تاند- د افغانستان ایکسپریس ورځپاڼې له چلوونکو څخه وروسته له دې پوښتنې – ګروېږنې پیل شوي چې د افغان چارواکو په وینا په یوه خپره کړې مقاله کې یې اسلام ته سپکاوی کړی دی.

د افغانستان د ملي امنیت د ریاست او د اطلاعاتو او کلتور د وزارت له لوري د افغانستان ایکسپریس ورځپاڼې له چلوونکو څخه د افغانستان د ولسمشر او اجرايي رييس په غوښتنه تحقیقات کېږي.

د چهارشنبې په ورځ په کابل کې افغان چارواکو وویل چې تراوسه پوري په دې تړاو څوک نیول شوي نه دي.

خو واشنګټن پوسټ ورځپاڼه د افغانستان ایکسپریس د یوه پخواني کارکوونکي په قول وايي چې د د دې مقالې په ارتباط څو تنه نیول شوي دي.

د ملي امنیت ریاست او د کلتور وزارت ویندویانو واشنګټن پوسټ ته د چهارشنبې په ورځ وویل چې د چا د نیولو په اړه تراوسه پرېکړه نه ده شوې.

افغانستان ایکسپریس، چې په انګلیسي ژبه خپرېږي، د تېرې اوونۍ د چهارشنبې په ګڼه کې د دې مقالې، چې عنوان یې و:«د طالبانو او داعش اسلام»، له خپرولو وروسته معذرت وغوښت.

د افغانستان ایکسپریس ورځپاڼې چلوونکي په یوه لیک کې ولیکل چې دا لیکنه د دوی او د اسلام د مقدس دین نظر نه څرګندوي. دوی د دې تېروتنې په خاطر ژوره بخښنه غواړي او غواړي چې ووايي، دا د دوی د پالیسۍ خلاف ده. «لطفاً تر څو چې مو حقایق نه وي درک کړي زموږ په اړه قضاوت مه کوئ.»

په لیک کې د ورځپاڼې چلوونکي خپل نوم نه و څرګند کړی ځکه چې خپل سر ته د خطر له کبله نه غواړي چې وپېژندل شي.

خو د افغانستان ایکسپریس ورځپاڼې له معذرت غوښتلو سره سره افغان چارواکو چټک او تېز عکس العمل وښود.

د دوشنبې په ورځ د افغانستان د وزیرانو شورا وویل چې دې مقالې د اسلام اصول او ارزښتونه نقض کړي دي.

د وزیرانو شورا د دې مقالې په لیکلو او چاپولو کې د لاس لرونکو پرخلاف د سختو اقداماتو امر وکړ.

ولسمشر اشرف غني احمدزي هم له یو شمېر سني او شیعه عالمانو سره په کتنه کې د دې قضیې د جدي تعقیب غوښتنه وکړه.

ښاغلي غني وویل چې دې مقالې ټولو مسلمانانو ته توهین کړی او امر یې وکړ چې د کلتور وزارت دې دا قضیه په جدي ډول وڅېړي.

د افغانستان د اساسي قانون او دغه راز د مطبوعاتو له قانون سره سم افغانان د بیان ازادي لري خو په دغو قوانینو کې ویل شوي چې د اسلام پرخلاف باید هیڅ راز لیکنه خپره نه شي.

116 total views, 1 views today

اړوند مطالب

د جرمونو نړیواله محکمه د افغانستان د جنګي جرمونو په اړه تحقیقات کوي ایکسپریس تریبیون وايي، داعش ته په خیبر پښتونخوا کې منظمې پیسې ټولېږي ایکسپریس تریبیون: طالبان ښايي ژر له افغان حکومت سره خبرې پیل کړي د پاکستان حکومت وايي، د افغانستان حکومت دې د تورخم د پېښې په اړه تحقیقات وکړي ناټو د پکتیکا د وژل شویو کسانو په اړه تحقیقات کوي د کرکټ نړیواله شورا د افغانستان او هانګ کانګ د مسابقې په اړه تحقیقات کوي