Categories

اعلان

Loading…

د سیدمنتظرشاه هاشمي درې شعرونه

سيندگی(۱)   

له «لورا لورې» نه تنا شته

نه ورېږي ږلۍ،

نه د گلپاڼو پر مخ

شته د باران ها څپڅپاندې ښکالو

نه را ورېږي

د سړو واورو

سپين څکالي گلان

نه د بوډۍ د ټال د ليد په تمه

نيمزالې پيغلې تر ګودره راځي

هو،

روږدي شوي دي اوس

زموږ د پښت پر شنو فصلونو باندې

د اسمانلارې  

توندې توندې سيلۍ

د سرو سکروټو

سره ګلونه سپړي

او  

له تاوجن خوگلن يې

ورېځې راسپړي څانګې

هلته د سپينو سپينو زاڼو بچي

د غزني  په تم ولاړ سيندگي(۱) کې

سترګې پر لاره دي

وړې وزرې  څنډي

د خپلو ميندو د راتلو په تمه

زما د کلي کورکوړۍ کوترې

وزرونه لپه کړئ دعا وکړئ

چې  هسک راورانې نه کړي

د سپينو زاڼو سپينې

اوډلې ليکې

(۱) سيندگی: آب ايستاده، ولاړې اوبه، کوړم

د لارې سړی

چينې له شگو ډکې

شا او خوا پراته د منګوټو کودڼي

له  سرو شگلنو سغېدلو ډنډو

د  شنو کبوړو تاند لباندو

مړزگو وږم(۱) راځي.

ډکې ويالې له جلوهلو شنو اوبړيو ځنې

پکې ورستې دي د گلولو ولې  

ده د سرامنو(۲)اوښکو سرو نېزونو(۳)

له لارويو ورکه کړې لاره

گوندې را پېښ شي لکه خضر،

يو د لارې سړی

چې  مو لوټلی کاروان

بيرته پر پښو ودروي

او  پرمخ  واخلي سمه لار

د ورک  برخليک  موخې منزل پر لوري.

نوی ښار- کابل

(۱) بدبوی

(۲) خوناب

(۳) سېلاوونو

څاڅکي

څاڅکو ته گورم

چې  راتوې شي

ترې را زرغون  شي شگۍ گلونه(۱)  

بيا سره مله شي يو تربله …

لښتي  خړوب شي

بهاند بهاند  

څپې څپې شي

جوړ اباسين ترې

د تلسمسورو  سروگلکڅوشي.

سید منتظرشاه هاشمي

۲۰۱۷-۸-۲۶

(۱) يو راز دښتي گلونه

68 total views, 1 views today

Leave a Reply

Your email address will not be published. Required fields are marked *