Categories

اعلان

Loading…

سیګار: د افغانستان د دفاع وزارت لپاره د امریکا په ۱۵۵ ملیون ډالره جوړه شوې ودانۍ زلزله ضد نه ده

تاند- د افغانستان د دفاع وزارت پر نوې ودانۍ نژدې ۱۵۵ ملیون ډالره لګېدلي، خو له دومره زیات لګښت سره سره زلزله ضد نه ده.

په افغانستان کې د امریکا د بیارغونې د سرمفتش د هغه راپور له مخې، چې نن /پنجشنبه/ خپور شو، د افغانستان د دفاع وزارت ودانۍ تر لومړني اټکل ۱۰۶ ملیون ډالره ګرانه او ۵ کاله ناوخته جوړه شوه.

د سرمفتش (سیګار) په راپور کې همداراز ویل شوي:«دا ودانۍ د قرارداد مطابق جوړه شوې او داسي ښکاري چې ښه جوړه شوې وي. موږ ځیني عیبونه پکې وینو چې د هغې د کلکوالي په اړه دي، په تېره بیا د زلزلې په وخت د ودانۍ د جلاکوونکو برخو.»

په ۲۰۰۹ میلادي کال د دې ودانۍ د کار د پیلېدو په مهال په پام کې وه چې په ۴۸ ملیونه او ۷ لکه ډالره تمامه او په ۱۸ میاشتو کې بشپړه شي.

د سیګار د راپور له مخې، دا پروژه هغه مهال د ځنډ ښکار شوه چې د افغانستان ملي اردو د نژدې یو کال په مخه قراردادیان پرې نښودل چې د ودانۍ د جوړېدو سیمې ته لاړ شي. وروسته هوا، امنیت او د پیسو د نشتوالي په شان عوامل د افغانستان د دفاع وزارت د نوې ودانۍ د جوړېدو خنډ شول.

دا پنځه منزله ودانۍ سږ کال (لمریز) بشپړه او افتتاح شوه.

په ودانۍ کې د قوماندې مرکز، خوړنځایونه، د زرو کسانو لپاره ادیتوریم، درملځي او نورې اسانتیاوې شاملې دي.

خو د سیګار راپور وايي چې د زلزلې په وړاندې مقاومت د دې ودانۍ د جوړولو په وخت په پام کې نه دی نیول شوی، په تېره بیا د ودانۍ سره جلاکوونکې برخې زلزله ضد نه دي.

افغانستان یو زلزله لرونکی هیواد دی. د تېر (۲۰۱۵) م کال د اکتوبر په ۲۶ مه د ریښتر په کچه ۷ اعشاریه ۵ درجې زلزلې په افغانستان او پاکستان کې په سلګونو کسان مړه کړل. د دسمبر په ۲۵مه ۶ اعشاریه ۳ درجې زلزلې هم یو شمېر کورونه ونړول او مرګ ژوبلې یې پېښې کړې.

333 total views, no views today

1 comment

  1. لالا ، بټنوال Reply

    که داخبر رښتياوي بايد ساختماني انجنيران اوهغه چاچې دخپلوعایداتو لپاره قانون تر خپو لاندې کړئ سختې څخه سخته جزا وويني ترڅو نورو د بيت المال غلو ته د خطر زنګ و اوسي

Leave a Reply

Your email address will not be published. Required fields are marked *

۸