Categories

اعلان

Loading…

وال سټریټ ژورنال ورځپاڼه: په پاکستان کې که ګازرو تغیر را نه وړ، امریکا باید له یوه غټ سوټي نه ورته کار واخلي

تاند – د امریکا مشهورې ورځپاڼې وال سټریټ ژورنال د پنجشنبې په ورځ /د فبروري۱۶مه/ د خپل یوه کالم لیکوال سدانند دهوم یوه لیکنه خپره کړې او لیکي چې، د پاکستان لپاره د امریکا د صبر کاسه نوره ډکه شوې ده.

دغه ورځپاڼه لیکي، «امریکا په چټکۍ سره د پاکستان لپاره بې صبره کیږي. د ټرمپ د ترهګرۍ ضد اجندا دا معنی لري چې اسلام اباد به بیا داسې په اسانۍ سره ترهګرو ته د ځای ورکولو او ورسره مرستې کولو له مسئلې څخه ځان خلاص نه کړي.»

وال سټریټ ژورنال لیکي، «پاکستان په واشنګټن کې درګرده خواخوږي بایلي. د متحده ایالاتو د کارپوهانو وروستۍ لیکنې، د چارواکو له خوا په کانګرس کې شوې خبرې او د ټرمپ د ادارې ناراحتي دا ټول یوه لوري ته اشاره کوي: متحده ایالات به په اسلام اباد باندې فشار زیات کړي چې هغه ترهګرې ډلې وځپي چې په افغانستان کې د متحده ایالاتو ځواکونه په نښه کوي او افغانستان او هندوستان بې ثباته کوي.»

ورځپاڼه لیکي، «د سپتمبر د ۹مې له پېښې راهیسې په یوه نیمه لسیزه کې، د متحده ایالاتو د پوځ او استخباراتو د کارپوهانو یو نسل د دې شاهد وو چې پاکستان د حقاني شبکې، طالبانو او لشکر طیبه په څېر ترهګرو ګروپونو ته ملاتړ برابراوه. په ۲۰۱۱ کال کې د پاکستان د لوړې سطحې پوځي اکاډمۍ نه په دومره فاصله کې چې د چا خبره تیږه وار کړې ور رسېږي د اسامه بن لادن پيدا کېدل د اسلام اباد په «دوه مخې لوبه» باندې د تصدیق ټاپه لګوي.»

په واشنګټن کې د پاکستان پخوانی سفیر او د هډسن انسټیټیوټ څېړونکی حسین حقاني

د امریکا دغه مشهوره ورځپاڼه زیاتوي، «پاکستان باید دغه تیاره کېدونکی حالت جدي ونیسي. که هغه د هغو ترهګرو ډلو پر ضد لاس په کار کېږي چې د هغه له خاورې نه فعالیت کوي، دغه هېواد به بېرته د واشنګټن د اعتماد ګټل شروع کړي، خو که خپل کار ته د پخوا په څېر دوام ورکوي – چې د «بدو ترهګرو» هغه چې په پاکستان کې حملې کوي او «ښو ترهګرو» هغه چې په په امریکایانو، افغانانو او هندوانو حملې کوي – فرق کوي، بیا باید د خپلو صادراتو تر ټولو لوی مارکېټ او د دفاعي وسایلو تر ټولو لوی تامینوونکي هېواد سره د لا ډېرو سړو روابطو وېره ولري.»

وال سټریټ ژورنال مخکې لیکی، «یوه راپور چې د هیریټیج فاونډېشن لیزا کرټیس او د هډسن انسټیټیوټ حسین حقاني په دې میاشت کې په ګډه تیار کړی وو، د ټرمپ په اداره تاکید وکړ چې د پاکستان لپاره دا «ډېره او ډېره سخته کړي» چې ترهګر مؤکلین نور حمایه کړي. د جورج ټاون پوهنتون سي. کریسټین فیر چې د پاکستان د پوځ په هکله یې یو معتبر کتاب لیکلی، استدلال کوي چې پاکستان «له امریکا څخه د پیسو په اخیستلو او بیا د هغو پیسو په واسطه د هغو طالبانو په حمایه کولو سره چې امریکایي عسکر او ملکیان او همدارنګه زمونږ افغان او نړیوال متحدان وژني دښمنۍ ته دوام ورکوي.»

ورځپاڼه لیکي، «د افغانستان لپاره د متحده ایالاتو په مشرۍ د نړیوالو ځواکونو قوماندان جنرال جان ډبلیو نکلسن تېره اونۍ په کانګرس کې د خبرو کولو پر وخت وویل چې پاکستان په افغانستان کې له مرستندوی څخه د ټیټې سطحه رول لوبوي. هغه وویل، «په هغه صورت کې چې ستاسو دښمن بهرنی ملاتړ او خوندي ځای لري دا ډېره سخته ده چې د جګړې په ډګر کې بری ترلاسه شي.»

د وال سټریټ ژورنال په لیکنه، «ډېر کارپوهان په دې باور نه لري چې متحده ایالات باید سمدلاسه داسې چټک ګام واخلي چې پاکستان د ایران، سوډان او سوریې تر څنګ د ترهګرۍ د حامي دولت په توګه کټګوري کړي. دا کار به له پاکستان سره د متحده ایالاتو پوځي مرسته ودروي  او د نورو سزایي ګامونو یوه لړۍ به پیل کړي.»

