Categories

په کابل کې د هند د سفارت د ساتونکو قوماندان له نیول کېدو وروسته هند ته اخراج شوی

تاند- هندي رسنۍ وايي چې د دغه هیواد یو ډګروال، چې په کابل کې یې د هند په سفارت کې کار کاوه، د غیرقانوني وسلې د لرلو په خاطر له نیول کېدو وروسته هند ته اخراج شوی دی.

د انډیا ټوډې ورځپاڼې د راپور له مخې، د هند دغه ډګروال په کابل کې له خپلې دندې لېري شوی او بېرته هند ته لېږل شوی دی.

د هند امنیتي سرچینې دا موضوع تاییدوي خو د هند د بهرنیو چارووزارت تراوسه پوري په دې اړه څه نه دي ویلي.

ویل کېږي چې دغه ډګروال دوې میاشتې پخوا د افغان امنیتي ځواکونو له خوا د کابل په نړیوال هوايي ډګر کې د دوو وسلو د لرلو په خاطر په داسي حال کې ونیول شو چې هند ته روان و.

دغه ډګروال په کابل کې د هند د سفارت د ساتونکو قوماندان و.

د هند حکومت هم په کابل کې د سفارت د ساتونکو له قوماندان سره د وسلې موجودیت غیرقانوني بللی او په دې خاطر یې برطرفه کړی دی.

د هند د امنیتي چارواکو له تحقیقاتو سره سم له دغه ډګروال سره موندل شوې وسله د هند د سفارت په لیست کې شامله نه وه.

ډګروال، چې نوم یې نه دی اعلان شوی، ویلي چې غیرقانوني وسله یې سهواً له ځان سره اخیستې وه.

Leave a Reply

Your email address will not be published. Required fields are marked *