Categories

اعلان

Loading…

ټالیب او داعش، یوه چټکه پرتله/مجید قرار

په دې ورځو کې د ټالیبانو ځینو مفتیانو په داعش پسې را اخیستې ده چې ګواکې دا ډله تکفیري ده. وایي غلبیل کوزې ته، که کاسې ته ویل چې ستا بېخ سوری دی. هلکه مفتي صاحب، چې داعش تکفیری دی، نو تا دا دېرش کاله په څه نامه مسلمانان ووژل؟

تر داعش خو ستا منطق کمزوری دی، ځکه داعش یو چا ته کافر وایي، د کافر او مسلمان لپاره ځانګړی تعریف لري، د هغه پر اساس وایي، تا خو به مسلمان ته منافق ویل، حال دا چې منافقت معلومول له سره د انسان د وس کار نه دی. منافقان به آن د پیغمبر صلی الله علیه وسلم په زمانه کې هم په وحی معلومېدل. نفاق د زړونو کار دی، او د زړونو مالک خدای پاک دی. یعنې تا نه یواځې دا چې پر مسلمان بد ګوماني درلوده، بلکې العیاذ بالله د خدایۍ دعوه دې هم کوله.

ټالیب داعش ته د وحشت او بربریت نسبت کوي. ما خو تر اوسه نه دي اورېدلي چې داعش دې څوک د موچي په تار حلال کړی وي، یا دې یې د مړیو په خېټه کې موټر سایکل تېر کړی وي، یا دې د مړیو په ستونو کې تېزاب ور چپه کړي وي. ما خو دا هم نه دي اورېدلي چې داعش دې د اربکي ورا او واده ته بم اېښي وي او ماشومانې نجونې دې یې الوزولي وي. دا بېله خبره ده چې داعش خپلې سزاګانې علني او پر ویډیوګانو خپروي او ستا وحشتونه د پښتنو د بې سوادۍ له امله د اختناق په مقبره کې دفن کېږي او تر دوهم کلي اخوا څوک نه پرې خبرېږي. همدا تا یوه میاشت مخکې د بدخشان په وردوج کې د سرتېرو سرونه غوڅ نه کړل؟ پرون دې په جلرېز کې مثله ونکړه؟ آیا داعش تر اوسه پر مړیو مثله کړې ده؟

ته داعش ته د استعمار د لاس آله بولې. آیا تر اوسه چا په پېښور، کویټه، اسلام آباد یا قطر کې د داعش مېلمستون او دفتر لیدلی چې امریکایي پیره دې پرې ولاړه وي؟ داعش که وحشي دی، که خوارجي دی، که تکفیري دی، ستا په څېر د ذلت او سرکوزۍ داستانونه خو لا نه لري. ستا په څېر خو په اوړي کې مېرمنې پنجابیانو ته په ګرو نه ور پرېږدي. داعیه خو یې پاکستانۍ نه ده. دا خو نه کوي چې د احمد شاه بابا او میرویس نیکه پولې پر پنجابیو قدمونو پایمالوي خو افغان قدم ته بیا دا اجازه نه ورکوي چې د ډیورنډ یهودي کرښه پایمال کړي.

دا چې داعش چا جوړ کړ، څنګه یې جوړ کړ، په دې نه غږېږم، ځکه هغه خبرې موږ ته تاسې عادي کړي دي. که ستا سرچینه معلومه وای، د داعش پوښتنه به مو هم کړې وه. که ستا نسب تر کرنل رفیق تارړ او نصیرالله بابره نه رسېدای، د هغوی په سلسله به مو هم شک کړی وای خو د سیاسي حراموني توب خبره تاسې دومره را ته عادي کړه چې اوس سم حرامونی شهزاده را ته ښکارېږي، خو د داعش او ستاسې یو عمده تفاوت شته دی. د داعش لومړی کار دا وچې دولت یې جوړ کړ، بیا یې د نړۍ پر مسلمانانو له تبعیض پرته ور ناره کړه چې راځئ، دا ستاسې ټولو هېواد دی.

