Categories

اعلان

Loading…

د جیلاني جلان دوه تازه غزلونه

د انکار په اور ماڼۍ باندې ولاړ دی

یار د مار غوندې لکۍ باندې ولاړ دی

نیم لوڅ مخۍ پر بلۍ ولاړه ده که؟

ښکلا لمر د غره په ژۍ باندې ولاړ دی

دا چې سیند دسندریزو تصویرو یم

ستا نظرمې شاعرۍ باندې ولاړ دی

څه منظر دی شین مرغه په بارانه کې

د ګلونو په بګۍ باندې ولاړ دی

دا چې چوپ یم وجه داده انسانیت مې

دچاړې غوندې مرۍ باندې ولاړ دی

شرنګوه یې نڅوه یې ستا جلان اوس

ستا د غږ په موسیقۍ باندې ولاړ دی

===

 

څه ووايي سړی چې یار په څه وخوږیده !؟

دخپل ضد په ډبرو ښوییده وخوږیده

په ګرمو احساساتو کې اورغر و رابهر و

چې بیرته خپل وجود ته ستنیده وخوږیده

له ډیرې مودې وروسته اینې ته مخامخ شوم

په خدای چې پخپل ځان باندې مې زړه وخوږیده

په سیوري سیوري خوب و تر دې حده نازک شوی

چې مازې د لمر څرک پرې پریوته وخوږیده

جلان څه ګرم ؟ جانان و بس د شاتو غوندې خوږ و

یو څه په اشتها مې وخوړه وخوږیده

سیدجیلاني جلان

         کابل

۳۰ لړم ۱۳۹۴

21 total views, 2 views today

1 comment

  1. اجمل راز Reply

    لاندینی غزل مې ډېر خوښ شو، خو په پورتني غزل کې یو څه ستونزې شته لکه دا بیت
    : دا چې چوپ یم وجه داده انسانیت مې
    دچاړې غوندې مرۍ باندې ولاړ دی
    چې باید داسې لیکل شوی وای:
    دا چې چوپ یم وجه داده انسانیت مې
    د چاقو په څېر مرۍ باندې ولاړ دی
    ځکه”چاړه” مونثه کلمه ده چې باید دلته مذکر (چاقو) راشي.

Leave a Reply to اجمل راز Cancel reply

Your email address will not be published. Required fields are marked *