Categories

اعلان

Loading…

په افغانستان کې د عاشورا مراسم په امنیت کې ترسره شول

تاند- د افغان امنیتي ځواکونو د ښو امنیتي تدابیرو له کبله د عاشورا ورځ نه یوازې په پلازمېنه کابل بلکې د هیواد په نورو برخو کې هم په امن کې تېره شوه.

په کابل ښار کې ګڼ شمېر امنیتي ځواکونو د جوماتونو او تکیه خانو د امنیت لپاره په کوڅو او واټونو کې ګزمه کوله او هغه کسان یې تلاشي کول چې سپېڅلو ځایونو ته تلل.

په کابل کې د جمعې په ورځ د عاشورا د ورځې په درشل کې یوې انتحاري حملې، چې امنیتي ځواکونو شنډه کړه، ۵ تنه ووژل او تر ۳۰ ډېر نور یې ژوبل کړل.

درست افغانان د پیغمبر اکرم ص د لمسي حضرت امام حسین د شهادت په ورځ په یو نه یو ډول ویر کوي، ځینې خیراتونه کوي او ځینې بیا په تکیه خانو کې د سینو په وهلو خپل خپګان څرګندوي خو داعش ډله، چې له شیعه مذهبو سره ځانګړې دښمني پالي، د دې ورځې پر لمانځونکو د حملې لپاره په کمین کې ناسته ده.

ولسمشر غني په خیرخانه مېنه کې د امام زمان جومات ته لاړ، چې تېره میاشت (سپټمبر) د داعش سختدریځې ډلې پرې حمله وکړه او په لسګونو بېګناه خلک یې په وینو کې ولمبول.

ولسمشر غني د افغانانو ترمنځ مذهبي یووالی وستایه او د دې یووالي د له منځه وړلو لپاره یې د افغانستان د دښمنانو هلې ځلې ناکامې وبللې.

د کابل په لوېدیځ، په تېره بیا دشت برچي او نورو شیعه مېشتو سیمو کې د عاشورا مراسم د دې مذهب له عقایدو سره سم جوړ شول.

د سږ کال د محرم په درشل کې د افغانستان حکومت یو شمېر شیعه ګانو ته وسلې ورکړې چې کېدای شي دې کار هم د امنیت له ټینګښت سره مرسته کړې وي؛ که څه هم اندېښنې شته چې ممکن له دغو وسلو سواستفاده وشي.

Leave a Reply

Your email address will not be published. Required fields are marked *