تا بالعکس، خپله د عسلو مچۍ، لوی ملا صاحب، او د عسلو د مچۍ ځاله، یعنې خپله د امارت شورا د انګلو-محمدي د انګرېزي قانون په ونه پورې څرخه کړه. دارالاماره دې کویټه، پېښور، کراچۍ او اسلام آباد شول. یعنې ستا امارت دومره وړوکی و چې د پاکستاني ډیموکراسۍ (جمهوریت) په یوه څنډه کې، په یوه جېب کې ځایېده. هلکه، لومړی به دې د امارت المومنین دعوه نه کوله، بیا چې دې کوله، د پنجابي د تخرګ سپږه خو به دې له ځانه نه جوړوله. هم دې امارت وشرماوه، هم افغانیت. تا خو یواځې او یواځې د افغان دښمني وکړه. هماغه امریکا دې په اسلام آباد او قطر کې سکنۍ خور وه چې په افغانستان کې به دې د هغې د غلامۍ په بهانه خوار افغانان وژل.

ټالیب داعش ته نالوستي او کم علمه وایي.

نو که اوس د امارت د نسواریانو او داعش د ماسټرانو او دکاتره وو سواد پرتله کوو، دا خو هم ظلم دی. د داعش مشر دوکتورا لري، د ټالیب په ټول امارت کې له له نعیم وردګ پرته چې قطر ته د ترجمانۍ لپاره انتقال شو، یو فاکولته لوستی او د رسمي تعلیم څښتن را وښیه. ملا عمر اخوند یې خپله یو مثال دی چې بې ته په پښه ټکی ورکوي او د لاسلیک پر ځای پونده لګوي.

زما د دې لیکنې هدف د داعش سپیناوی نه دی، خو له حقایقو سره باید ظلم ونشي. ټالیب له خپله مجاهد ورور سره ناځواني کوي. د خپل ګوانتانامو او باګرام د زندان له ورور سره جفا کوي. دا جفا ټالیب تر دې پخوا له خپل بل ورور، حزب اسلامي سره هم کړې وه چې د خپلو نسواریانو د نه اطاعت په بهانه یې هغوی له روان – په اصطلاح- جهاد څخه منع کړي ول. په تېرو څوارلسو کلونو کې ټالیبانو دومره حزبیان ووژل چې امریکایانو نه ول وژلي. د دې کار یواځېنی دلیل پر دې جنګ د سیګرېټي پنجابیانو پر ځای د نسواري پنجابیانو د انحصار ساتل و.

د خوارجو په اړه چې کوم حدیثونه ټالیب پر داعش تطبیقوي، هغه تر داعش مخکې پر ټالیب عملي کېږي. په حدیث شریف کې راځي چې یوه ډله به وي، سفهاء الاحلام، یعنې بې عقل، احداث الاسنان، یعنې کم سنه به وي. کم سنه هلکان تر داعش په ټالیب کې زیات دي او سفاهت او حماقت په نري، ګولډان، منګل باغ او نورو نالوستو کې تر داعش زیات دی. په حدیث شریف کې له امارة الصبیان، یعنې د هلکانو له امارت څخه پناه غوښتل شوې ده. د هلکانو امارت ستاسې برانډ دی.

دا دی اوس یو ځل بیا واضحه شوه چې ټالیب د کوم فکر، ایډیالوژۍ یا مذهب لپاره نه، بلکې د پنجاب د سپېرو ګټو لپاره افغانان، د افغانستان سرتېري خو څه چې خپل – په اصطلاح – مجاهد وروڼه هم وژلای، بدنامولای، تکفیرولای او ګمراه ګڼلای شي.

151 total views, 1 views today

11 comments

  1. ابو طالوت خراساني Reply

    البته که زه د قرار سره سخت عقیدوي او سیاسی اختلافت لرم خو نن باید ووایم چې ریښته د اسلامي دولت او طالبانو کې د ځمکې او آسمان فرق دی، طالب یو پاکستاني عاله ده ولی بیا اسلامي دولت ریښتیا یو انقلابی او اسلامي تحریک دی چې هم یې ریښتنې خلافت جوړ کړو او هم یې د شریعت نفاذ کړې. خپل دوست او دښمن په سمه توګه تعریفه وي.

