Categories

اعلان

Loading…

د صادق هدایت شل خبرې/ وږمه وردک

١- د يوې ټولنې تر ټولو وېروونكى انحطاط، خرافات او د خلكو ناپوهي ده.

٢- ‏‏هغه څه چې په انسان كې پټ دي، يوازې په تياره كې ورته ځلېږي.

‏‏٣- تر ټولو ستونزمن كار دا دى، چې څوك حقيقت څرنگه چې دى، هسې بيان كړي.

٤- ‏‏زه يوازې له خپل سيوري سره كولى شم په ښه توگه خبرې وكړم.

‏‏٥- هر څوك د خپلو افكارو پر بنسټ د نورو په هكله قضاوت كوي.

٦- ‏د روح جوهر، اراده او فكر دى.

٧- ‏دا دليل نه شي كېداى چې هر څوك پيسې لري، هوښ (پوهه) هم لري.

٨- ‏د انسان ژبه لكه خپل ځان يې نېمگړې او بې وسې ده.

‏‏‏‏٩- مينه لكه يو غږ، يوه زړه راښكونكې او جادوگره نغمه ده.

١٠- زما پوهه تر همدې ځايه را ورسېده چې پوه شوم، ناپوه يم.

١١- د هر نسل ځانگړنه دا ده چې د خپل تېر نسل تجربې هېروي.

١٢- ظالم تل د خپلو ناوړو كړنو لپاره ښې بهانې جوړوي.

١٣- كه په دنيا كې ورته والى او ابتذال شته؛ په هنر كې نشته.

١٤- هېڅ دليل ډارن او ناپوه انسان نه شي قانع كولى.

١٥- زما سيورى دى چې ما خبرو كولو ته هڅوي، يوازې هغه كولى شي ما وپېژني.

١٦- كه ژوند نه تېرېداى، څومره به تريخ او ډاروونكى و.

١٧- هر كله چې انسان له دروغو خوښيو او بې گټو شيانو ځان لېرې كړي؛ پوه به شي چې تر ټولو خوښ ژوند طبيعت هغه ته وركوي.

١٨- يو څه داسې وي چې بل پرې نه شې پوهولى او نه يې ورته ويلى شې؛ كه يې ووايې مسخره كوي دې.

١٩- كه څوك تمدن غواړي بايد وحشت او بې شرفي هېر كړي.

٢٠- كه بشر د څارويو وژل ودروي، د انسان وژل به هم ودرېږي.

60 total views, 2 views today

Leave a Reply

Your email address will not be published. Required fields are marked *