Categories

اعلان

Loading…

په هرات کې د هند پر کونسلګرۍ حمله د ۵ حمله کوونکو په وژلو پای ته ورسېده

تاند- افغان امنیتي ځواکونه وايي هغه پنځه وسله وال سخت دریځي یې وژلي چې نن سهار یې په هرات ښار کې د هند پر کونسلګرۍ حمله کړې وه.

پنځه تنه، چې په سپکو وسلو، او همداراز په راکټونو او لاسي بمونو سمبال ول، په هرات کې د هند له سفارته سل متره لېري یوه کور ته ننوتل او له هغه ځایه یې د هند پر کونسلګرۍ حمله پیل کړه.

د هرات د امنیه قومندان ویندوی عبدالروف احمدي وویل:«جګړه وروسته له دې پای ته ورسېده چې حمله کوونکي ووژل شول. د کونسلګرۍ هیڅ مامور یا ملکیانو ته مرګ ژوبله نه ده اوښتې. یوازې دوه پولیس سرسري ټپیان شوي دي.»

ده همداراز وویل چې د کونسلګرۍ ټول مامورین په ودانۍ کې دننه دي.

طالبانو چې په تېرو کلونو کې یې د هند پر سفارت او کونسلګریو حملې کړي د هرات د نننۍ حملې مسوولیت په غاړه نه دی اخیستی.

پاکستان، چې ګومان کېږي د تور ګوته به ورته ونیول شي، مخکې تر مخکې دا برید غندلی دی.

د پاکستان د بهرنیو چارو وزارت ویندویې تسنیم اسلم وویل:«پر دیپلوماتیکو دفترونو حملې ته هیڅ دلیل او توجیه نشته. دا ښه خبره ده چې په برید کې د کونسلګرۍ کوم مامور ته زیان نه دی اوښتی.»

هند او افغانستان پخوا په کابل کې د هند پر سفارت د حملې تور پر آی ایس آی او له دې استخباراتي ادارې سره په تړلې سخت دریځې ډلې لشکر طیبه پوري کړی و.

52 total views, 1 views today

Leave a Reply

Your email address will not be published. Required fields are marked *