Categories

اعلان

Loading…

په غزني کې د کابل- کندهار لار بنده ده، په دوو سیمو کې جګړه روانه ده

تاند- په غزني کې چارواکو نن تایید کړه چې د دغه ولایت په ساحه کې د کابل – کندهار لویه لار نن هم بنده ده.

وړمه شپه وسله والو طالبانو د غزني ښار په لوېدیځ کې د سپندې په سیمه کې د څو ساعتونو لپاره سړک ونیوه، یو مهم پُل یې والوزاوه او مخکې تر دې چې د امنیتي ځواکونو له لوري له لویې لارې وشړل شي، په سیمه کې یې ماینونه کېښودل.

د غزني ولایتي چارواکي وايي چې نن د غزني په شهباز سیمه او دغه راز د اندړ ولسوالۍ په ناني کې جګړه روانه ده.

دا دوې سیمې تېره شپه بې پېلوټه الوتکو بمباري کړي دي چې په نتیجه کې یې لږترلږه ۲۰ وسله وال طالبان وژل شوي دي.

وسله والو طالبانو پرون غوښتل چې اندړ ولسوالي ونیسي خو وځپل شول، نن یې بیا د دې ولسوالۍ د ناني سیمې د نیولو لپاره جګړه پیل کړې ده.

د غزني مرستیال والي وايي چې طالبانو نن یو شمېر نور پلُونه او پُلچکونه نړولي او لاره یې بنده کړې ده.

له بلې خوا له کابل څخه غزني ته تازه دمه ځواکونه استول شوي څو د طالبانو د وروستیو بریدونو مخه ونیسي.

ویل شوي چې په نښتو کې لږترلږه ۵ ملکیان وژل شوي او ۵ نور ژوبل دي. په وژل شویو کې یوه ښځه هم شامله ده.

که څه هم د طالبانو او امنیتي ځواکونو د تلفاتو د دقیق شمېر په اړه کره معلومات نشته خو د غزني مرستیال والي محمد علي احمدي وايي چې په تېرو دوو ورځو کې ۶۷ وسله وال طالبان له منځه وړل شوي او ۴۱ ټپیان شوي دي.

طالبانو په دې اړه تراوسه څه نه دي ویلي.

پرون د افغانستان ولسمشر د بغلان امنیه قومندان امین الله امرخېل د محمد حکیم انګار پر ځای د غزني امنیه قومندان وټاکه. انګار درې میاشتې مخکې د عزني امنیه قومندان ټاکل شوی و.

11 total views, 2 views today

Leave a Reply

Your email address will not be published. Required fields are marked *