Categories

اعلان

Loading…

د پکتيا ولايت د احمدخېلو او ځاځي اريوب ولسواليو د قومي مشرانو ژمنې

(( مونږ به خپل ګډ دښمن ته د خپلو ولسواليو په يوه لوېشت خاوره کې هم د فعاليت اجازه ورنه کړو، د قومي جوړښتونو په اساس به د نا امنيو مخه نيسو.))

دا او نورې ژمنې د پکتيا ولايت احمدخېلو او ځاځي اريوب ولسواليو قومي مشرانو او مخورو والي نصرت الله ارسلا سره په يوه ګډه ناسته کې وکړې.

د ځاځي اريوب ولسولۍ قومي مشرانو مدير محمد اکبر، ملک محمد انور، ګلفراز او نورو په وار وار خبرې وکړې او ويې ويل چې د خپلمنځي قومي تړون له مخې دوی په خپلو سيمو کې هغو ورانکارو ته اجازه نه ورکوي، چې ژوند يې ګواښي او د ولسونو د پرمختګ مخه ډب کوي.

د احمدخېلو ولسوالۍ قومي مشران ګيله من وو، چې په تېرو کلونو کې ورسره دولتي چارواکو د مور او ميری چلند کړی، خو تر دې وروسته دا ډول توپيري چلند نه غواړي. قومي مشر ملک ګل محمد په خپلو خبرو کې وويل : (( زمونږ ولسونو دولت ته د ملي پوليسو او ملي اردو لپاره خپل خواږه بچيان ورکړي دي، بيا هم چمتو يو چې خپل اولادونه د خپل پوځ ليکو ته ولېږو. ))

يو بل قومي مشر ملک رسول خان بيا پر مخالفينو غږ وکړ چې نور له جګړې لاس واخلي او مسلمان وژنه بنده کړي، هغه ګواښ وکړ که وسله وال طالبان له ملت سره خپلو ظلمونو او نارواو ته همداسې دوام ورکړي، نو پر وړاندې به يې ولسي پاڅون وکړي.

پکتيا والي نصرت الله ارسلا رابلل شويو قومي مشرانو ته ډاډ ورکړ چې د ستونزو د هواري لپاره به کوټلي ګامونه اخلي او ولسونو سره به خپلې سلا مشورې روانې ساتي. نوموړي وويل : (( تاسې د اوسني نظام د راتلو لپاره قربانۍ ورکړي دي او اوس به ستاسې په خوښه د همدې جوړ شوي نظام د پرمختګ او بقا لپاره هم قرباني ورکوئ، د خپل دولت څخه به کلک ملاتړ کوئ، ځکه چې تاسې خپل سرنوشت په خپله ټاکلی، نو اوس تاسې زمونږ حاکمان او مونږ ستاسې خادمان يو.))

والي د خپلو خبرو پر وخت له قومي مشرانو د خپلمنځي يووالي غوښتنه وکړه او هغوی يې وهڅول چې خپل اولادونه د افغان سرتېرو ليکو ته و استوي، د کولتوري محدوديتونو مخه ونيسي او د فساد پر وړاندې په مبارزه کې ورسره کارنده ونډه واخلي.

هېره دې نه وي چې دا په پکتيا کې د ولسي ملاتړ را جلبولو لسمه غونډه ده، چې ولسونه يې ولايت مقام ته ليکلې ژمنپاڼه ورکوي او په بېلابېلو برخو کې خپل دولت سره د ملاتړ هوکړه کوي.

73 total views, 1 views today

Leave a Reply

Your email address will not be published. Required fields are marked *