Categories

اعلان

Loading…

حکمتیار څه کولای سي؟ عبدالباري جهاني

د څه باندې شپاړسو کالو راهيسي چي متحده ایالاتو او د هغه متحدینو پر افغانستان باندي یرغل کړی او اوسنی نظام یې منځ ته راوړی دی، له هغو لومړیو شپو ورځو څخه اداري فساد داسي حد ته پکښي ورسېدی چي ډېر ژر یې په نړۍ کي دوهم مقام خپل کړ او د مخدره موادو د تولید او قاچاق په برخه کي یې په ټولي نړۍ کي لومړی مقام اخیستی دی. اوس حاضر د دې دواړو اجتماعي ستونزو تر څنګ د عمومي بې‌امنیتي مسله تر ټولو مهمه او حیاتي ده.

د حکومت د مخالفینو قدرت دې اندازې ته رسېدلی چي دوه ځله یې کندوز نیولی او اوس حاضر د کندوز او لښکرګاه دواړه ښارونه، هر ان، د سقوط په درشل کي دي.
د اداري فساد او مخدره موادو د قاچاق د له منځه وړلو او امنیت د ټینګولو په برخه کي، لکه څرنګه چي د مخکني جمهور رئيس کرزي صاحب حکومت ناکام سو داسي ښکاري چي د اشرف غني حکومت چي ډېره زیاته تمه ورته کېدله، هم چنداني توره و نه کړه، بلکه لا درې واړه ستونزي ورځ تر بلي زیاتي سوې دي.

په افغانستان کي اوس حاضر زیات و کم سل واړه او لوی ګوندونه موجود دي چي زه یې لوی او واړه دوکانونه بولم او مشران یې یوازي د دوکاندارانو حیثیت لري.
د حکومت په مقابل کي چي په خپله دننه کي هم له مخالفتونو سره مخامخ دی، عبد رب الرسول سیاف د مجاهدینو، یا پخوانیو مجاهدینو او جنګ‌سالارانو څخه یو ایتلاف جوړ کړی دی.
انورالحق احدي هم چي اشرف غني په خپل حکومت کي چنداني توجه ورته و نه کړه، د اصلاحاتو په نامه د څوګوندونو یا بهتر ووایو دوکاندارانو، یو بل لوی ایتلاف جوړ کړ او پر حکومت یې ږغ وکړ چي خپل ځای یوه موقتي حکومت ته پرېږدي او څه موده وروسته انتخابات را وبولي.
په ترکیه کي دوستم او عطامحمد نور د قاتلانو او جنګ سالارانو داسي یو ایتلاف را منځ ته کړ چي ټول افغانان یې باید د طرحو او احتمالي عملیاتو په مقابل کي ودرېږي.
په دې وروستیو شپو ورځو کي د افغانستان د سیاست په میدان کي یو بل لوی فکټور ورزیات سوی دی چي هغه د حزب اسلامي مشر انجنیر ګلبدین حکمتیار دی.
د انجنیر حکمتیار له نامه سره د افغانستان تقریباً ټول خلک اشنا دي. دا چي هغه د خپل وسله‌وال کاروان او هیلي‌کوپټرونو په بدرګه کابل ته ننووت د دې معنی دا ده چي باید د کابل د حکومت او د امریکایانو بشپړ ملاتړ ورسره وي. دا هغه څه دي چي د ښاغلي حکمتیار په راتلونکو فعالیتونو کي مرسته ورسره کولای سي.
په افغانستان کي د سولي او امنیت ټينګېدلو موضوع تر ډوډۍ او سرپناه هم مهمه ده، خو له بده‌مرغه چي له دې مهمي مسلې سره تر اوسه پوري جفا سوې ده.
په افغانستان کي د سولي تش په نامه شورا یوازي د سیاسي سوداګریو او لوبو لپاره جوړه سوې ده او دا چي مشرتوب یې یو ځل ربانیانو، وروسته سید احمد ګیلاني او اوس د طالبانو، سولي او کرارۍ څرګند دښمن خلیلي ته سپارل سوی دی، د دې معنی دا ده چي د افغانستان مقامات نه ریښتونې سوله غواړي او نه په سوله کي ګټه ویني.
ښاغلي حکمتیار پر طالبانو او د حکومت پر مخالفینو ږغ وکړ چي د ده په څېر د سولي له بهېر سره یو ځای سي او که سولي ښه مزه نه درلوده، دی ژمنه کوي چي له هغوی سره یو ځای غرونو ته پورته سي.
که د هغه دا وینا پر نېک فال ونیسو نو د حکومت څخه دباندي به لومړنی قوت وي چي په مستقله توګه او د خپل ورسره ګوند په مرسته د سولي او امنیت په لاره کي جدي ګام پورته کوي. دا چي طالبان د هغه غوښتنه مني او کنه دا بېخي بېل سوال دی، ځکه چي له طالبانو سره تر اوسه پوري چا جدي خبري کړي نه دي. د هغوی غوښتنو ته چا تر اوسه پوري غوږ نیولی نه دی او یوازي یې د پګواش په څېر روښانو، معقولو خو بې‌واکو موسسو له لاري تماسونه ورسره ټینګ کړي دي.