    زه په خپله پخوانی طالب وم او ما ته ددوئ دین او مذهب ښه مالوم دی.
    https://abutalut.wordpress.com/2015/07/04/%d8%af-%d8%b7%d8%a7%d9%84%d8%a8%d8%a7%d9%86%d9%88-%d9%be%d9%87-%d8%a7%da%93%d9%87-%db%8c%d9%88-%d8%aa%d8%b1%db%8c%d8%ad-%d8%ad%d9%82%db%8c%d9%82%d8%aa/

  2. عبدالله آشنا Reply

    ښاغلي قرار داعشي صاحب!
    لدې لیکنې خو دې په ډاګه دا ښکاري چې هغه ګونګوسې ورو ورو د حقیقت لوري ته نږدې کیږې چې په افغانستان کې داعش د پاکستان او په افغانستان کې د اوسني رژیم د طالبانو په وړاندې یوه ګډه سیمیېزه او په عین حال کې نړیواله پروژه ده.
    که داسې وي، بیا خو ستا لیکنه د داسې یوې تورې لوبې اصلي بڼه را برسېره کوي چې کلونه کلونه بیا افغانستان بیا هم په دغه اوسني اور کې سوځیږي. بیا به یې هم د افغان بېوزله کور ورانېږي ، که نورو د پردیو په لاس زمونږ بچیان وژل، دا ځل به هم افغانان تاسو د پردیو لوبو لپاره ووژنئ.
    هرهغه څوک د ګران افغانستان، افغان مسلمان او غیرتي ولس او اسلام په زیان وي، الله تعالی یې دې تباه او هلاک کړي، که هغه همدا اوسنی رژیم وي، که طالبان وي او که داعش وي او که نور…

  3. محمد داود یتیم یار Reply

    باید خبره له شف شف نه شفتالو ته ووځی او هم دی اوبه له مالګی څخه جداشی ( دود کا دود پانی کا پانی

    که دشمال ټلوالی مشر عطا محمد مو په روس او ایران پلوری او ځانته یی په مزار کی بله پادشاهی جوړه کړی او له بلی خو په پاکستان کی ناست طالبان مو په پاکستانی پنجابیان وطن اومونږ خرڅوی بیا خو دا ترټولو ښه ده چی داعش مو لدی دواړه مفسدینو څخه خلاص کړی بیا پاتی شوه د داعش خبره بیا به هغی سره ګور و خو اوس ددغو لستونی مارانو څخه خلاصیدل دوخت یو اړینه خبره ده زما پل نظر دی دادی چی ولسمشر غنی دی له قاطیعت څخه کارواخلی دمزار لپاره دی یو نوی والی تعین کړی که چیری عطامحمد نافرمانی وکړه سمد لاسه دی اشرف غنی علما راوغواړی او دیاغی فتوا دی بری ولګوی او واجب القتل اومباح الدم دی وګرځوی بیا دی اردو ورپسی مرش کړی که چیری په اردو کی کوم داسی عناصر پیدا شی چی د عطا څخه ملاتړ وکړی هم پروا نکوی صف به تصفیه او دملی حاکمیت لپاره به لیاره هواره شی په داسی شرایطو کی بیا ولس حاضر دی چی دداسی زور واکو په مقاابل بیا څه کوی فقط پر اولس غږ پکاردی

  4. سیدمرجان هڅاند Reply

    بې له شکه حقایق مو را سپړلي دي، روان اوسې

  5. Zadran Reply

    Salammoona
    Your right Majeed brother.

  6. H.Z.S. T. Reply

    Zi wayim tor-spey d` livah wror dey(sag-e zard birader-e cshaghaal~)
    Na kal bemaned na kaddo; d`AfghanPashtun ulus bela sar-e herdu!!

