت رئيس اميد سبا وويل: د غه کمپاين يې د برېښنا شرکت عمومي رئيس او سلا کار وزير او ننګرهار والي په لارښوونه پيل کړی ،چې په وينا يې تر هغې به دوام وکړي ،څو ټول پوروړي برېښنا شرکت ته د برېښنا بيلونه وسپاري.

سبا وويل: يو شمېر دولتي ادارې ، چې په زياته اندازه د برېښنا شرکت پوروړې وې تر دا مهاله يې دوه سوه ديارلس ميليونه افغانۍ تحويل کړي ،چې دا لړۍ دوام لري.

د برېښنا شرکت رئيس وايي: هغه دولتي او غير دولتي ادارې او خلک ،چې د برېښنا شرکت پوروړې دي په درې کيشتونو کې به ترې پيسې تحويل کړي .
د ښار نړيواله ورځ د جلا ل اباد ښار والۍ له لوري د يو لړ مراسمو په ترڅ کې ونمانځل شوه.
د اکتوبر يو ديرشمه ، چې د ښار نړيوالې ورځې سره برابره ده ، نن چهار شنبه د جلا ل اباد ښار والۍ له لوري هم ياده ورځ د يوې غونډې په ترڅ کې ونمانځل شوه.

په همدې موخه د ښاروالۍ د غونډو په تالار کې جوړه شوې غونډه کې د ګذر وکيلانو، مدني فعالانو د دولتي او غير دولتي ادارو استازو ګډون کړی و.

د جلا ل اباد سرپرست ښاروال انجينر حکيم الدين عمر خيل د ښار د نړيوالې ورځې له امله ټولو ښاريانو ته د مبارکۍ ويلو ترڅنګ په ښاريانو غږ وکړ ،چې د ښار په پاکوالي ، ښاري نظم ټينګښت ، پراختيا او نورو برخو کې د ښار والۍ کار کوونکو سره خپله همکاري دوامداره وساتي.
عمر خيل ژمنه وکړه ، چې د ښاريانو پر مټ به د ښار د ښکلا او پراختيا لپاره پوره هڅې وکړي.

سرپرست ښاروال وويل: جلا ل ا باد ښار کلونه وړاندې د څلويښت زره کسانو لپاره جوړ شوی ، چې دا مهال پکې شاوخوا يو ميليون وګړي ژوند کوي.

د جوړې شوې غونډې پر مهال د ولايت پخواني مرستيال محمد حنيف ګرديوال، د اطلاعات او فرهنګ رئيس اورنګ صميم او څو تنو نورو د ښار نړيوالې ورځې له امله ښاريانو ته مبارکي ورکړه او ژمنه يې وکړه ، چې ښاريان به د عامه پوهاوي له لارې دې ته وهڅوي ،چې د ښار د پراختيا او ښکلا په برخو کې ښاروالۍ سره په ګډه کار وکړي.

وينا والو وويل: داچې ښار د ټولو ښاريانو ګډ کور دی نو په کار ده ،چې د نظم ټينګښت او ښکلا لپاره يې په ګډه لاس په کار شو.

د یو سرګروپ په ګډون ۹ وسله والو مخالفینو ته مرګ ژوبله واوښته.
ننګرهار ولایت په هسکه مینه،چپرهار او بټي کوټ ولسوالیو کې د تېرو څلرویشت ساعتونو پر مهال د بېلابېلو پېښو په ترڅ کې د یو سرګروپ په ګډون ۵ وسله وال مخالفین وژل شوي او ۴ نور ټپیان دي.

د هسکې مینې ولسوالۍ په پاس پاپین سیمه کې د بې پیلوټه الوتکې هوایي برید له امله یو داعش وسله وال وژل شوی او یو بل ټپي شوی دی،همدا راز د بټي کوټ ولسواسلۍ په مربوطاتو کې د وسله والو طالبانو او امنیتي منسوبینو ترمنځ د نښتې په ترڅ کې د سباون په نوم د وسله والو طالبانو یو سرګروپ وژل شوی دی .

د یو بل خبر له مخې د چپرهار ولسوالۍ په ملا قریې سیمه کې د داعش او وسله والو طالبانو نښته کړې،چې له امله یې درې وسله وال طالبان وژل شوي او درې نور ټپیان دي .
يو ماين لمنځه یوړل شو او يو شمېر وسلې ترلاسه شوې
ننګرهار ولايت مرکز جلال اباد ښار، روداتو او سره رود ولسواليو کې امنيتي مسئولينو په تيرو څلرويشتو ساعتونو کې د ګزمې او چاڼيزو عملياتو پر مهال يو ماين لمنځه يوړه او يو شمېر وسلې يې ترلاسه کړې
.
د معلوماتو له مخې د ننګرهار ولايت روداتو ولسوالۍ کابل کمپ سيمه کې تېره ورځ وسله والو مخالفينو د سړک پر غاړه يو ماين ځای پر ځای کړی و، چې تر چاودنې وړاندې کشف او لمنځه يوړل شو.

