Categories

اعلان

Loading…

یو بد خبر/ محمد نعمان دوست

زموږ د هیواد ډیری خبرونه بد وي. چیرته چې وژنې وي، چیرته چې ویجاړونې وي او چیرته چې داسې جګړه روانه وي چې هیڅ پای یې نه ښکاري، هلته به ښه خبر له کومه شي؟

موږ به تل همداسې بد خبرونه اورو او تل به مو د خبرونو په اوریدو په زړونو کې څړیکې کیږي.

دا تازه بد خبر(زمري ۲۲مه)  د پکتیکا د خوشامند ولسوالۍ له میناري کلي څخه دی. د خبرونو په حواله دلته بې پیلوټه الوتکې یو کور په نښه کړی، یو ډاکټر یې د خپلې کورنۍ له نورو غړو سره له منځه وړی دی.

 ښه، د رسمي سرچینو  دا خبره  به ومنو چې ګوندې دا  ډاکټر ترهګر و، خو په دې برید کې شهیدان شويو ماشومانو ته کوم نوم ورکړو؟ ایا ماشومان هم ترهګر وو؟ ایا د ماشومانو وژل په خپله ترهګري نه ده؟ او….

شاید، امریکایان له څیړنو وروسته خپله پړه ومني او خواشیني هم څرګنده کړي خو ایا دا خواشیني به وژل شوي ماشومان بیرته خپلې کورنۍ ته را ژوندي کړي؟

دا لومړی ځل نه دی چې د ترهګرۍ پر ضد جنګیدوونکي ځواکونه د خپلې ترهګرۍ ثبوتونه وړاندې کوي. همدې ځواکونو د ودونو مراسم بمبار کړي، کلیوال یې بمبار کړي، سپین ږیري یې وژلي او ځینې پوځیانو خو یې مخامخ ملکي خلک هم په نښه کړي دي چې غوره نمونه یې( Rabert Bales)  رابرت بیلز و.

 دغه وحشي سرتیری د ( ۲۰۱۲ ) کال په مارچ کې د کندهار په پنجوايي کې، نیمه شپه  له خپلې پوځې هډې لکه وږی لیوه راووت، د ملکي خلکو په کورونو ور ننوت او (۱۶) تنه کلیوال ،چې ماشومان او میرمنې هم پکې وې، شهیدان کړل.

د ملکي کسانو په دغه شان وژنو خلکو ته شک پیدا شي او دا شک خو کله کله د یقین مرحلې ته هم ورسیږي.

دوی په لومړي سر کې ویلي و چې هوايي ځواکونه یې له هوا څخه ان د شپې پر ځمکه یو انچ شی هم په نښه کولای شي. رښتیا وايي، ښه را ته یاد دي چې د طالبانو د امارت د زوال په لومړیو شیبو کې د شپې یوې الوتکې باغ بالا کې کانټیننټال هوټل ته په لاره بایفور ډاټسن ویشتلې وه. ښه را ته یاد دي چې نیمه شپه یې کابل کې پر یوه غره لګیدلی ټلویزیوني انتن وویشت او…

خو چې کله همدغه په پرمختللي جنګي تکنالوژۍ سمبال ځواکونه،  زموږ عوام او ماشومان ولي، په رڼا ورځ  د واده مراسم بمباروي ( ننګرهار،هسکه مینه، ۶جولای، ۲۰۰۸) او…   نو بیا ورته د سهوې نوم ورکول یوه ناکامه هڅه ده.

جګړه که په هر نیت اوږدیږي او که هر څوک پکې ګټې کوي، خو سرونه زموږ خوري او قرباني له موږ اخلي.

 د افغانستان لپاره  د ملګرو ملتونو د مرستندویه پلاوي ( یوناما) د یوه تازه راپور له مخې د روان میلادي کال په لومړیو شپږو میاشتو کې ( ۵۱۶۶) ملکي وګړو ته مرګ ژوبله اوښتې ده. دا شمیره د تیرو کلونو په پرتله لوړه شوې ده او د دې شمیرې کابو درېیمه برخه کوچنیان په بر کې نیسي.