د ورځپاڼې په لیکنه کې راغلي، «خو د نورو له منځه مېرمن کورتیس او ښاغلی حقاني په دې باور دي چې، «دا کار باید د اوږدې مودې لپاره د یوه انتخاب په توګه وساتل شي.» هغوی داسې نتیجه اخلي چې که تر څو کالونو پورې پاکستان ته د ګازرو ورکولو څه تغیر رانه وست، بیا متحده ایالات باید له یوه غټ سوټي نه کار واخلي.»

مشرف چې د طالبانو د حمایې اعتراف کوي

وال سټریټ ژورنال زیاتوي، «په پيل کې، واشنګټن باید پاکستان ته له ناټو څخه د بهر لوی متحد په موقف باندې، چې د جورج بش ادارې په ۲۰۰۴ کال کې ورکړی وو، بیا فکر وکړي. په هغه وخت کې دا یوه شیریني وه چې د القاعدې پر ضد د پوځي مشر جنرال پروېز مشرف نژدې همکاري جلب کړي. خو دا په ډېرېدونکي ډول سخته شوې ده چې استدلال وشي چې پاکستان په داسې یوه لست کې د پاتې کېدلو وړ دی چې د استرالیا، اسراییل او جاپان په څېر متحدان په کې ځای لري.»

ورځپاڼه وایي، «له مرستو سره د سختو شرایطو ضمیمه کول هم ښایي مرسته وکړي. د سپتمبر له ۹مې راهیسې، متحده ایالاتو پاکستان ته له ۳۳ میلیارده ډالرو څخه ډېره مرسته او پوځي لګښتونه ورکړي دي. د دغو مرستو په لومړیو څو کالونو کې، د پاکستان پوځ د القاعدې د یو شمېر جیګپوړو او منځپوړو غړو په نیولو کې مرسته وکړه، خو د بن لادن او د هغه د مرستیال ایمن الظواهري، چې تر ډېره باور کیږي چې اوس هم په پاکستان کې دی، په نیولو کې نه.»

د وال سټریټ ژورنال امریکايي ورځپاڼه لیکي، «خو د حقاني شبکې او طالبانو وینه زبېښونکي ګروپونه چې په افغانستان کې فعالیت کوي له ډېرې مودې راهیسې په پاکستان کې په خوندي توګه وخت تېروي. دغه رنګ په هند کې فعالیت کوونکي ګروپونه لکه لشکر طیقه او جیش محمد هم په پاکستان کې اډې لري. د ترهګرو ډلو د هراړخیزو ځپلو لپاره د متحده ایالاتو اوازونه اکثر وختونه په پاکستان کې په نارضایتۍ سره ځواب شوي دي. ډېر پاکستانیان استدلال کوي چې د هغوی هېواد هم له کړاو سره مخامخ دی. د مثال په توګه، په دې اونۍ کې ځانمرګو بمي بریدونو په لاهور، پېښور او سند کې د یوه صوفي په زیارت او له افغانستان په پوله سرحدي سیمو کې لږ تر لږه ۷۰ کسان ووژل.»

ورځپاڼه وایي، «د پراخ نړیوال زړه خوږي غوښتنه ښایي د درک وړ وي، خو هغه به ستونزه حل نه کړي. که د پاکستان اردو د ترهګرو ګروپونو لپاره جهادي مدرسې نه وې برابرې کړې او د هند پر ضد یې سنګر نه وای پرانستی کېدای شوای چې پاکستان یو ارام ځای وای.»

ورځپاڼه لیکنه داسې راغونډوي چې، «د ټرمپ د ادارې لپاره، د ترهګرۍ او په لویه کې د راډیکال اسلام د نظریې پر ضد مبارزه د اجندا په سر کې راځي. د متحده ایالاتو لپاره د پاکستان پخوانی سفیر ښاغلی حقاني وایي، دغه حالت په راولپنډۍ کې د ناستو جنرالانو لپاره لا ډېره مهمه ګرځوي چې په واشنګټن کې بدلېدونکي حالت ته توجه وکړي.»

د وال سټریټ ژورنال ورځپاڼې لیکنه په دې ټکو پای ته رسېږي، «د سان برناردینو د ۲۰۱۵ د حملې په شمول په متحده ایالاتو کې په ګڼو ترهګریزو پېښو کې یا پاکستانیان ښکېل ول او یا پاکستاني امریکایان. ښاغلی حقاني خبرداری ورکوي چې، «مونږ د ټرمب ادارې څخه یوازې یو لارۍ بم فاصله لرو چې ووایي، «ښه، مونږ باید د پاکستان پر ضد لاس په کار شو.»

113 total views, 2 views today

4 comments

  1. dawud Reply

    امریکا خپله دغه لوبه غواړي جاري وساتي، که نه په هرڅه باندي پوهیږي

  2. SAS Reply

    باكستان بايد ورتل شي

  3. Pingback: د پنتاګون پخوانی جیګپوړی چارواکی وایي، متحده ایالات باید د پاکستان له خوا د دغه هېواد لوشل ودروي - تاند

  4. Pingback: د پنتاګون پخوانی جیګپوړی چارواکی وایی، متحده ایالات باید د پاکستان له خوا د دغه هېواد لوشل ودروی - پشتو نیوز

Leave a Reply

Your email address will not be published. Required fields are marked *