Categories

اعلان

Loading…

د حقاني شبکې بنسټګر جلال الدین حقاني یو کال پخوا مړ شوی دی

تاند- تازه راپورونه، چې نن /جمعه/ خپاره شول، وايي چې د حقاني شبکې موسس او د جهاد د دورې مشهور قومندان جلال الدین حقاني څه باندې یو کال پخوا مړ شوی دی.

د جلال الدین حقاني د مړینې په اړه پخوا هم څو ځلي راپورونه خپاره شوي خو د طالبانو او حقاني شبکې سرچینو رد کړي وو.

د طالبانو د اسلامي تحریک د مشر ملا محمد عمر اخوند د مړینې د خبر له اعلانېدو دوې ورځې وروسته د طالبانو او حقاني شبکې د سرچینو په قول لوېدیځو رسنیو وویل چې جلال الدین حقاني یو کال وړاندې مړ شوی دی.

د حقاني په اړه ویل کېدل چې سپین ږیری شوی او عملاً د ده د شبکې ټولې چارې د نوموړي زوی سراج الدین حقاني پرمخ وړي چې د ملا محمد عمر د مړینې له تاییده وروسته د طالبانو د تحریک د نوي مشر ملا اختر محمد منصور مرستیال ټاکل شوی دی.

راپورونه وايي چې د جلال الدین حقاني مړی په خوست کې خاورو ته سپارل شوی دی.

جلال الدین حقاني، چې عمر یې تر اویا کلونو اوښتی و، په اتایمیه لسیزه کې د پخواني شوروي اتحاد د سرو لښکرو په وړاندې په جهاد کې خورا مهمه ونډه لرله.

د امریکا او افغان استخباراني سرچینو په وینا د حقاني شبکه د تېر کال تر جون میاشتې پوري په شمالي وزیرستان کې دېره وه.

پر جلال الدین حقاني او د هغه پر زوی سراج الدین حقاني د امریکا متحدو ایالتونو ۱۰ ملیون ډالره جایزه ایښې وه.

د حقاني پر شبکې تور دی چې د لویو ښارونو حملې په تېره بیا د هند د سفارت او کونسلګرو بریدونه یې تنظم کړي دي.

د جلال الدین حقاني درې زامن د امریکا د بې پېلوټه الوتکو په حملو کې وژل شوي او یو زوی یې په ۲۰۱۳ م کال په اسلام اباد کې د نامعلومو وسله والو په ډزو ووژل شو.

30 total views, 1 views today

2 comments

  1. بادام Reply

    جهاد د افغانستان مظلوم ملت کړی دی اما جلاالدېن او ددی په شان نورو په جهاد سودا کړی ده دا به د جهاد دکلمی سره هېڅ انصاف نه وی چه دهر سوداګر دپاره دا سپېڅلی لفظ استعمال شی جلاالدېن فقط او فقط ېو سوداګر وو او د خوشحالۍ ځای دې چه خدا تری خلاص کړو ، دی او ددی ‌‌‌‌‌‌ډلی په پکتېکا او پکتېا او خوست کی زمونږ دېر بی ګناه هېوادوال په شهادت ورسول چه ښی بېلګی په پورتنېو ولاېتونو کی ځانمرګی برېدونه وو

  2. (محمداحسان ( احسان Reply

    چې هر څنګه عمل یې کړي اوس به مالک ذات ځپله فیصله ورته اعلان کړې وي !

Leave a Reply

Your email address will not be published. Required fields are marked *