Categories

اعلان

Loading…

بریتانیا وايي ځواکونو ته یې ویلي چې سنګین ته لاړ شي

تاند- بریتانیايي ورځپاڼو نن راپور ورکړ چې د دغه هیواد پوځیان د هلمند سنګین ولسوالۍ ته لېږل شوي دي. دا ولسوالي اوس د افغان امنیتي ځواکونو او وسله والو طالبانو ترمنځ د سختې جګړې میدان دی.

وسله والو طالبانو د سنګین اکثره برخې نیولي او افغان امنیتي ځواکونه د سنګین ولسوالۍ په لوا یا پوځي مرکز کې ځای پر ځای شوي دي.

د راپورونو پر اساس بریتانیايي سرتېرو ته ویل شوي چې د ناټو له نورو ځواکونو سره مرستې ته ودانګي.

دغه وزارت په عین وخت کې ویلي چې بریتانیايي پوځیان به په مستقیم ډول په جګړه کې برخه وانخلي، دوی به یوازې مشورتي رول لري.

په افغانستان کې د ناامنۍ زیاتېدا سبب شوې چې بریتانیا په افغانستان کې پر خپل پوځي رول بیا غور وکړي.

په داسي حال کې چې په بریتانیا کې په دې باب بحثونه روان دي د دغه هیواد د پوځ پخواني لوی درستیز لارډ دانت د بي بي سي راډیو څلورم چاینل ته وویل چې حکومت باید په افغانستان کې د خپل پوځي رول تر پراخولو مخکې ښه غور وکړي.

ده دا هم وویل چې افغانستان اوس د لیبیا او سوریې په پرتله لږ لومړیتوب لري.

د هلمند د والي ویندوی عمر ځواک نن رسنیو ته وویل چې په سنګین کې لا هم سخته جګړه روانه ده.

ده وویل چې له نن سهاره د دولت وسله والو مخالفانو جګړې ته زور ورکړی او د ولسوالۍ ودانۍ یې محاصره کړې ده.

پرون وسله والو طالبانو ادعا کړې وه چې د سنګین ولسوالي یې کاملاً نیولې ده. د هلمند ځینو چارواکو هم د طالبانو د ادعا په تایید ویلي و چې په سنګین کې یوازې لوا پاتې ده، نورې سیمې طالبانو نیولي دي.

دفاع وزارت وايي چې سنګین ته یې کومکي ځواک لېږلی دی خو په سنګین ولسوالۍ کې مېشت امنیتي ځواکونه وايي چې نه د دفاع وزارت او نه د بهرنیو پوځیانو مرسته ورسېدلې ده.

280 total views, no views today

Leave a Reply

Your email address will not be published. Required fields are marked *

۸