Categories

اعلان

Loading…

د فدا محمد نظري څو شعرونه

پاګل پتنګ

 

شمعې،

خپل ټول،

لړمون په لاس کې نيولی،

او سوځي،

 

د شمع ژوند،

په هغو پاګلو،

                   پتنګانو خندا ده،

چې د تيارې،

خواله  کوي.

 

                                  ستر بری

 

واښه،

          په اوبو ژوند کوي،

مرغۍ اوبه،

                 غواړي،

انسانان،

           له اوبو نه پرته،

                                 مري،

 

ستر بری،

د څاڅکي،

په برخه دی،

خو،

   څاڅکی بايد،

                      ځان و پېژني.

 


اړين واټن

 

تياره،

به لنډه وي يا اوږده،

خو،

     هغه د دوو روښناييو،

                                      ترمنځ،

                                             يو اړين،

                                                           واټن دی،

¨

ګوندې،

دغه واټن،

ډېر اړين،

نه شي.


 

د رڼا کالي

 

سپوږمۍ،

                  هرکله،

د رڼا نه جوړ،

                  کالي اغوندي،

يوازې،

          د هغوی د بدلولو،

                                      په وخت،

په ورېځ کې،

                  رانه پټه شي.

 

د سپوږمۍ،

            د بربنډ والي افسانه،

د پاګلانو،

ټوکه ده.

 

 

د ګاونډي لور


ښکلا،

         له تور والي،

                           تښتي،

تور مرچ،

           تازه نه وي،

او

  چا تر اوسه،

                   تور قند،

                           نه دی ليدلی،

 

خو،

  زموږ،

        د ګاونډي،

                     تور وشمه لور،

خورا ښکلې،

                    ډېره تازه،

او

   بېخي،

            خوږه ده.

264 total views, 2 views today

Leave a Reply

Your email address will not be published. Required fields are marked *

۸