Categories

اعلان

Loading…

ولسمشر د انتخاباتي کمیسیونونو له نویو معرفي شویو غړیو سره مرکې کوي

تاند- د انتخاباتي کمیسیونونو د مسوولانو د غوراوي کمېټې د سلګونو تقاضا کوونکو له منځه بالاخره ۳۶ تنه کاندیدان د هیواد د ټاکنو د خپلواکو کمیسیونونو د غړیو په توګه معرفي کړل.

د دغو کسانو په منځ کې ۲۱ تنه د ټاکنو د خپلواک کمیسیون لپاره او ۱۵ د انتخاباتي شکایتونو د خپلواک کمیسیون لپاره غوره شوي دي.

دوی دا کسان ولسمشر ته معرفي کړي دي.

ټاکل شوې ده چې ولسمشر غني ۷ تنه د انتخاباتو د خپلواک کمیسیون لپاره او ۵ تنه د شکایتونو د خپلواک کمیسیون لپاره معرفي کړي.

د غوراوي کمېټې غړیو له ولسمشر سره د چهارشنبې په ورځ مازدیګر په ارګ کې وکتل او د غوره شویو کسانو لېست یې ور وسپاره.

په دې کتنه کې اجرائیه رئیس عبدالله عبدالله، د ولسمشر دوهم مرستیال سرور دانش، لوی څارنوال فرید حمیدي او د افغانستان لپاره د ملګروملتو د سرمنشي ځانګړي استازي تادامیچي یاماموتو هم برخه لرله.

د افغانستان ولسمشر اشرف غني غواړي چې د غوراوي کمېټې له لوري د انتخاباتي د کمیسیونونو لپاره له انتخاب شویو کسانو سره مرکې وکړي.

دا خبره د ولسمشر مرستیال ویاند دواخان مینه پال ازادي رادیو ته وکړه، ویې ویل« تر دې وروسته به ولسمشر له هغو کسانو سره چې د غوراوي د کمېټې له لوري یې نومونه نهايي شوي دي، مرکې وکړي. یو انتخاب دا هم دی چې کیدای شي دغه مرکې د رسنیو له لارې هم خپرې شي. د دې لپاره چې دا پروسه نوره هم شفافه شي پر دې به د مدني ټولنو او اړونده ادارو کسان هم په‎کې ښکیل وي.»

ولسمشرغني دوه ځله د انتخاباتو په اړه تقنیني فرمانونه ملي شورا ته واستول خو رد شول او بیا یې په ژمې چې کله ملي شورا په رخصتیو وه تقنیني فرمان صادر کړ.

دغه فرمان د وزیرانو شورا تصویب کړ او ولسمشر توشیح کړ چې له دې سره د غوراوي د کمېټې کارونه پیل شول.

284 total views, no views today

Leave a Reply

Your email address will not be published. Required fields are marked *


۸