Categories

اعلان

Loading…

افغانستان او ترکیې د ستراتیژیکو همکاریو تړون لاسلیک کړ

تاند- د ترکیې ولسمشر رجب طیب اردوان نن /شنبه/ افغانستان ته د خپل سفر په لړ کې د افغانستان او ترکیې د ستراتیژیکو همکاریو تړون له افغان ولسمشر اشرف غني احمدزي سره لاسلیک کړ.

تر دې مخکې افغانستان د امریکا، هند، بریتانیا، ایټالیا او فرانسې په شمول د نړۍ له یو شمېر نورو مهمو هیوادونو سره د ستراتیژیکو همکاریو تړونونه لاسلیک کړي دي. خو ترکیه لومړنی اسلامي هیواد دی چې له افغانستان سره داسي تړون لاسلیکوي.

په دې تړون کې د دوو هیوادونو ترمنځ د کرنې، کانونو، ترانسپورت، بیارغونې او د وړو او لویو تصدیو د ښه کېدا په شمول پر اقتصادي انکشافاتو تمرکز شوی دی.

د دوو هیوادونو ترمنځ د ستراتیژیکو همکاریو د عملي کولو لپاره به یو کمیسیون جوړ شي او د دواړو هیوادونو ولسمشران به د پروژو د پرمختګ په اړه کالنۍ غونډې کوي.

ولسمشر اشرف غني احمدزي وویل چې د دې تړون لاسلیکېدا د دوو هیوادونو ترمنځ د اوږدمهالو همکاریو لار اواروي.

ښاغلي احمدزي همداراز وویل چې ترکیه به د افغانستان له حکومت سره مرسته وکړي چې افغانستان د ترکمنستان او کسپین سمندرګي له لارې له ترکیې سره وصل شي او د دې ترڅنګ به له افغانستان سره د هوايي چلن په برخه کې کومک وکړي.

د دواړو ولسمشرانو د خبرو په اړه د ارګ اعلامیه:

ولسمشر احمدزی: په ترکیه کې د اقتصادي اصلاحاتو له پروګرامونو څخه به په افغانستان کې هم استفاده وکړو

د افغانستان ولسمشرډاکټر محمد اشرف غني احمدزي د ترکیې له ولسمشررجب طیب اردوغان سره له کتنې وروسته په یوه ګډه خبري ناسته کې وویل: هغه اصلاحات چې د ښاغلي اردوغان د نوښتګر سیاست له امله په ترکیه کې رامنځته شوي له هغو څخه به په افغانستان کې هم استفاده وکړو.

د هېواد ولسمشروویل: موږ په نننۍ کتنه کې د اسلامي نړۍ د اوسني حالت او په هغه کې د ډیموکراسۍ د ټینګښت او د پیاوړي اقتصاد په رامنځته کولوکې د ترکیې هېواد د رول،د آسیا د زړه د بهیر او د استانبول د درې اړخیزو ناستو د پروسې د بیا پیل کېدو او د ترکمنستان له لارې له ترکیې سره د افغانستان د نښلولو په اړه خبرې وکړې.

ده زیاته کړه: ترکیه به د ایکو سازمان په چوکاټ کې د اورګاډي د پټلۍ د جوړېدو او د هوایي ترانسپورت د پراختیا په لاره کې له افغانستان سره همکاري وکړي او همدا راز ترکیه غواړي په کابل کې د علي آباد روغتون په یو سمبال طبي مرکز بدل او په کابل کې د مولانا جلال الدین محمد بلخي په نوم یو پوهنتون جوړکړي.

د افغانستان ولسمشرپه سیمه کې د سولې او ثبات د فضا د رامنځته کېدو په لاره کې د ترکیې د رغنده رول هرکلی وکړ، وې ویل: د افغانستان او ترکیې ترمنځ له پیړیو را په دیخوا نیکې اړیکې موجودې وې او دغه اړیکې د ۲۱ پیړۍ په پیل کېدو سره په نوي فصل کې پیل شوې.