ښاغلي حکمتیار په داسي حال کي چي د کابل د اوسني حکومت ملاتړ نه دی کړی او حتی غیرمشروع یې بللی دی، د عطا نور او د هغه د بدماشانو ګواښونو ته ټینګ درېدلی او ویلي یې دي چي د حکومت د هر راز قهري نسکورولو په مقابل کي به ودرېږي او د حکومت ملاتړ به وکړي.
په قهري توګه د کابل د حکومت نسکورېدل به یقیناً چي د لس‌هاوو او ښايي د سل‌هاوو زرو بې‌ګناه افغانانو د وژل کېدلو سبب سي. حکمتیار په سوله‌ایزه توګه، د انتخاباتو د لاري د حکومت د تغییر غوښتنه کړې ده.
که څه هم چي زه په اوسنیو شرایطو کي انتخابات د اوسني فاسد نظام او پارلمان په ګټه بولم او یقین لرم چي بیا به همدغه اش او همدغه کاسه وي، خو د عطانور او د هغه د بدماشانو هر ډول بې‌مسوولیته اقدام د افغانستان د اولسونو د بدمرغۍ او توربختۍ پیلامه ګڼم.

زه د حکمتیار صاحب له نظر او عمل سره هیڅ وخت موافق نه وم، خو په اوسنیو شرایطو کي چي هر څوک د سولي لپاره ږغ پورته کوي یو به زما ږغ، که څه هم ډېر به کمزوری وي، ورسره مل وي.
د افغانستان خلک سولي او امنیت ته ضرورت لري. ویني تويېدل بس دي. دا اوسنی فاسد نظام نه یوازي د سولي د ټینګولو په لاره کي ناکام سوی دی، بلکه عملاً جفا ورسره کوي. ځئ پر هغو کسانو او قوتونو باندي سوله تحمیل کړو چي پر موږ یې جنګ تحمیل کړی دی.
دا چي حکمتیار صاحب به د سولي او امنیت د ټينګولو په لاره کي څه توره وکړي، زه اوس هیڅ نه‌سم ویلای، خو که د سولي ریښتونی جریان د ده په وسیله یوازي پیل سي دا به ډېره لویه کارنامه وي او زه یقین لرم چي خدای تعالی به یې کړي ګناهونه ټول ورته معاف کړي.

دا ليکنه په سرخط ورځپاڼه کې خپره سوې ده.

748 total views, 1 views today

3 comments

  1. باریدوست Reply

    دسلام په وړاندي کولو سره هیله لرم چي روغ جوړ او خوشحاله اوسی
    زه فکر کوم چي دصلح په ارتباط باندي دافغانستان هر فرد داوسني حالاتو لپاره ځانګړی مسؤلیت لري

  2. پیمان افغان Reply

    جهاني صاحب،
    دوه یا دوه نیم کاله تاسو هم په دې حکومت کګې کار وکړ خو اوس…، څوک یې په مرمیو ګزاروي او ځینې یې لکه ستا په شان په خبرو او لیکنو ولي.که دې مرسته او ښه مشوره د لاسه کیږي ویکړه او که نه کیږي غلی شه .

  3. A. Halim Hakimi Reply

    Yes indeed, Eng. Hekmatyar can facilitate bringing peace to Afghanistan, just for deviating from extremism to becoming moderate:

    After all he is safe, sound and has his own secure place to live in Kabul and if need be even his breathing pattern at night can be heard and counted for.

    He come along way since throwing acid to disfigure the faces of young female and group killing of Saidal Sukhandaan in the 1970’s with heavy wooden sticks in the field between Faculties of Science and Medicine in Kabul University.

Leave a Reply

Your email address will not be published. Required fields are marked *


۸

د خپلواکۍ 100 کالیزه Independence

د ژبې، رسنیو او سیاست خپلواکي | عمر بورا زماني

خپلواکي یو لوی نعمت دی چې انسان د خپلی خوښی او فیصلو اختیار په خپله ولري. د خپلواکۍ برعکس غلامي…

د ژبې، رسنیو او سیاست خپلواکي | عمر بورا زماني

02 Sep 2019 خپلواکي مقالې تاند No comments

نور

پر (اماني فکر) څو کرښې| خالد افغان

(اماني فکر) د ښاغلي بخت مرجان بختيار صيب کتاب دی چې په لنډو ورځو کې خپور شوی دی. کتاب د…

پر (اماني فکر) څو کرښې| خالد افغان

24 Aug 2019 uncategorized خپلواکي تاند No comments

نور

د خپلواکۍ سليزه؛ لنډه کتنه

د سیمه ییزو او ستراتیژیکو مطالعاتو مرکز هغه جګړه چې امير حبيب الله خان ونه کړه، محافظه کاري يې وکړه…

د خپلواکۍ سليزه؛ لنډه کتنه

29 Aug 2019 خپلواکي مقالې تاند No comments

نور

 دارالامان ماڼۍ د ولسمشر په لاس او د شهزادګۍ هندیه…

تاند، چهارشنبه، د اسد ۳۰مه: ولسمشر د خپلواکۍ د سلمې کلیزې په ویاړ رغول شوې د دارالامان ماڼۍ په شاندارو…

 دارالامان ماڼۍ د ولسمشر په لاس او د شهزادګۍ هندیه په وینا پرانیستل شوه

21 Aug 2019 خبرونه خپلواکي م. عاصم خوږیاڼی No comments

نور
  • 1
  • 2