Categories

ګیډۍ/ اجمل پسرلی

پیتر د دیوالي بخارۍ شغلو ته غبرګې سترګې نیولې وې. د اور لمبې دود کش کشولې.  ده د کړکۍ پر ژۍ د وچو ګلانو او تازه ګلانو ګیډیو ته سترګې واړولې.

دوه ویشت ورځې مخکې یې دانیا ته ګلان اخیستي و، خو هغې ورسره ونه کتل، نن یې بیا د لیدو ژمنه ترې اخیستې ده، دی غواړي چې ګلان ورکړي. د تیرې ژمنې ګلان وچ شوي، خو سړي ساتلي.

په فیسبوک کې یې د دانیا د تیرې اونۍ پيغام په لوړ غږ ولوست: « د شنبې په ورځ مازدیګر که بوخته نه شوم له تریزا سره درځم هغه غواړي چې تا وګوري، نو کافي به وڅښو »

د کړکۍ پرده یې پورته کړه. دباندې باران وریده. د دروازې د زنګ داسې شرنګ شو لکه ناڅاپه چې تالنده شي. د کمیس غاړه یې هندارې ته سمه کړه. ور یې پرانیست. تریزا وویل:

-واو د کافي څرنګه ښه بوی ځي»

پیتر دانیا ته وکتل:

-ستاسو لپاره مې کافي نیم ساعت مخکې لا تیاره کړه.

تریزا د کافي له پیالې سره کړکۍ ته ودریده د تازه ګلانو ګیډۍ یې راپورته کړه:

-دا خو دې چاته اخیستې ده تیاره فیته هم پرې تاو ده

دانیا د ګلانو وچه ګیډۍ راواړوله:

-خامخا یې تاته اخیستې ده نو چاته به یې اخیسته

تریزا ورمخته شوه د مننې په دود یې د پیتر پر مخ خپل مخ کیښود. ده د دانیا په لاس کې د ګلانو وچې ګیډۍ ته وکتل:

-دغه ګیډۍ مې مخکې اخیستې وه ګلان یې وچ شول

-اوس هم ښایسته ښکارې

دانیا ساعت ته وکتل، اجازه یې وغوښته. چې پیتر ور پسې پورې کاوه نجلۍ شاته وکتل. د پیتر شونډې ویړې شوې. دانیا ورته وویل:

-په کړکۍ کې دا وچ ګلان په رښتیا هم ښه ښکاري. پیتر مخ راواړاوه چې وچه ګیډۍ ورکړي خو د دروازې ګړز شو او په زینو کې د نجونو د بوټونو ټکا پسې ورکه شوه.

پراګ

Leave a Reply

Your email address will not be published. Required fields are marked *