  7. عصمت الله Reply

    رښتیا ته به رښتیا وایو مجید قرار چې ما به ورته مجید ید ویل
    ټول حقایق رسپاړلی دي مابه ویل چې دمجید قرار مطلق کافر دی
    خو دده عقیده که جمهوري نه وي او سیکریزم نه ورسره نه وی ملګری
    دطالبانو ښه مسلمان ما بیا دمجید قرار نه بل نه شو موندلی
    زه داوام چې ما ۱۳ کاله په طالبانو کې وکړو زه یو مجاهد وم ددوی خو په ډټوله دوره کې ما دافکر کاوه چې خلافت دپآره زمونږ دغه جنګ یا جهاد دی خو زه اوس په دې پوه شوم چې دوی داعش خلاف وکړ دوی صرف دپردیو اسعفباراتو دپاره جګړه کوي جهاد نه ولې چې داعش وله په دین له دوی ښه پوهیږي قوم نژادی تعصب نه لری او دنړۍ ټولو مسمانانو ته په یوه سترګه ګوری خپله خاوره نه نه خبرابوي بلکه جوړوي اقتصادي پروژی او کارونو ته ډیر پآم دی دین خو دې خلک له دوی زده کوي
    زه داتپوس دخپلو طالبانو نه کوم
    چې تاسو خو اشرفی عنی ته ته منافق او فاسق وایی داعش وله ورته مرتد وایی
    نو تاسو په کوم دلیل وژنی ایا دفاسق مرګ جایز دی
    تاسو ملی اردو ته اجیر وایی او داعش وله ورته مرتدوایی
    داچې اجیر دی تاسو په کوم دلیل وژنی ایا داجیر مرګ داسې جایز دی کوم چې تاسو وژنی
    که جایز وي نو بیا خو ستاسو زمونږ ټولو مرګ جایز دی خکه زمونږ نه خو لوی لوی اجیران نشته او که زمونږ اجیر توب نه څوک انکار کوي بیا دغول خوري دروغ ځکه مونږ خپله لیدلی دي چې دتورمخو په پټکونو په اشارو او په تلیفونی ربطو به تیریدو او وسلو انتقال او اخیستو لارې مونږ ته چا ښودلی او دومره ډیرې پسې هرمیاست مونږ ته چارالیږلی
    بل داچه اوس داعش سره په کوم دلیل جګړه کوئ چې هغې شریعت هم له تاسو ښه جاری کړیدی تریاک او نشه یی توکې بند کړ او تاسو پرې تجارتونه کوئ
    مجید قرار ته دخیر وي په دې لیکنه

  8. zyar Reply

    قرار يو رښتينی روښاند ليکوال دی، ده خو د يوه په ټکونه هغه بل هم ټکولی او افشا کړی دی، دومره ژر پرې دا تور مه
    گوئ،دروغ د ايمان ږيان دی
    ستاسې د گردو زيار

  9. شیر ساپی Reply

    د طالبانو مرموزه پروژه دپښتنو دزوال او نابودي پروګرام دي
    د مثال په ډول
    د منځنۍ پښتونخوا ((۷)) اجینسي او دافغانستان سرحدی ساحي عملأ له میشته پښتنوخالی شوې او دجنګ ډګر وګرځید
    پاکستان د طالبانوپه نامه د جهاد دوران یعنی دافغانستان اضمحلال په نوې بڼه له سره راونیو
    طالبان یعنی د پښتنو زوال او داعش یعنی د اسلام کمزوري
    طالبان محلی پروژه ده او داعش بین المللی
    .
    .
    .

  10. sardar Reply

    قرار صیب ، طالبان خو رښتیا هم د پاکستان ګوډاګیان دی او خدای د دوی سپیره ورک کړی

  11. jamal Reply

    زه د طالبانو پلوی نه کوم اود دوی اعمالوسخت مخالف یم خوقرارصیب داعش تاسو په سمه توگه ندی لوستی

Leave a Reply

Your email address will not be published. Required fields are marked *