په ورته وخت کې پولیسو د سره رود او اچين ولسواليو په ګنده چشمو سيمه کې چاڼيز عمليات کړي چې په ترڅ کې يې دوه ميله تومانچې، يو ميل کلاشنکوف، يو شمېر دکلاشنکوف مرمۍ، يو بکسه د پيکا مرمۍ، پنځه د کلاشنکوف شاژورونه، يو ميل ټوپک، يوه ايکم مخابره، يو د دهشکې شريد او يوه د خود سازه ماينونو بطرۍ ترلاسه کړي دي.
د يو بل خبر له مخې پولیسو د جلال اباد ښار په مربوطاتو کې دوه تنه د مبايل د غلا په تور نيولي او تر پوښتنو لاندې دي.
په بهسودو کې اصلاحي شورا جوړه شوه.
ننګرهار ولايت بهسودو ولسوالۍ ميرانو کلي کې د ټولنې اصلاح او ښې حکومتوالۍ ته د زمينې برابرولو په موخه اصلاحي شورا رامنځته شوه.
د اصلاحي شورا په پرانیست غونډه کې يادې ولسوالۍ دمسؤلينو سربېره قومي مشرانو او ځوانانو برخه اخيستې وه.

د شورا مشر وايي، چې د شورا له جوړولو يې موخه په کلي کې دهوايي ډزو او دنشه يي توکو مخنيوی او ښې حکومتوالۍ ته دزمينې برابرول دي .

نوموړی وايي، چې دې سره به دکلي خلک منظم او د حکومتي پروژو پلي کېدوته هم زمينه برابره شي .

په همدې حال کې د بهسودو قومي مشرانو حاجي معراج او نعمت الله حليمي د ياد کلي پر يووالي خوښي وښوده او ترې ويې غوښتل چې دځوان کهول روزنې ته لومړيتوب ورکړي .

قومي مشرانو د بهسودو امنيتي وضعيت پر ښه والي ټينګار وکړ او ويې ويل، چې دبهسودو خلک د حکومت تابع او قانون منوونکي دي .
د بهسودو ولسوال حاجي محمد صديق دولتزي د يادې ولسوالۍ پر اوسيدونکو غږ وکړ، چې دپخوا په څېر حکومت سره خپلې همکارۍ ته دوام ورکړي.
دولتزي په داسې حال کې بسهودو ولسوالۍ ته د نورو پروژو دمنظورۍ ډاډ ورکړ، چې دامهال په ياده ولسوالۍ کې درې نوي وړې او غټې پروژې تر کارلاندې دي.

د بهسودو ولسوال دغه راز وويل، چې دامهال په دې ولسوالۍ کې تر نورو ډېرو ته د کار زمينه برابره ده او ژمن دی چې دنويو پروژو په پلي کېدو سره به پاتې بې کاره خلکو ته هم د کار زمينه برابره شي .

دولت زي همداراز پر شمشاد تلويزيون شوی بريد وغنده او عاملين يې دبيان ازادۍ دښمنان وبلل .
ننګرهار کې ۳۵۰ بې ځایه شوو او له کډوالۍ را ستنوو شوو کورنیو سره مرسته وشوه .
د ننګرهار ولایت کډوالو چارو ادارې په هلو ځلو او د مرستندویه ادارو له لورې د خوږیاڼو ولسوالۍ ۲۶۰ بې ځایه شوو کورنیو سره د څه باندې ۳ نیم میلیونه افغانیو نغدي او په سره رود ولسوالۍ کې له کډوالۍ را ستنوو شوو ۹۰ کورنیو سره د خوراکي توکو مرستې وشوې.

د دې ولایت د کډوالو او بېرته را ستنیدونکو چارو رئیس غلام حیدرفقیرزی وایي، له کډوالۍ څخه را ستنوو شوو نوي کورنیو ته یې په سرود ولسوالۍ کې د خوراک نړیوالې ادارې په مرسته د خوراکي توکو مرسته ورکړه،چې په کې هرې کورنۍ ته اوړه،غوړي،دال او مالګه ورکړله شوه.
د نوموړي په وینا د نن ورځې په ترح کې د NRC ادارې په مرسته د خوږیاڼو ولسوالۍ څخه چمتلې ښارګوټې ته را بې ځایه شوو کورنیو سره نغدي او غېرې خوراکي توکو مرسته وکړه .

د هغه د معلوماتو له مخې،هرې کورنۍ ته یې ۱۴،څوارلس زره افغانیو نغدي مرسته ورکړه او همدا راز یې یوسلو درې اتيا کورنېو ته د پخلنځي توکې او ۲۲ نورو کورنیو سره یې د خیمو مرسته هم وکړه .
د خوږياڼو بې ځایه شويو کورنيو سره د څه باندې درې نيم ميليونه افغانيو نغدي مرسته وشوه.
ننګرهار ولايت خوږياڼو ولسوالۍ ۲۶۲ بې ځايه شوو کورنيو سره د څه باندې درې نيم ميليونه افغانيو نغدي مرسته وشوه.

دغه کورنۍ چې د جګړو له امله چمتلې سيمې ته رابې ځايه شوي، د کډوالو چارو رياست په هڅو او د NRC مرستندويه ادارې په مالي ملاتړ نغدي او د غيرې خوراکي توکو مرسته ترسره شوه.

د ننګرهار کډوالو چارو رئيس غلام حيدر فقيرزى وايي،هرې کورنۍ ته څوارلس – څوارلس زره افغانۍ، له جملې ۱۸۳ کورنيو سره د اشپز خانې وسايلو او ۲۲ کورنيو سره د سرپناه لپاره د يوې – يوې خيمې مرسته وشوه.
نوموړي ډاډ څرګند کړ، چې له يادو کورنيو سره به په يو شمېر نورو برخو کې هم مرستې تر سره کړي.

Leave a Reply

Your email address will not be published. Required fields are marked *