Categories

اعلان

Loading…

دوزخ / بارکوال مياخېل

ناخبر ملا ږغېږي له دوزخه

وايي هلته به د سرو لمبو توپان وي

د دونيا خزندې ښکاري ورته سپږې

په دوزخ کې به اويا ګزه ماران وي

ګناهکار به پکې سوځي تر ابده

ناخبره به له يوه بله خپلوان وي

***

دا د لوږې دوزخ نه ويني شبکور دی

چې خواران ورپکې واړه لوغړن شول

تور ماران د سرمايې يې چيچي غوښې

لړمان د ظلم تېر يې پر بدن شول

د ناکړو ګناهو په اور کې سوځي

ورک له خپله جنتي غوندې وطن شول

***

په دوزخ د غلامۍ کې چې پراته دي

مري که پايي له هغو سره يې څه دي

چې ور څيرې يې پر تن د ژوند کالي کړل

پر هغه لړم بادار يې پټ لېمه دي

چې بلا يې پکې لنګه د تيارو ده

را ځبېښلي يې په سترګو ده اورږه دي

***

د محراب له ساړه سيوري بهر نه دی

ډاروي مو له لمبو د دوزخونو

ناخبر ملا سردار د جنتونو

پر موږ کنده کړي پيرزو د دوزخونو

ډک د خېټې جهنم کړي بيا ويده شي

څه يې اړه په کيسو د دوزخونو

***

لولپه يو موږ د جنګ په سره دوزخ کې

راځي هره شېبه وير د عذابونو

را ټوکېږي مو ماران له خپلې مځکې

له مودو يې وړو تقصير د عذابونو

د وطن د مينې تور مو وړي تر داره

دی په غاړه مو ځنځير د عذابونو

***

ناخبر ملا! دوزخ دي څه ليدلی

راشه وګوره سېلاب زما د وينو

په دوزخ کې ماشومان هم په اور سوځي؟

وايه څه ګټي ثواب زما د وينو؟

يم د بم لړم چيچلی په ژوندوني

پاته نور نه دی حساب زما د وينو

  • •••••••••••••••••••••••••••

04 نومبر 2016م کال

کوټه

50 total views, 2 views today

Leave a Reply

Your email address will not be published. Required fields are marked *