Categories

اعلان

Loading…

د جلال اباد په حمله کې د وژل شویو کسانو شمېر ۹ تنو ته ورسېد

تاند- په جلال اباد کې د هند پر کونسلګرۍ د نننۍ /چهارشنبه/ د حملې تلفات ۹ تنو ته ورسېدل.

دا له ۲۰۰۷ م کال راهسي په افغانستان کې د هند پر دیپلوماتیکو مرکزونو لږترلږه اوومه حمله ده.

د راپورونو له مخې په وژل شویو کې یو افغان پولیس هم شامل دی. په مخکینیو راپورونو کې ویل شوي و چې له ۵ ترهګرو پرته بل څوک نه دي وژل شوي خو شپاړس ملکیان او امنیتي ځواکونه ژوبل شوي دي.

د هند د بهرنیو چارو وزارت وویل چې د دغه هیواد د کونسلګرۍ ټول کارکوونکي روغ رمټ دي او هیڅ راز زیان نه دی وراوښتی.

دغه وزارت د حمله کوونکو ترهګرو شمېر شپږ تنه ښودلی او ویلي یې دي چې ټول د افغان پولیسو له لوري وژل شوي دي.

د هند د بهرنیو چارو وزارت ویندوی ویکاس سواروپ په نوي ډیلي کې وویل، لومړی یوه انتحاري د کونسلګرۍ مخته ځان والوزاوه، دوهم موټربمي چاودنه وکړه، څلور نور د افغان امنیتي ځواکونو له لوري ووژل شول.

ده دا هم وویل چې چاودنو د کونسلګرۍ ودانۍ ته زیان اړولی.

د هند امنیتي سرچینې وايي، د وسله والو ترهګرو او افغان پولیسو ترمنځ د ډزو په تبادله کې ۸ ملکیان وژل شوي دي. سرچینې وايي چې په دې نښته کې، چې دوه ساعته یې دوام وکړ، د لاسي بمونو او بمونو شاوخوا ۱۳۲۰ چاودنې وشوې.

د هند د کونسلګرۍ تبتي ساتونکو هم وروسته د ترهګرو په ځپلو کې له افغان پولیسو سره همکاري وکړه.

نننۍ حمله په جلال اباد کې د هند پر کونسلګرۍ څلورمه حمله وه. پر دې کونسلګرۍ لومړۍ حمله په ۲۰۰۷ م کال شوې وه، په ۲۰۱۳ او ۲۰۱۵ کلونو هم د هند کونسلګري له تروریستي بریدونو سره مخامخ شوې وه.

په ۲۰۱۵ کال په هرات کې هم د هند پر کونسلګرۍ برید شوی و.

په تېرو حملو کې د پاکستاني سختدریځو ډلو لکه لشکر طیبه لاس لرلو ته د تور ګوته نیول شوې وه.

47 total views, 1 views today

Leave a Reply

Your email address will not be published. Required fields are marked *