Categories

اعلان

Loading…

اغلې پوهنمل زیتون بهرام / مشفق همت

زوکړه:

اغلې پوهنمل زیتون بهرام د ډاکتر میرغوث الدین معارج لور، په يوه علمي او روڼ انده کورنۍ کې یې دې نړۍ ته سترګې غړولې دي، په قوم احمدزۍ ده. پلارنی ټاټوبی یې د میدان وردګو ولایت دی، خو وروسته یې کورنۍ د بغلان ولایت ته کډه شوې.

میرمن بهرام واده کړی؛ درې ماشومان، یوه لور او دوه زامن لري.

زده کړې / سرچینه:

اغلې زیتون بهرام لومړنۍ زده کړې د کابل ښار د مریم د نجونو په لېسه کې او عالي زده کړې یې د کابل پوهنتون د ژبو او ادبياتو پوهنځي دانګليسي ژبې په څانګه کې ترسره کړې دي. د زده کړو په بهیر کې ډيره ښه وځلېده او د پرلپسې ښو نمرو په تر لاسه کولو سره، په ۱۳۸۵ لمریز کال کې بیرته په همدې څانګه کې د استادې په توګه مقرره شوه. د ماسترۍ زده کړې یې د عامه ادارې اوپالیسۍ په برخه کې د واشنګتن سټیټ یونیورسټۍ په مرسته؛ د کابل پوهنتون کې په ۱۳۸۹ کال کې په بریالیتوب سره سرته ورسولې. د طالبانو په دوره کې (هغه وخت چې د پوهنتون دروازه ددې او نورو نجونو پر مخ تړلې وه) هغې هم په خپل کور کې د نجونو لپاره د انګلیسي ژبې او د قرآنکریم د لوستلو زدکړې کورسونه درلودل او هغوی ته یې زده کړې ورکولې.

دندې:

میرمن بهرام د کابل پوهنتون د ژبو او ادبياتو پوهنځي د انګليسي څانګې د استادۍ تر څنګ په همدې څانګه کې ځینې نورې دندې هم ترسره کړې دي؛ چې له هغې څخه د استادانو د روزنې کميټې مشري، د مونوګراف د کمیټې غړې، او د کریکولم د کمیټې مشرې په توګه پاتې شوې ده. نوموړې د انګلستان سفارت په مرسته د پنځو کلونو لپاره په کابل پوهنتون کی د انکلیسي ژبې د ښوونکې په توګه پاتې شوې او د یوه کال لپاره یې د انګلستان په سفارت کې د ماستر ترینرې په توګه دنده ترسره کړې ده.

همدا راز له کال ۱۳۹۰ را په دې خوا د پوهنې او ټولنۍ د پراختيا لپاره د سولې د موسسې (PESDO)ریاست په غاړه لري او تر اوس محاله یې دا لاندنۍ پروژې پلې کړې دي:

۱- د افغانستان د یوولسو دولتي پوهنتونونو۴۵۰ ښځینه و استادانو او محصلینو لپاره د رهبریت پروژه د کابل ښار په پوهنتونونو کې.

۲- د کابل پوهنتون د ښځینه لیلیه ۱۲۰۰ محصلینو لپاره انګلیسي ژبې، کمپیوټر، او ساینسي مضامینو د تدریس پروژه.

۳- د کابل پوهنتون د ښځینه لیلیه ۲۷۰۰ محصلینو لپاره انګلیسي ژبې، ټافل، اداري مکالمه، کمپیوټر، ساینسي مضامینو د تریننګ پروژه.

۴- د کتابخانې د مدیریت او د مطالعې د فرهنګ د رواجولو پروژه د کابل ولایت په ۷۱ ښوونځیو او ۴ عامه کتابخانو کې پلې کړې.

له کال ۱۳۸۵ تر ۱۳۸۷ پوری د افغانستان د انګلیسي ژبې د استادانو په ټولنه کې د کنفرانسو د همغږې کوونکی، له ۱۳۸۸تر ۱۳۹۰ پورې د همدې ټولنې د اداري مسوولې په توګه او بیا له ۱۳۹۱ کاله رانیولې تر ۱۳۹۲ کاله پورې د دې ټولنې د ریسې په توګه پاتې شوې ده. اغلې بهرام د دې تر څنګ چې ددې ټولنې د لومړي، دویم، درېیم، او څلورمو کلنيو کنفرانسونو مدیریت یې کړي او د دې ټولنې غړو ته یې تریننګونه او ورکشاپونه دایر کړي، پدی سربیره یې په کابل کې د امریکا د متحده ایالاتو د سفارت په مالي مرسته د ټولنې د غړو لپاره او هم د کابل ښار روزنتون د انګلیسي پروګرام فارغ شوو زده کوونکو او د هغه پروګرام د انګلیسي ژبې استادانو ته د میتودیک ( تیچر تریننګ) پروګرامونه دایر کړي دي.

همدا راز میرمن زیتون بهرام د عروج ښځینه منیجمنت يا اداري انستیتوت کې د بشري منابعو او اداري مکالمې مضمونونو د ښوونکې په توګه دنده ترسره کړې او هم یې په کاروان پوهنتون کې د انګلیسي ژبې په پروګرام کې د لیکوالۍ مضمون تدریس کړی. DEL

له  ۱۳۹۴کال نیولې تر اوسه پورې د ابره افغان تجارتي شرکت د ریسې په توګه د دې شرکت له لارې یې د ښځو او نجونو په واسطه هیواد ته د لاسي صنایعو د ودې په برخه کې اغیزمن خدمتونه ترسره کړي.

آغلې بهرام ډیر علمي او تعلیمي تریننګونه پلان او دایر کړي دي، کله یې چې دافغان انګلیسي ژبو استادانو د ټولنې د اداري مسوولې په توګه او بیا وروسته یې د همدې ټولنې د ریاست دنده ترسره کوله؛ د تدریس د میتودونو ګڼ تریننګونه یې د دې ټولنې استادانو ته په لار اچولي او هم یې پخپله ترین کړي دي. د پاکستان د انګلیسي ژبو استادانو ټولنې په ۲۷ کلني کنفرانس کې یې پریزینتیشن ورکړی. د یولسو پوهنتونونو د هغه ښځینه استادانو چې د رهبریت پوستونو کې یې دندې ترسره کولې او د کابل څلورو دولتي پوهنتونونو د ځوانو ښځینه استادانو او دآخر کال ښځینه محصلینو ته د مدیریت او رهبري تریننګونه دایر کړي دي. د کابل پوهنتون په ښځینه لیلیه کې د نجونو محصلینو لپاره د دوو تعلیمي پروژو د تطبیق پر محال یې ددغو نجونو لپاره د مدیریت، رهبري، جندر، کتاب لوستو مهارت، حفظ الصحه/صحي، او د سولې جوړولو تریننګونه او د انګلیسي ژبې، کمپیوټر/آی سي ډي ال، ټافل او ساینسي مضمونونو کورسونه په لار اچولي. همدارنګه یې د کابل پوهنتون دانګلیسي ژبې دیپارتمنت استادانو لپاره وخت په وخت تریننګونه دایر کړي دي.

اغلې پوهنمل زیتون بهرام ته چې اوس د لوړو زده کړو وزارت ته نومانده ده؛ په خپلو علمي هڅو کې بریالیتوب غواړم، سرلوړې دې وي.

درناوی

مشفق همت

23 total views, 2 views today

Leave a Reply

Your email address will not be published. Required fields are marked *