Categories

اعلان

Loading…

په مشرانو جرګه کې ادعا وشوه چې د داعش غړي په هیلي کوپترو کې رسول شوي

تاند- په مشرانو جرګه کې نن ادعا وشوه چې دوو بهرنیو څرخکو په وروستیو کې د داعش یا د اسلامي دولت د وسله والې سختدریځې ډلې غړي د ننګرهار سرخرود ولسوالۍ ته رسولي دي.

په مشرانو جرګه کې د پکتیا استازي جمعه دین ګیاني وال له جرګې وغوښتل چې سرخرود ولسوالۍ ته د بهرنیو هیلي کوپترونو په وسیله د داعش د غړیو د رسولو ادعا وڅېړي.

ده وویل چې د روسیې د ولسمشر ولادیمیر پوتین خبره سمه وه چې داعش په افغانستان کې خپله شبکه پراخوي او د افغانستان حکومت یې باید مخه ونیسي.

د مشرانو جرګې مرستیال رييس محمد علم ایزدیار وویل، که د سناتور ګیاني وال ادعا حقیقت وي، د افغانستان د حکومت او افغان ولس لپاره د ژورې اندېښنې وړ ده.

ده وویل، باید د دې ډلې ملاتړ کوونکي وپېژندل شي.

له بلې خوا د افغانستان د مځکنیو ځواکونو عمومي قوماندان جنرال مراد علي مراد خبریالانو ته وویل چې داسي هیڅ راپور نشته چې کومې څرخکې دې په سرخرود ولسوالۍ کې د داعش غړي کښته کړي وي.

خو ده په عین حال کې وویل چې دا ډول راپورونه مطلقاً هم څوک نه شي ردولی ځکه چې د داعش او حقاني ډلې بهرني ملاتړ کوونکي لري.

د ننګرهار والي سلیم کندوزی هم وايي چې داسي راپورونه یې ترلاسه کړي چې د داعش غړي د هیلي کوپتر په وسیله سرخرود ولسوالۍ ته رسول شوي.

ده وویل چې د ولایتي ادارې چارواکو په دې موضوع له امنیتي چارواکو سره غونډه وکړه او په دې اړه یې مفصلې خبرې وکړې.

والي وايي چې د سرخرود اوسېدونکو ادعا کړې چې څرخکې یې په ولسوالۍ کې کښېنستي، خو داسي هیڅ شاهد نه دی موندل شوی چې ووايي په خپلو سترګو یې کومه هیلي کوپتر لیدلې ده.

د داعش غړي د ننګرهار، په اچین، هسکه مېنه، پچیر و اګام او ځینو نورو سیمو کې پراخ حضور لري. دې ډلې په وروستیو کې د خلافت غږ په نوم راډیويي خپرونې هم پیل کړي دي.

5 total views, 1 views today

Leave a Reply

Your email address will not be published. Required fields are marked *