Categories

اعلان

Loading…

د افغانستان حکومت په هلمند کې د پله باغ بند جوړوي

تاند- د افغانستان د اوبو او برېښنا وزارت سرچینې وايي چې په هلمند کې به د کجکي د پراختیا ترڅنګ پر هلمند سین د «پله باغ» برېښناکوټ هم جوړ کړي.

د افغانستان د اوبو او برېښنا وزارت معین امان الله غالب وايي چې په هلمند ولایت کې به د دغه بند د جوړولو کار ژر پیل شي.

ده دا هم ویلي چې د دغه بند د سروې او ډیزاین کار بشپړ شوی او د جوړېدو په صورت کې به ۹۰ میګاواټه برېښنا تولید کړي.

د غالب په وینا د دغه بند د جوړېدو بودجه منظور شوې ده.

د انرژۍ د چارو متخصصان وايي چې پر هلمند سین، چې د افغانستان تر ټولو ستر سین دی، ۱۰ نور بندونه هم جوړېدای شي.

د افغانستان حکومت پر ځان د بسیاینې لپاره د بندونو په شان د لویو پروژو د جوړولو هڅې زیاتې کړي دي.

په وروستیو کې د هند په مالي مرسته د سلما بند د هندوستان او افغانستان مشرانو د هرات ولایت په چیشت شریف ولسوالي کې پرانست، ورپسې له یوې تورکۍ (تورکۍ) کمپنۍ سره ۱۵۰ میګاواټو ته د کجکي بند د برېښنا د ظرفیت د لوړولو قرارداد لاسلیک شو.

همداراز د افغانستان حکومت د پنجشېر، سالنګ، کابل او کونړ پر سیندونو د ۱۲ نویو بندونو د جوړولو اراده کړې او ویل کېږي چې د دغو بندونو د جوړولو لپاره یې له نړیوال بانک څخه د څه باندې۷ ملیارد ډالره مالي مرستې ابتدايي موافقه ترلاسه کړې ده. د دغو بندونو د جوړېدو په صورت کې به نه یوازې د ټول افغانستان د برېښنا اړتیا پوره شي بلکې یوه لویه برخه به یې ګاونډیو هیوادونو ته صادره کړي.

خو د افغانستان لپاره د دغو بندونو د جوړولو په خاطر د هغو د مالي سرچینو تر برابرولو د ګاونډیو هیوادونو د ورانکاریو مخنیوی ګران کار دی.

په تېرو کلونو کې ایران او پاکستان، چې د افغانستان پرېمانه اوبه یې خاورو ته بهیږي د وسله والو طالبانو او نورو وسله والو ډلو په وسیله د بندونو د جوړېدو مخه نیولې ده. دا په داسي حال کې ده چې ایران له دې فرصته په استفادې د افغانستان د سیندونو اوبو ته څو بندونه جوړ کړي دي.

9 total views, 1 views today

1 comment

  1. نذیراحمد رښتینی Reply

    سلامونه مي ومنئ
    په هلمند کي د پله باغ بند په کومه سیمه کي رغېږي.
    دا خبر ډېر نوی دئ او په هیڅ پروسیجر ئې هلمندیان نه دي خبر.
    که مالومات راته راکړئ.
    مننه!

Leave a Reply

Your email address will not be published. Required fields are marked *