Categories

ملګري ملتونه وايي، جګړو تر ۶ لکه زیات افغانان بېځایه کړي

تاند- ملګري ملتونه وايي، د افغانستان په بېلابېلو سیمو کې د جګړې دوام په ۲۰۱۶ م کال کې تر ۶ لکه ۲۳ زره زیات افغانان اړ ایستلي چې په خپل هیواد کې دننه بې ځایه شي.

د تېر کال په لومړیو کې ملګروملتو اټکل کاوه چې دوه نیم لکه تنه به بې ځایه شي خو د جګړې د شدت او د طالبانو له لوري په زیاتو سیمو کې د حملو له کبله تر اټکل زیات کسان بې ځایه شول.

د دسمبر په اتلسمه ملګروملتو ۵۸۰۰۰۰ تنه بې ځایه شوي ثبت کړي وو خو په درو اوونیو کې د هغو شمېر ۴ لکه نور ډېر شو.

ملګروملتو په خپل راپور کې، چې د دوشنبې په ورځ خپور شو، د بې ځایه شویو افغانانو شمېر بې ساری بللی او ویلي یې دي چې ښايي په راتلونکو اوونیو کې د کورنیو بې ځایه شویو شمېر نور هم زیات شي.

ملګري ملتونه وايي چې د دې ترڅنګ له پاکستان او ایران څخه افغانستان ته د شاوخوا یوملیون افغانانو بېرته ستنېدو د افغانانو کړاونه لا زیات کړي دي.

د ملګروملتو دا راپور د افغانانو د ایستلو لپاره د جرمني حکومت هلې ځلې له پوښتنې سره مخامخ کوي.

جرمني ویلي چې ټول هغه پناه غوښتونکي له خپلې خاورې باسي چې د پناه غوښتنلیکونه یې رد شوي دي. د رد شویو کسانو لوی اکثریت د افغانانو دی.

Leave a Reply

Your email address will not be published. Required fields are marked *