Categories

اعلان

Loading…

د امریکا د ملي امنیت سلاکار او د هند صدراعظم پر افغانستان خبرې وکړې

تاند- د امریکا د ملي امنیت سلاکار متقاعد جنرال ایچ ار مک ماسټر نن /سې شنبه/ په نوي ډیلي کې د هند له صدراعظم نریندر مودي سره د تروریزم او د افغانستان د ثبات په اړه خبرې وکړې.

مک ماسټر، چې دا یې سیمې ته لومړنی سفر دی، له افغانستان او پاکستانه وروسته پرون /دوشنبه/ ماښام هند ته ورسېد.

د هند د بهرنیو چارو وزارت له خبرپاڼې سره سم له صدراعظم نریندر مودي سره د ده په دفتر کې د امریکا د ملي امنیت د سلاکار د کتنې په مهال د هند د ملي امنیت سلاکار اجیت دوول هم حاضر و.

دواړو خواوو د جنوبي اسیا پر امنیتي وضعیت او دغه راز په افغانستان کې د وسله والو طالبانو د تروریستي ګواښونو او د اسلامي دولت د نفوذ د مخنیوي په برخو کې د همکاریو پر لارو چارو خبرې وکړې.

سیمې ته د مک ماسټر سفر د ولسمشر ډانلډ ټرمپ د حکومت د یوه جګپوړي چارواکي لومړنی سفر دی.

ده په پاکستان کې هم له تروریزم سره د مبارزې پر لارو چارو خبرې وکړې.

مک ماسټر له پاکستان څخه وغوښتل چې په افغانستان کې له نیابتي جګړې لاس واخلي.

44 total views, 1 views today

Leave a Reply

Your email address will not be published. Required fields are marked *