Categories

اعلان

Loading…

په تخار کې د قوماندانانو ترمنځ نښتې شوي

تاند- د تخار ولایت په رستاق ولسوالي کې د دوو ډلو ترمنځ په قومي بنیاد نښتې، چې له یوې مودې راهیسې روانې دي، پرون /چهارشنبه/ اوج ته ورسېدې.

د تخار د والي ویندوی سنت الله تیمور په رستاق ولسوالي کې نښتې تایید کړې، ویې ویل چې دا جګړې د دوو نامسوولو وسله والو قوماندانانو ترمنخ روانې دي.

خو د سیمې اوسېدونکي وايي چې دا جګړه د ازبک او تاجک قوماناندانو ترمنځ په قومي بنیاد پیل شوې ده.

شاهدان وايي چې په جګړه کې له یوې خوا د ازبک قوماندان بیرم قُل او له بلې خوا د تاجک قوماندان عین الدین کسان برخه لري.

تراوسه پوري د جګړې په نتیجه کې د مرګ ژوبلې په اړه کره معلومات نه دي ترلاسه شوي.

د تخار د والي ویندوی وايي چې د ولسوالۍ مرکز او دفترونه تر دې دمه له جګړو په امان دي.

د جګړې سیمې ته د تخار له مرکز تالقانه ځواکونه استول شوي څو د جګړې اور مړ کړي خو تر نن /پنجشنبې/ پوري څرګنده نه شوه چې دغه ځواک د جګړې مخه نیولې او که نه ده.

په تخار کې له کلونو راهیسي د سیمه ییزو قوماندانانو ترمنخ تربګنۍ شته او دا په داسي حال کې ده چې تېر کال وسله والو طالبانو هم په دې ولایت کې ریښې وځغلولې، د درقد په شمول یې لږترلږه ۳ ولسوالۍ د یوې مودې لپاره ونیولې.

ازیک، تاجک او پښتانه د تخار ۳ لوی قومونه دي خو د دغه ولایت اکثره پښتانه په پاکستان او نورو سیمو کې مهاجر دي ځکه چې مځکې یې زورواکو قوماندانانو غضب کړي دي.

219 total views, 1 views today

Leave a Reply

Your email address will not be published. Required fields are marked *

۸