Categories

اعلان

Loading…

زه ښځه يم/ د صالح محمد صالح ژباړه

زه ښځه يم، ښځه.

 د حوا لور، له اسمانه رالېږل شوې د رڼا هغه سپېڅلې او پاکه غوړشکه چې له پېړيو راهيسې يې دا ځمکه روښانه کړې ده.

زه ښځه يم، ما د مينې رنګين ګلان وټوکول، دا نړۍ مې په جنت بدله کړه.

ما نارينه ته په ګېډه کې ژوند ورکړ، ورته مور شوم او په پښو تګ مې ورزده کړ.

 خور يې شوم، په غوږ کې مې د ماشومتوب خوږې کيسې ورته وويلې.

محبوبه يې شوم او ژوند مې ورته په ورېښمينو نغمو کې ونغاړه.

د ژوند ملګرې يې شوم، د خپلې ځوانۍ په نايابو غوټيو مې ورته شپه او ورځ سينګار کړه.

دا زه وم چې د ژوند په لوړو ژورو کې ګام په ګام پر سختو لارو د دوست غوندې ورسره تر څنګ ودرېدلم.

او له دې هرڅه وروسته مې ځان ورک کړ.

 زه، يعنې ښځه، د رڼا هغه غوړشکه سر تر پايه په سړي کې بسيا شوم.

په هر مذهب کې زما دغه بېسارې قرباني په زرينو تورو ليګل شوې، زه يې د عظمت پر هغه لوړه څوکه کښېنولې يم، چې هلته په رسېدو سره انسان ستروالى مومي.

خو دا حقيقت نه سراب دي. لکه په رېګستان کې د اوبو د جزيرې خيال.

پېړۍ اوړي خو لا هم هره شېبه مې دغه بېره ځوروي، چې:

کله بله د عظمت له هغې لوړې څوکې رالوېږم؟

کله به د نڅاخونې کوم کونج ته اچول کېږم؟

کله به په قمار کې راباندې داو لګول کېږي؟

کله به اړ ايستل کېږم د خپلې سپېڅلتيا د ثبوت لپاره ځان لمبو ته واچوم؟

کله به په توره وژل کېږم؟

کله به د هوس په بازار کې ليلام کېږم؟

کله به نکاح او د چا په نوم، يا کله به طلاق او ورڅخه پردۍ کېږم؟

کله به زما د پت او عزت دغه ساتونکى نارينه، په خپل لاس ما بې پته کوي؟

ځکه چې زه يوه ښځه يم.

يوه ښځه.

سرچينه: د نکاح فلم پيليزه

17 total views, 3 views today

1 comment

  1. Hamidullah Reply

    د دی عکس په لیدلو د هر انسان وینه په جوش راځي کاشکی هغه کوډګر او جادوګر هم همداشان ووژل شی او هیله لرم چی د دی کوډګرو او نعویزګرو تغر د افغانستان څخه ټول شی او ټول د خپلو اعمالو په سزا ورسيژی

Leave a Reply

Your email address will not be published. Required fields are marked *