Categories

اعلان

Loading…

هلمند مدني ټولنې او ولايتي شورا د مخابراتي شبکو پر بندېدو غبرګون وښود

مسؤلينو د يو رسنيز کنفرانس له لارې ګواښ وکړ، که په دوه ورځو کې د هلمند مخابراتي شبکو فعاليت پيل نه کړ نو دوی به يې انتنونه ونړوي.

خبریال: بصيرالحق عادل

دوی وروسته له هغه غبرګون وښود چې له تېرو درې ورځو راهيسې په مرکز لښکرګاه او ولسواليو کې شخصي مخابراتي شبکې کار نه کوي، چې له امله يې خلک له ګڼو ستونزو سره مخ شوي دي.

د هلمند ولايتي شورا مشر محمد کريم اتل وويل، له يوې خوا هلمند له امنيتي ستونزو او ګواښونو سره مخ دی او بلو پلو د مخابراتي شبکو فعاليتونه ځنډېدل ددې لامل شوي چې د خلکو اندېښنې نورې هم ډېرې شي.

هغه وويل، د مخابراتي شبکو بندېدل دښمن سره مرسته کوي چې د افغان دولت په وړاندې ستونزې نورې هم ډېرې کړي.

اتل له مخابراتو او مالوماتي ټکنالوژۍ وزات وغوښتل چې په دې اړه دې خپله وروستۍ پرېکړه اعلان کړي.

د هلمند ولايتي شورا مشر ګواښ وکړ که چېرې په دوه ورځو کې دغلته مخابراتي شبکې خپل خدمات پيل نه کړي، نو دوی به يې انتونه ونړوي.

بل پلو د هلمند مدني ټولنې مشر سردار محمد همدرد وايي، لښکرګاه او ورڅېرمه سيمو کې د مخابراتي شبکو خدمات ځنډېدل د دولت کمزوري ښيي.

همدرد اندېښنه وښوده که نوموړې شبکې بېرته فعاله نه شي نو خلک به له ګڼو ستونزو سره مخ شي.

هغه وايي، ټولو مخابراتي شبکو د جواز په اخيستو هوډ څرګند کړی و، چې خلکو ته به خدمات وړاندې کوي.

هلمند مدني ټولنه او ولايتي شورا په داسې حال کې دغلته د مخابراتي شبکو د فعاليتونو پر ځنډېدو غبرګون ښيي چې له تېرو  دوه ورځو راهيسې هلمند کې ټولې شخصي مخابراتي شبکې کار نه کوي چې په ټول هلمند کې خلک يو د بله له حاله نا خبره دي.

دغلته چې له يوې خوا جګړه روانه ده، بل خوا خلک هم د ټليفوني شبکو د فعاليت د ځنډېدو له امله له ګڼو ستونزو او اندېښنو سره مخ دي.

42 total views, 1 views today

Leave a Reply

Your email address will not be published. Required fields are marked *