Categories

اعلان

Loading…

د فراه خلکو د بخش اباد بند د ساتنې ژمنه وکړه

تاند- د فراه ولایت د بېلابېلو ولسوالیو قومي مشرانو د بخش اباد بند په جوړېدو کې د حکومت د ملاتړ ژمنه وکړه.

د فراه د پُشت رود، بالابلوک، خاک سفید او بکوا ولسوالیو مشرانو نن /دوشنبه/ د فراه له چارواکو سره په یوه غونډه کې د بخش اباد بند د جوړېدو ملاتړ وکړ، ویې ویل چې که حکومت پر دغه بند کار پیل کړي، ولسونه به یې په ساتنه کې مرسته وکړي.

ویل کېږي چې دا بند د دې لپاره چې د ایران پلوو یاغیانو له لوري پرې بریدونه کېږي، په ځلونو ځنډول شوی دی.

خو اوس د فراه قومي مشران وايي چې د دغه بند په اړه یې له وسله والو طالبانو سره خبرې کړي او هغوی یې دې ته تیار کړي چې پر بند به حمله نه کوي.

د بخش اباد بند د جوړېدو په صورت کې د فراه تر ۱۰۰ هکتاره زیاته مځکه خړوبېدای شي.

د فراه والي اصف ننګ د فراه قومی مشرانو ته وویل چې د بند د جوړولو لپاره هڅه کوي چې نوره بودجه پیدا کړي خو د بند د جوړېدو لپاره ولسي ملاتړ خورا مهم دی.

د بخش اباد بند د فراه ولایت په بالابلوک ولسوالۍ کې دی. دغه بند ته د فراه رود اوبه بهېږي.

د دغه بند د ډیزاین او سروې قرارداد د سږ کال په جون میاشت کې په ارګ کې د ولسمشر محمد اشرف غني په حضور کې له یوې ایټالیايي کمپنۍ سره شوی او د دې کمپنۍ انجنیران فراه ته رسېدلي دي.

دا بند به د جوړېدو په صورت کې ۱۳۶۰ ملیون متر معکب اوبو د زېرمه کولو ظرفیت ولري.

د افغانستان حکومت تر دې وړاندې په هلمند ولایت کې د کجکي بند د پراختیا قرارداد لاسلیک کړ چې د اجرا کېدو په صورت کې به د کجکي د برېښنا تولید تر ۱۴۰ میګاواټو واوړي.

همداراز نن ارګ اعلان وکړ چې الکوزي ګروپ موافقه کړې چې د سروبي دوهم برېښناکوټ په ۳۰۰ ملیون ډالره پانګونې جوړ کړي.

دا بند به ۱۸۰ میګاواټه برېښنا تولید کړي.

16 total views, 1 views today

Leave a Reply

Your email address will not be published. Required fields are marked *