Categories

اعلان

Loading…

د اسلام اباد د غونډې برخوالو د افغان حکومت او طالب ډلو ترمنځ د فوري خبرو غوښتنه وکړه

تاند- افغانستان، پاکستان، امریکا او چین نن /دوشنبه/ په اسلام اباد کې په خپله څلور اړخیزه غونډه کې د سولې د پروسې لپاره د افغانستان د حکومت او د وسله والو طالبانو د ډلو ترمنځ د مخامخ خبرو اترو پر فوري پیلېدو ټینګار وکړ.

دوی ویلي چې باید دواړه خواوې د افغانستان د یووالي، ملي حاکمیت او مځکنۍ بشپړتیا د ساتنې په هدف د سولې خبرې وکړي.

د څلورو هیوادونو استازو په اسلام اباد کې په خپله لومړنۍ غونډه کې په دې خبره ځانګړی تاکید کړی چې د سولې په مخامخ خبرو کې دې د طالبانو ټولې ډلې برخه واخلي.

دوی دا تاکید هغو اندېښنو ته په پام کړی چې ممکن د طالبانو ځیني ډلې سوله ومني او ځیني حتي د سولې په خبرو کې ګډون ونه کړي.

د اسلام اباد د غونډې په اعلامیه کې همداراز ویل شوي چې د افغانستان جګړه د ټولې سیمې ثبات ګواښي.

د څلورو هیوادونو استازو همداراز موافقه کړې چې بله غونډه به راتلونکې اوونۍ /دوشنبه/ د جنورۍ اتلسمه/  په کابل کې جوړېږي.

لا هم د اسلام اباد د غونډې له لوري سولې ته د جوړ شوي میکانیزم په اړه دقیق معلومات نشته. دوی نه دي ویلي چې په څه ډول د سولې پروسه پر مخ بیايي او د طالبانو کومې ډلې په خبرو کې ګډون کوي او کومې نه کوي.

مخکې الجزیرې ویلي و چې د پاکستان حکومت افغان چارواکو ته د هغو طالبانو چې د سولې په بهیر کې ګډېږي او د هغوی چې ګرد سره سوله نه مني، لیست سپاري.

د اسلام اباد غونډې ته د پاکستان د صدراعظم د سیاسي چارو سلاکار سرتاج عزیز وویل، باید لومړنی او اساسي هدف دا وي چې وسله والو طالبانو ته قناعت ورکړای شي چې د خبرو مېز ته راشي او له جګړې لاس واخلي.

ده همداراز وویل چې باید طالبانو ته وارمخکې شرطونه کښېنښودل شي.

د سرتاج عزیز اشاره د یو شمېر افغان چارواکو له لوري دې غوښتنې ته وه چې طالبان باید تر خبرو مخکې جګړه بنده کړي.

سرتاج عزیز له قوې څخه د کار اخیستلو مخالفت هم وکړ، ویې ویل چې په دې ډول د طالبانو ټولې ډلې خبرو ته نه شي حاضرېدای.

د سرتاج عزیز اشاره هغې موافقې ته وه چې د پاکستان د پوځ لوی درستیز د کابل په وروستي سفر کې له افغان چارواکو سره کړې وه او پر اساس یې ویل شوي و چې که د طالبانو هرې ډلې سوله نه غوښته د هغې خلاف به افغانستان او پاکستان په ګډه پوځي اقدام کوي.

د ملا منصور د ډلې طالبانو تراوسه پوري د اسلام اباد د غونډې او په راتلونکي وخت کې د څلورو هیوادونو له لوري د سولې د پروسې لپاره په ترتیب کېدونکي میکانیزم کې د ګډون کولو په اړه څه نه دي ویلي.

خو د ملا محمد رسول د ډلې ویاند او مرستیال مشر ملا عبدالمنان نیازي د سولې په خبرو کې د امریکا، پاکستان او چین هرراز منځګړتوب رد کړ.

ده د دوشنبې په ورځ رویټرز خبري اژانس ته ویلي:«موږ د سولې د خبرو په اړه څرګند دریځ لرو؛ ټول نیواکګر بهرني پوځیان باید ووځي. مسله د افغانانو ترمنځ ده، او یوازې یې افغانان حل کولی شي. موږ درېمګړي قوت ته اجازه نه ورکوو چې په موږ کې منځګړتوب وکړي.»

5 total views, 1 views today

1 comment

  1. حسن Reply

    ملا منان نیازی ته باید وویل شی چی د خارجی قواوو د راتلو او بیا تر اوسه اوپه راتلونکی کی د پاته کیدو علت اوسبب تاسی یاست. تاسی دوی ته بهانی په لاس کی ورکوی چی دلته جنګ او جګړی دی ، امنیت نشته ، افغانانو او نړیوالو ته د بی امنی سبب کیږی. که تاسی اوربند وکړی او د افغانستان له قانونی او انتخابی دولت سره خبری وکړی نو له یوی خوا به په ګران هیواد کی سوله راشی ، افغانان به نه وژل کیږی ، د خارجی قواو د پاته کیدو لپاره به کوم دلیل نه وی موجود او له بلی خوا به تاسی د یو متمدن انسان په حیث په خپل هیواد کی ژوند کولو حق ترلاسه کړی، که همداسی لجاجت کوی نه تالیب په آرام و ی نه به ملت.

Leave a Reply

Your email address will not be published. Required fields are marked *