د یادې شوې سرچینې د شمیرنو له مخې د( ۲۰۰۹) کال د پیل را پدیخوا د روان کال د جون تر( ۳۰)مې پورې زموږ ( ۲۲۹۴۱ ) ملکي وګړي وژل شوي او( ۴۰۹۹۳) نور ژوبل شوي دي.

یوناما د دغو وژنو د اکثریت ګوته د دولت مخالفو وسلوالو ته نیسي او ممکن مقابل لوری دغه ادعا رد کړي. خو رښتیا خبره دا ده چې موږ وژل کیږو او پر موږ هدیرې ډکیږي.

جګړه موږ ته ډیر درنه تمامیږي، د دې یو ستر علت دا دی چې د جګړې ښکیلې غاړې  د جګړې اصولو ته ژمنې نه دي.

د بې دفاع انسان وژنه، د ټول ګټو تاسیساتو ړنګول، د ماشومانو او میرمنو وژل نه په شرع کې جواز لري او نه د ژنیو په قراردادونو کې؛ خو موږ یې عملاً شاهدان یوو.

موږ د جګړې پر ښکیلو غاړو غږ کوو چې که له جګړې لاس نه اخلئ او خامخا یې غځوئ نو لطفاً لږ تر لږه  د غیر نظامي اهدافو خوندي کیدو ته ژمن اوسئ، ستاسو نه ژمنتیا به تاسو د انسانیت له دایرې دومره لرې ګوزار کړي لکه د شهزاد محمدي د شپږیزې توپ.

محمد نعمان دوست  

( سرخط ورځپاڼه – نننۍ ګڼه)

358 total views, 6 views today

1 comment

  1. Eng Haris Reply

    امریکایان کله انسانیت لري مونږ هم عجیبه خلق یو دداسی چا نه د انسانیت تمه کوو چه ۶۰ کاله وړاندی یی د جاپان ۱۰۰۰۰۰ کسان بی ګناه قتل عام کړل زه خو وایم چه د امریکا نظامیان خو پریږده عوام هم انسانان ندی بلکه چارپایان دی ځکه دا نظام د همدوی په ملاتړ جوړدی

Leave a Reply

Your email address will not be published. Required fields are marked *


۸

د خپلواکۍ 100 کالیزه Independence

د ژبې، رسنیو او سیاست خپلواکي | عمر بورا زماني

خپلواکي یو لوی نعمت دی چې انسان د خپلی خوښی او فیصلو اختیار په خپله ولري. د خپلواکۍ برعکس غلامي…

د ژبې، رسنیو او سیاست خپلواکي | عمر بورا زماني

02 Sep 2019 خپلواکي مقالې تاند No comments

نور

پر (اماني فکر) څو کرښې| خالد افغان

(اماني فکر) د ښاغلي بخت مرجان بختيار صيب کتاب دی چې په لنډو ورځو کې خپور شوی دی. کتاب د…

پر (اماني فکر) څو کرښې| خالد افغان

24 Aug 2019 uncategorized خپلواکي تاند No comments

نور

د خپلواکۍ سليزه؛ لنډه کتنه

د سیمه ییزو او ستراتیژیکو مطالعاتو مرکز هغه جګړه چې امير حبيب الله خان ونه کړه، محافظه کاري يې وکړه…

د خپلواکۍ سليزه؛ لنډه کتنه

29 Aug 2019 خپلواکي مقالې تاند No comments

نور

 دارالامان ماڼۍ د ولسمشر په لاس او د شهزادګۍ هندیه…

تاند، چهارشنبه، د اسد ۳۰مه: ولسمشر د خپلواکۍ د سلمې کلیزې په ویاړ رغول شوې د دارالامان ماڼۍ په شاندارو…

 دارالامان ماڼۍ د ولسمشر په لاس او د شهزادګۍ هندیه په وینا پرانیستل شوه

21 Aug 2019 خبرونه خپلواکي م. عاصم خوږیاڼی No comments

نور
  • 1
  • 2