ډاکټر محمد اشرف غني احمدزي په پوځي او اقتصادي برخه کې د ترکیې هېواد مرستې او همکارۍ وستایلې، وې ویل: نن موږ د افغانستان او ترکيې ترمنځ د دوامدارو ستراتیژیکو همکاریو یوموافقه لیک لاسلیک کړ چې له مخې به یې د کرنې، کانونو د استخراج او د ودانولو چارو لپاره د دواړو هېوادونو د وزیرانو په کچه کمیسیونونه جوړ او چارې به په ښه ډول تنظیم او په کال کې یو ځل به د دواړو هېوادونو د جمهورو رئیسانو ترمنځ کاري ناستې دوام ومومي.

د ترکیې ولسمشررجب طیب اردوغان د ترکیې په رامنځته کېدوکې د افغانستان رول ارزښتناک وباله، وې ویل: افغانستان په تېر مهال کې له ترکيې سره نیکې اړیکې لرلې دي او دا ایجابوي چې ترکیه د افغانستان ترڅنګ ودریږي او موږ دا ډاډ درکوو چې ترکیه به د افغانستان ترڅنګ ولاړه وي او د افغانستان له خلکو سره به خپلو همکاریو ته دوام ورکوي.

د ترکیې ولسمشروویل: د استانبول پروسه چې زموږ په نوښت پیل شوې وه هغې ته به دوام ورکړو او له پولې څخه د تروریستانو د را تېرېدو د مخنیوي په لاره کې پاکستان حیاتي رول لوبولی شي.

ده همدا راز وویل د اقتصادي اصلاحاتو کوم پروګرام چې په ترکیه کې عملي شو او ښه نتیجه ورڅخه ترلاسه شوه، په افغانستان کې به هم د هغه د عملي کېدو لپاره همکاري وکړي چې دلته به هم د دغه پروګرام تطبیق ښه پایله له ځان سره ولري.

ښاغلي اردغان له افغانستان سره د خپل هېواد د اقتصادي، فرهنګي، سوداګریزو او پوځي همکاریو د پراختیا ډاډ څرګند کړ، وې ویل چې ډیر ژر به په افغانستان کې د مولانا محمد بلخي یادګاري څلی جوړ کړي.

د ترکیې ولسمشرهمدا راز وویل، زه افغانستان ته په خپل دغه سفرکې د افغانستان او ترکيې ترمنځ دوستي او همکاري په څرګند ډول اعلانوم او موږ غواړو چې د دواړو هېوادونو ترمنځ اړیکې په بېلابیلو برخوکې پراختیا و مومي او د افغانستان زراعتي محصولات د ترکیې بازارونو ته لاره پیدا کړي.

همدا راز د نننۍ کتنې په ترڅ کې د افغانستان د ولسمشرډاکټر محمد اشرف غني احمدزي لخوا دترکیې ولسمشرښاغلي رجب طیب اردوغان ته د غازي امان الله خان عالي دولتي مډال ورکړل شو.

9 total views, 3 views today

1 comment

  1. Dr.h.z.SAFI .t. Reply

    Selamler,
    Ben bir Turk dostu olarak bu Afghan-Turk antlashmasina chok sevindim.
    Bence arkadash Turkler ,Din,Tip,Askeri,Ma`arif ve Ziraat alanlarinda oteki ulkelerden daha verimli ve tejcrubeliler ve daha fazla yardim yapabilejcekler!
    Teshekkurler.

    Pashtu jbarrh:salamoonah,
    Zah d yaw turkdosty afghan pa sefat, pa dey Afghan-turk tarroun dder khwash shwam.
    Zma pa nazar turkaan malgiry pa dien, tababet, a`skeri, ma`areph aw karhannyz tzango ki la noro malkonu na ddera tajruba lary aw laa ddera mrasta ba wakrry.
    pa mannano sara.

Leave a Reply

Your email address will not be published. Required fields are marked *