Categories

اعلان

Loading…

پریونلیک باندي یوه زیاتونه اوسمونه

 محمدمعصوم هوتک –

ماته مي مېرمن په دې وروستیو وختو کي وایي چي” سړیه! په جدي لیکنو کي احتیاط کوه. خبري کله کله درڅخه خطاکېږي”. رشتیاهم سپین ږیرتوب دغه راز کانې په چاکوي. یو وخت په کابل کي زما محترم استاد علامه رشاد مرحوم د خبرو په ترڅ کي د پښتو ژبي د یوه بل عالیقدر استاد د لیکنو په اړه راته وفرمایل چي د دغه عالیقدر استاد هغه لیکني چي په دې شپو ورځوکي ئې خپروي، یولړ کمزورۍ لري او علت ئې د سِن زیاتوالی دئ او دا لیکني ئې پخواني علمي مقام ته تاوان پېښوي. علامه مرحوم ماته وظیفه راکړه چي دغه پیغام ئې د نوموړي عالیقدراستاد زوم ته ورورسوم. ما دا کاروکړ. اوس هغوی ټول مړه دي خدای دې وبخښي او زموږ ورپسي لارده.

ماپخپل وروستي یونلیک (د کوټي له سیمیناره د حبواخندزاده تر مزاره)کي ورځنۍ پېښي له هغویاداښتوڅخه بیان کړي دي چي دسفر په اوږدوکي مي اخیستي ول. دځینو پېښو یاداښت چي به مي اخیستی نه وو، هغه مي له یاده کیښ. په دې کي دسپټمبر د څورلسمي نېټې هغه لیدنه کتنه وه چي دسیمینارپه یوه وقفه کي مي داستوگني پخپل اطاق کي له ښاغلي انجنیرعبدالبصیرقایم اودهغه له ملگرو(انجنیرعبدالله پوپل او محمدالله احساس)سره کړې وه. ددغي لیدني کتني یاداښت مي پر جلاکاغذاخیستی وو.په دې لیدنه کتنه کي مي دانجنیر عبدالبصیرقایم دکورنۍ ځیني مهم کاغذونه په سرسري توگه وکتل. د یونلیک دلیکلوپروخت حافظې ناځواني وکړه اودغه بیان ئې ټول د مغزپه یوه تیاره کونج کي راڅخه نیهام کړ.

انجنیرعبدالبصیرقایم دحاجي محمدکریم خان زوی اودغازي قایم خان کاکړلمسی دئ چي پلرنۍ مېنه ئې دزابل ولایت دسیوري اولسوالۍ دبادوکلی دئ. بادو د مموکلي څنگ ته پروت دئ.د انجنیر صاحب نیمه کورنۍ هلته په (بادو) کي اوسي اونیمه ئې په کوټه کي میشته ده. انجنیرعبدالبصیرقایم په دغه لیدنه کتنه کي هغه اعزازي لیکونه راښکاره کړل چي دغازي امان الله خان له خوادده نیکه قایم خان کاکړ ته استول سوي ول. دغه اسنادداماني عصر دتاریخ لیکني پر وخت له مؤرخ سره ډېره مرسته کولای سي، نوله همدې اسیته مي انجنیر عبدالبصیرقایم ته سپارښتنه وکړه چي داټول کاغذونه سره تنظیم او کارپروکړي.

انجنیرعبدالبصیرقایم په دغه کتنه کي دمموکلي، دممونیکه دزیارت او هدیرې په باب اوږدې خبري راسره وکړې اوهغه عکس ئې هم را ښکاره کړ چي دممونیکه له قبرسره ئې اخیستی وو. داعکس ماته ښاغلي پښتون زوی پخوارالېږلی وو.

زماپرحافظه دي ټکه ولوېږي،ددغه عکس رابطه ئې دمغزله هغي دوسیې سره تړلې وه چي له ښاغلي ځانواک مفتي زاده سره ئې په همدغه سریناهوټل کي زمادلیدني کتني جریان اوخبري اتري پکښې خوندي سوي وې. ځکه مي نوپه یونلیک کي دعکس د راوي ( انجنیر عبدالبصیرقایم) پرځای دښاغلي ځانواک مفتي زاده نوم وراچولی وو!؟ دې تېروتني یولړغلط فهمۍ پیښي کړې چي زه په خواشینی سوم.اوس چي داخبري دښاغلي قایم په مرسته بیرته زماپه حافظه کي سره سمي اوتنظیم سوې، نوبه له هغوټولوښاغلوڅخه دبخښني غوښتلو پرڅنگ داژمنه وکړم چي په کتابي شکل دیونلیک دچاپ پر وخت به داټول جریان هم پخپل ځای کي ورشامل کړم (انشاء الله تعالی).

22 total views, 1 views today

3 comments

  1. Afghan Shaheen Reply

    دروند او ښاغلی هوتک صاحب د ژوندی وی چی دومره کوچنیو موضوعګانو ته یی هم فکر دی الله ج د تاسو ته اوږد ژوند له روغتیا او سلامتی سره درکړی چی مونږ نور هم ستاسو له لیکنو نه خوند واخلو.

  2. سردارولي پښتون زوی Reply

    مه خوارېږي مشره.
    دا خبره په دوني زحمت نه ارزېده او نه هم موږ بد ګڼېيلې ده، خو چي تا په دوني غټه سترګه راته کتلي، زر واره دي کور ودان .
    زوی مو
    پښتون زوی

  3. Asadullah Reply

    Khuday pak di noor ham pa ilam ki barakat wa cha wa
    Smart people are those who alwayes accept their mistake

Leave a Reply

Your email address will not be published. Required fields are marked *