Categories

اعلان

Loading…

د سردار محمد داوود خان روغتون د حملې د شهیدانو شمېر ۴۹ ته ورسېد

تاند- په سردار محمد داوودخان روغتون کې د داعش یا اسلامي دولت د وسله والې تروریستي ډلې په پروني برید کې د شهیدانو شمېر ۴۹ تنو ته ورسېد.

د افغانستان د عامې روغتیا وزارت ویندوی قمرالدین صدیقي نن /پنجشنبه/ د حملې په نتیجه کې د ۴۹ تنو شهادت او د ۷۶ نورو ټپي کېدا تایید کړه.

پرون د افغانستان دفاع او روغتیا وزارتونو د شهیدانو شمېر ۳۰ تنه اعلان کړی و.

خو د دفاع وزارت سرچینو تاند ته ویلي و چې لا هم د روغتون ټولې برخې پلټل شوي نه دي او ځیني ټپیان مرګيحاله دي.

صدیقي وویل«د حملې په قربانیانو کې ډاکتران، نرسان – نرسانې، ناروغان او د روغتون ملکي کارکوونکي شامل دي.»

صدیقي دا هم وویل چې د ۱۰ نورو ټپیانو حال نازک دی او ښايي د شهیدانو شمېر تر ۴۹ واوړي.

د کورنیو چارو او دفاع وزارت ویندویانو پرون د دې ۷ ساعته تروریستي حملې د بریدګرو شمېر ۴ تنه ښوده خو داعش تروریستي ډلې تېره شپه په حمله کې د شاملو تروریستانو شمېر ۵ تنه وښود او د هغوی نومونه یې هم اعلان کړل.

سردار محمد داوود خان روغتون د امکاناتو له نظره د افغانستان تر ټولو ښه روغتون ګڼل کېږي. په دغه روغتون کې ډاکتران هم روزل کېږي.

په ۲۰۱۱ م کال وسله والو طالبانو پر دغه روغتون تروریستي برید وکړ چې په لړ کې یې ۶ سرتېري او د طب یو شمېر محصلان شهیدان شول.

71 total views, 1 views today

Leave a Reply

Your email address will not be published. Required fields are marked *