تاند- ارګ وايي، که پاکستان وغواړي کېدای شي د سولې په بهیر کې د افغانستان ښه ملګری شي.

د ولسمشر غني مرستیال ویاند ظفرهاشمي پرون/شنبه/ خبریالانو ته وویل، پاکستان یوازې هغه وخت د افغانستان ښه دوست ګڼل کېدای شي چې په خپله خاوره کې هغه ترهګرې ډلې وځپي چې په افغانستان کې جګړه کوي.

د ولسمشر ویندوی تاکید وکاوه، که پاکستان غواړي چې د افغانستان په وړاندې ښه نیت څرګند کړي، پکار ده چې د صدراعظم محمد نوازشریف شعار عملي کړي چې کابل ته د سفر په مهال یې ویلي و :«د افغانستان دښمن د پاکستان دښمن دی.»

تېره اوونۍ د پاکستان د مشرانو جرګې غړي مشاهد حسین وویل چې افغان طالبان د پاکستان دښمنان نه دي.

ده همداراز وویل چې پاکستان د افغانستان د سولې لپاره ډېرې هڅې کړې وې خو د هند صدراعظم مودي او د افغانستان پخواني ولسمشر حامد کرزي د خپلو کوچنیو ګټو په خاطر سبوتاژ کړې.

د ولسمشر غني ویندوی ښاغلي هاشمي وویل:«له وسله والو مخالفانو سره سوله بنیادي اړتیا ده خو باید لومړی له پاکستان سره سوله وشي.»

پاکستان په وروستیو کې څو ځلي وویل چې که د افغانستان حکومت وغواړي نو حاضر دی چې د طالبانو او افغان حکومت ترمنځ د سولې د خبرو تابیا وکړي.

خو داسي ښکاري چې د افغانستان حکومت نور د پاکستان پر ژمنو او څرګندونو باور نه کوي.

په وروستیو ورځو کې د افغانستان او پاکستان لپاره د چین او امریکا استازو هم د افغانستان او پاکستان له چارواکو سره د سولې د بهیر په باب خبرې وکړې.

که څه هم د چارو کتونکي باور نه لري چې د هوا تر سړېدو او د ژمي تر راتلو مخکې دې د سولې خبرې پیل شي خو وروستیو دیپلوماتیکو هڅو یوځل بیا هیلې غوړېدلي چې د سولې خبرې به پیل شي.

249 total views, 6 views today

اړوند مطالب

ټرمپ به له عمران خانه په افغانستان کې سوله وغواړي خو عمران خان پیسې غواړي  اسدالله خان: پاکستان دې کرکټ کې له موږ مرسته وغواړي ګراهم: له ټرمپ څخه به وغواړي چې له افغان او پاکستاني مشرانو سره وویني په سلو کې ۹۲ افغانان وایي چې هندوستان د پاکستان په نسبت د افغانستان ښه دوست دی ولسمشر غني وايي، که طالبان وغواړي بیا هم اوربند کېدای شي ټرمپ: موږ د پاکستان پر پناهځایونو نور غلي نه شو پاتې کېدای