Categories

اعلان

Loading…

د ترکیې د کودتا پر ضد په مزارشریف ښار کې مظاهره وشوه

تاند- یو شمېر افغانانو نن /یکشنبه/ په مزارشریف ښار کې د ترکیې د ولسمشر رجب طیب اردوغان پر ضد د کودتا په اعتراض کې مظاهره وکړه.

مظاهره چیانو په داسي حال کې چې په لاسونو کې یې د افغانستان او ترکیې بیرغونه او د رجب طیب اردوغان عکسونه ول، د مزارشریف ښار په واټونو کې لاریون وکړ.

دوی د ترکیې د جلاطن مذهبي مشر فتح الله ګولین پر ضد شعارونه هم ورکړل.

ګولین هغه جلاوطنه ترک مشر دی چې د ترکیې ولسمشر یې په وروستۍ ناکامه کودتا کې په لاس لرلو تورنوي.

د ترکیې په ناکامه کودتا کې ۲۴۶ تنه ووژل شول او ۲۱۰۰ نور ژوبل شول.

د افغانانو په لاریون کې په مزارشریف ښار کې د ترکیې کونسل (قونصل) مصطفي ایردویران او د ترکیې د همکارۍ او همږغۍ د ادارې سیمه ییز تنظیموونکي ذکي بولدوک هم ګډون وکړ.

تېره اوونۍ دې ته ورته مظاهره په پلازمېنه کابل کې وشوه. د کابل په مظاهره کې افغانانو او په کابل کې مېشتو ترکانو ګډون وکړ.

د تاریخي، مذهبي او کلتوري اړیکو له کبله افغانان له ترکیې سره ځانګړې لېوالتیا لري.

د یو شمېر افغانانو په باور ترکیه په اسلامي نړۍ کې د یوه پرمختللي هیواد په توګه د افغانستان او نورو لپاره ښه ماډل یا بېلګه ګرځېدای شي.

58 total views, 1 views today

Leave a Reply

Your email address will not be published. Required fields are marked *